అమిత్ షా అగర్తల ఎయిర్‌పోర్ట్‌కు వెళ్తుండగా దూసుకొచ్చిన కారు

కేంద్ర హోంశాఖ మంత్రి అమిత్ షా త్రిపుర పర్యటనలో అలజడి రేగింది. అక్కడ భద్రతా వైఫల్యం చోటుచేసుకుంది. ఆయన కాన్వాయ్‌లోకి ఓ కారు వేగంగా దూసుకొచ్చి తీవ్ర అలజడి సృష్టించింది. అగర్తల ఎయిర్‌పోర్టుకు అమిత్ షా వెళ్తున్న సమయంలో ఈ ఘటన చోటుచేసుకొంది. ఇటీవల జరిగిన త్రిపుర అసెంబ్లీ ఎన్నికల్లో వరుసగా రెండోసారి బీజేపీ విజయం సాధించి అధికారంలోకి రావడంతో ఆ రాష్ట్ర ముఖ్యమంత్రిగా మాణిక్‌ సాహా బుధవారం ప్రమాణస్వీకారం చేశారు. ఈ కార్యక్రమానికి అమిత్ షా హాజరయ్యారు. ఈ సందర్భంగా టిప్రా మోథా పార్టీ అధినేత, మాజీ రాజు ప్రదోయత్ మాణిక్య దేబ్‌వర్మ‌తో భేటీ అయి కూటమిపై చర్చించారు.

అనంతరం ఆయన ఢిల్లికి తిరుగుపయనమవుతుండగా భద్రతా వైఫల్యం చోటుచేసుకుంది. బుధవారం సాయంత్రం గెస్ట్‌‌హౌస్‌ నుంచి అగర్తల విమానాశ్రయానికి అమిత్ షా కాన్వాయ్‌ వెళ్తుండగా.. ఆ మార్గంలో అధికారులు సాధారణ ట్రాఫిక్‌ను నిలిపివేశారు. అయితే, ఓ వ్యక్తి మాత్రం ఆగకుండా తన కారులో దూసుకొచ్చాడు. ఆ కారును పోలీసులు అడ్డుకునేందుకు ప్రయత్నించినప్పటికీ అతడు వేగంగా కాన్వాయ్‌లోకి దూసుకురావడంతో కలకలం రేగింది. అయితే ఈ ఘటన కారణంగా ఎలాంటి ప్రమాదం జరగకపోవడంతో అధికారులు ఊపిరిపీల్చుకున్నారు.

ఈ ఘటనపై దర్యాప్తు ప్రారంభించిన పోలీసులు.. ఇంతవరకూ ఎవరినీ అరెస్టు చేయలేదని తెలుస్తోంది. మరోవైపు, ఈ ఘటనను కేంద్ర దర్యాప్తు సంస్థలు సీరియస్‌గా తీసుకున్నాయి. దీనిపై నివేదిక ఇవ్వాలని రాష్ట్ర పోలీసులను ఆదేశించినట్లు సమాచారం. గతేడాది సెప్టెంబరులో ముంబయిలో అమిత్ షా పర్యటించినప్పుడు ఇటువంటి ఘటనే చోటుచేసుకున్న విషయం తెలిసిందే. ఆంధ్రప్రదేశ్‌కు చెందిన ఓ ఎంపీ వ్యక్తిగత సహాయకుడ్ని అని చెప్పి ఓ వ్యక్తి భద్రతా వలయంలోకి ప్రవేశించి, అమిత్ షా దగ్గరగా చక్కర్లు కొట్టాడు.

హోం మంత్రిత్వ శాఖ ఐడీ కార్డు ధరించిన అతడుభద్రతా బృందంలో కనిపించాడు. అతడు కొన్ని గంటల పాటు అమిత్‌ షాకు దగ్గర్లోనే తిరుగుతూ ఉన్నాడు. అమిత్ షా హాజరైన రెండు కార్యక్రమాలతో పాటు మహారాష్ట్ర ముఖ్యమంత్రి ఏక్‌నాథ్ షిండే, డిప్యూటీ సీఎం దేవేంద్ర ఫడ్నవీస్ నివాసాల బయట కూడా నిందితుడు కనిపించినట్టు పోలీసులు తెలిపారు. ఇటీవల త్రిపుర అసెంబ్లీకి జరిగిన ఎన్నికల్లో విజయం సాధించి బీజేపీ మరోసారి ప్రభుత్వాన్ని ఏర్పాటుచేసింది. ముఖ్యమంత్రిగా మాణిక్‌ సాహా రెండోసారి ప్రమాణస్వీకారం చేశారు. ఈ కార్యక్రమానికి ప్రధాని నరేంద్ర మోదీ సహా, అమిత్ షా, బీజేపీ అధ్యక్షుడు జేపీ నడ్డా తదితరులు హాజరయ్యారు. ఈ రాష్ట్రంలో బీజేపీ కూటమి 32 స్థానాల్లో విజయం సాధించిన విషయం తెలిసిందే.