రష్యాకు గట్టి షాక్ ఇఛ్చిన డ్రౌన్లు... వీటితో ఆ దేశానికి జరిగిన నష్టం ఎంతో

రష్యా దేశానికి డ్రౌన్ల రూపంలో పెద్ద నష్టం జరిగింది. ఇదిలావుంటే ఏడాదిగా కొనసాగుతోన్న ఉక్రెయిన్‌, రష్యా యుద్ధంలో కీలక పరిణామం చోటుచేసుకుంది. బెలారస్‌లోని రష్యా వైమానిక స్థావరం పై డ్రోన్ల దాడి జరిగింది. ఈ దాడిలో రష్యాకు తీవ్ర నష్టం వాటిల్లింది. మాస్కో నిఘా విమానం పూర్తిగా ధ్వంసమైందని, దీని విలువ 274 మిలియన్ డాలర్లు (రూ.2,700 కోట్లకుపైగా) ఉంటుందని ఇండిపెడెంట్ పత్రికి వెల్లడించింది. ఉక్రెయిన్‌కు మద్దతు ఇస్తోన్న బెలారస్‌లోని ప్రభుత్వ వ్యతిరేక సంస్థ బైపోల్‌.. తామే ఈ దాడికి పాల్పడినట్టు ప్రకటించిందని పేర్కొంది.

ఈ ఘటన అనంతరం.. గగనతలంలో అనుమానిత వస్తువు కదలికల నేపథ్యంలో సెయింట్‌ పీటర్స్‌బర్గ్‌ లోని పుల్కోవో విమానాశ్రయాన్ని మంగళవారం కొద్ది గంటలపాటు రష్యా మూసేసినట్టు ఫ్లైట్‌రాడార్24 వెబ్‌సైట్ పేర్కొంది. ‘డ్రోన్ల దాడిలో ధ్వంసమైన విమానంబెలారస్‌ రాజధాని మిన్‌స్క్‌కు సమీపంలోని రష్యా వైమానికి స్థావరం మచులిశ్చికి గతేడాది డిసెంబరు 14న చేరుకుంది.. ఉక్రెయిన్‌పై దండయాత్ర నేపథ్యంలో రష్యా వైమానిక దళం బాంబు దాడుల లక్ష్యాలను గుర్తించేందుకు దీనిని ఉపయోగిస్తున్నారు’ అని ఇండిపెండెంట్ తన కథనంలో వెల్లడించింది.

ఈ ఘటనలో ఒక మిలిటరీ రవాణా విమానం, మంచును తొలగించే వాహనాలూ ధ్వంసమైనట్లు పేర్కొంది. డ్రోన్ల దాడిలో రష్యా నిఘా విమానం ముందు, మధ్యభాగం, ఏవియానిక్, రాడార్ యాంటెన్నా తీవ్రంగా దెబ్బతిన్నట్టు బెలాసర్‌కు చెందిన హజున్ ప్రాజెక్ట్ వ్యాఖ్యలను ఉటంకించింది. అయితే, ఈ కథనాలను బెలారస్ తోసిపుచ్చింది. ఇదంతా కట్టుకథేనని బెలారస్‌ ఉప విదేశాంగ మంత్రి యూరీ అంబ్రాజెవిచ్‌ ప్రకటించారు. గతేడాది ఫిబ్రవరి 24 నుంచి ఉక్రెయిన్‌పై దండయాత్ర కొనసాగిస్తోన్న రష్యాకు బెలారస్ మద్దతు ఇస్తోన్న విషయం తెలిసిందే.

ఉక్రెయిన్‌పై దాడులకు బెలారస్‌ భూభాగాన్ని మాస్కో వినియోగించుకుంటోంది. కాగా, ఈ ఘటనపై రష్యా తీవ్ర ఆగ్రహం వ్యక్తం చేసింది. బెలారస్ ప్రభుత్వం, స్థానిక పోలీసులు, భద్రతా సిబ్బంది సెర్చ్ ఆపరేషన్ చేపట్టారు. ఉగ్రవాద చర్యలుగా పేర్కొన్న రష్యా.. ప్రతీకారం తప్పదని హెచ్చరించింది.