బ్రేక్ ఇన్ స్పెక్టర్ పై కొబ్బరి బొండాలు అమ్మే వ్యక్తి కత్తితో దాడి

బ్రేక్ ఇన్ స్పెక్టర్ పై కత్తితో దాడికి పాల్పడిన ఘటన  కాకినాడలో చోటుచేసుకొంది. రవాణాశాఖ బ్రేక్ ఇన్స్‌పెక్టర్‌ చిన్నారావు పై కొబ్బరి బోండాలు అమ్ముకునే వ్యక్తి కత్తితో దాడి చేశాడు. ఈ ఘటనలో బ్రేక్ ఇన్స్‌పెక్టర్‌కు కత్తిపోట్లు తగిలాయి. ఈ దాడిలో బ్రేక్ ఇన్స్‌పెక్టర్‌ చేతి వేలు సంఘటన స్థలంలోనే తెగి కింద పడింది. వెంటనే ఇన్స్‌పెక్టర్‌‌ను స్థానికుల సాయంతో ప్రభుత్వ ఆసుపత్రికి తరలించారు.. అక్కడ వైద్యం అందిస్తున్నారు. కొబ్బరి బొండాల వ్యాన్ లైసెన్స్ గురించి అడగడంతో దాడి చేసినట్లు తెలుస్తోంది. నిందితుడ్ని పోలీసులు అదుపులోకి తీసుకున్నట్లు సమాచారం. ఈ ఘటనకు సంబంధించి పూర్తి వివరాలు తెలియాల్సి ఉంది.

ఇదిలా ఉంటే ఈ ఘటనపై డీఎస్పీ స్పందించారు. ఉదయం 8:15 గంటల ప్రాంతంలో ఆటోలో కొబ్బరి బోండాలు అమ్ముతున్నటువంటి పెంటా వెంకట దుర్గాప్రసాద్ అనే వ్యక్తిని వాహనం రికార్డుల గురించి, వ్యాన్ ఫిట్నెస్ సర్టిఫికెట్, ఇన్సూరెన్స్ వివరాలు గురించి అసిస్టెంట్ మోటార్ వెహికల్ ఇన్స్పెక్టర్ అడిగారు. తనిఖీ సమయంలో అడుగుతుండగా ఘర్షణ జరిగిందన్నారు. ఈ క్రమంలో ఆవేశంలో కొబ్బరి బొండాలు అమ్మే వ్యక్తి కొబ్బరి బోండాల కత్తితో అసిస్టెంట్ మోటర్ ఇన్స్పెక్టర్ చిన్నారావుపై దాడి చేసినట్లు తెలిపారు.

ఘటన జరిగిన కొద్ది నిమిషాల్లోనే పోలీసు అధికారులు అక్కడకు వెళ్లారని.. దుర్గా ప్రసాద్‌ను అదుపులో తీసుకొని గాయపడిన అసిస్టెంట్ మోటర్ ఇన్స్పెక్టర్ చిన్నారావును కాకినాడ గవర్నమెంట్ జనరల్ హాస్పిటల్ చికిత్స నిమిత్తం తరలించామని డీఎస్పీ తెలిపారు. ఈ కేసులో దర్యాప్తు చేస్తున్నామన్నారు.