ఎన్‌కౌంటర్ చేస్తారనే భయంతో,,,పోలీసులకు లొంగిపోయిన ఓ దొంగల ముఠా సభ్యుడు

సీఎం యోగి ఆదిత్యనాథ్ తీసుకొంటున్న చర్యలతో నేరస్థులు హడలిపోతున్నారు. రాష్ట్రంలో శాంతి భద్రతలపై పూర్తిస్థాయి దృష్టి సారించిన యోగి.. నేరస్థులను వదిలిపెట్టొద్దని, అవసరమైతే ఎన్‌కౌంటర్ చేసి పారేయాలని అధికారులకు పూర్తి స్వేచ్ఛ నిచ్చారు. దీంతో నేరస్థులు తమను ఎక్కడ ఎన్‌కౌంటర్ చేసిపడేస్తారోనని భయంతో వణికిపోతున్నారు. జైల్లో ఉన్న ఖైదీలు సైతం భయపడిపోతున్నారు. అనారోగ్యానికి గురైన ఖైదీలను బయటకు తీసుకెళ్లి వైద్యం చేయిస్తామన్నా.. తమను ఎన్‌కౌంటర్ చేయడానికి తీసుకెళ్తున్నారని భావించి బయటకు రాబోమని చెబుతున్నారు.

తాజాగా, మోటార్ సైకిళ్లు ముఠాకు చెందిన ఓ నేరస్థుడు తనను క్షమించాలంటూ వేడుకుంటూ ప్లకార్డు పట్టుకుని పోలీసులకు లొంగిపోయాడు. ‘‘సీఎం యోగి నేను తప్పుచేశాను.. నన్ను క్షమించండి’ అంటూ ప్లకార్డు పట్టుకున్న ఫోటో ప్రస్తుతం సామాజిక మాధ్యమాల్లో వైరల్ అవుతోంది. ముజఫర్‌నగర్ జిల్లా మన్సూర్‌పూర్ పోలీస్ స్టేషన్ పరిధిలోని అంకుర్ అనే బైక్ దొంగ బుధవారం పోలీసులకు లొంగిపోతూ.. ఈ ప్లకార్డును ప్రదర్శించాడు.

పోలీస్ స్టేషన్ హౌస్ ఆఫీసర్ రోజంత్ త్యాగి మాట్లాడుతూ.. ‘‘ఎన్‌కౌంటర్ భయంతో నిందితుడు బుధవారం ఉదయం గ్రామ పెద్ద, తన కుటుంబసభ్యులను తీసుకొని స్టేషన్‌కు వచ్చాడు.. తనను క్షమించాలని వేడుకున్నాడు.. ఇకపై ఎప్పుడూ నేరం చేయనని మాటిచ్చాడు.. అతడ్ని కస్టడీలోకి తీసుకుని జైలుకు తరలించాం.. హత్యాయత్నం, లూటీ వంటి పలు కేసుల్లో అంకుర్ నిందితుడిగా ఉన్నాడు’’ అని చెప్పారు. క్రిమినల్ కేసుల్లో నిందితులను పోలీసులు ఎన్‌కౌంటర్ చేసిన మర్నాడే ఇది చోటుచేసుకోవడం గమనార్మం.

ఖతౌలి డీఎస్పీ రవిశంకర్ మిశ్రా మాట్లాడుతూ... మంగళవారం కరుడగట్టిన ఇద్దరు నేరస్థులను అరెస్ట్ చేశాం.. వీరిలో ఒకడు పారిపోవడానికి ప్రయత్నించాడు.. వారి దగ్గర నుంచి మూడు బైక్‌లు, అక్రమ ఆయుధాలను స్వాధీనం చేసుకున్నాం.. ఈ అంశంపై తదుపరి విచారణ కొనసాగుతోంది అని తెలిపారు. యోగి ఆదిత్యనాథ్ అధికారంలోకి వచ్చినప్పటి నుంచి ఇప్పటి వరకూ యూపీలో 9 వేల ఎన్‌కౌంటర్లు జరిగాయి. వీరిలో దాదాపు 160 మంది అనుమానిత క్రిమినల్స్ హతమయ్యారు.