అమృతపాల్‌ సింగ్ కు పాక్ మాజీ ఆర్మీ చీఫ్ కొడుకుతో సంబంధాలు

అమృతపాల్‌ సింగ్ గురించి నిర్ఘాంతపోయే విషయాలు వెలుగులోకి వస్తున్నాయి. ఇదిలావుంటే పరారీలో ఉన్న ఖలిస్థానీ వేర్పాటువాది అమృతపాల్‌ సింగ్ కోసం ఆపరేషన్ కొనసాగుతుండగా.. అతడికి సంబంధించిన సంచలన విషయాలు వెలుగులోకి వస్తున్నాయి. పాకిస్థాన్ గూఢచారి సంస్థ ఐఎస్ఐతో సంబంధాలున్నట్టు నిఘా వర్గాలు ఇప్పటికే వెల్లడించారు. తాజాగా, పాక్‌తో ఉన్న మరో సంబంధం గురించి బయటపడింది. అమృతపాల్‌ సింగ్ ఫైనాన్షియర్ దల్జీత్ కల్సీకి పాకిస్థాన్ ఆర్మీ మాజీ చీఫ్ ఖమర్ జావేద్ బజ్వా కుమారుడు సాద్ బజ్వాతో సన్నిహిత సంబంధాలున్నట్టు నిఘా వర్గాలు పేర్కొన్నాయి. దుబాయ్‌లో సాద్ బజ్వా నడుపుతోన్న కంపెనీలో భాగస్వామిగా ఉన్నట్టు పేర్కొన్నారు. అతడు రెండు నెలలుగా దుబాయ్‌లో ఉన్నట్టు తెలుస్తోంది.

కల్సీ దుబాయ్‌లో ఉండేందుకు ఖలిస్థానీ ఉగ్రవాది లాండా హరికే ఏర్పాట్లు చేసినట్లు ఆరోపణలు వచ్చాయి. అంతేకాదు, అతడు ఐఎస్ఐ‌ను సంప్రదించినట్టు ఆధారాలున్నాయని వెల్లడించాయి. బాంబిహా గ్యాంగ్‌కు సన్నిహితుడైన గ్యాంగ్‌స్టర్‌తో కూడా కల్సికి సంబంధం ఉందని, ఢిల్లీలోని తీహార్ జైలులో ఉన్న గ్యాంగ్‌స్టర్ నీరజ్ బవానియాకు అతడు సన్నిహితుడనే కథనాలు వస్తున్నాయి. కల్సి కొంతకాలం కిందట ఢిల్లీలో కార్యాలయాన్ని ఏర్పాటు చేసి, పంజాబ్‌లో మోడలింగ్ లేదా సినిమా కాంట్రాక్ట్‌లకు ఏజెంట్‌గా పనిచేశాడు.

విశ్వసనీయ వర్గాల ప్రకారం అతను అమృతపాల్‌కి అత్యంత ఆప్త మిత్రుడు, సన్నిహితుడు. మార్చి 18న పంజాబ్ పోలీసులకు చిక్కినట్టే చిక్కి త్రుటిలో తప్పించుకున్న అమృతపాల్‌ సింగ్.. పలు వేషాలు, పలు వాహనాలను మార్చి భద్రత బలగాల కళ్లుగప్పి తిరుగుతున్నాడు. అతడు ప్రస్తుతం నేపాల్‌లో తలదాచుకుంటున్నట్టు తెలుస్తోంది. పాకిస్థాన్‌ గూఢచారి సంస్థ ఐఎస్ఐ నుంచి అతడికి సహాకారం అందుతున్నట్టు గుర్తించారు. ఐఎస్ఐ సూచనలతో పంజాబ్‌ ప్రజలను రెండుగా చీల్చే ప్రయత్నాలు చేస్తున్నట్టు తేలింది.

వారిస్ పంజాబ్ దే సంస్థ చీఫ్ అయిన అమృతపాల్‌‌.. తాను ఖలీస్థాన్ వేర్పాటువాది, ఉగ్రవాది జర్నైల్ సింగ్ బింద్రన్‌వాలా అనుచరుడిగా చెప్పుకుంటాడు. అతడి మద్దతుదారులు కూడా బింద్రన్‌వాలా 2.0గా పిలుస్తారు. ఇక, పంజాబ్‌లో జాతీయ భద్రత చట్టం కింద అమృతపాల్‌ అనుచరులు, సన్నిహితులు మొత్తం 100 మందిని పోలీసులు అరెస్ట్ చేశారు.