కాంగోలో బంగారం గనిలో ప్రమాదం,,ఖాళీ చేతులతో 9 మందిని రక్షించిన ఆ ఒక్కడు

సినిమాల్లో మాత్రమే హీరోలా  సాహసం కనిపిస్తుంది. కానీ  నిజజీవితంలో ఎవరైనా చేస్తారా అంటే చేస్తారు అని చూపించాడో వ్యక్తి.  కేజీఎఫ్ సినిమాలో బంగారపు గనిలో బానిసలుగా చిక్కుకున్న వారిని కాపాడేందుకు హీరో ప్రాణాలకు తెగించి సాహసం చేస్తాడు. ఇప్పుడు రియల్ లైఫ్‌లోనూ ఓ వ్యక్తి అలాంటి సాహసమే చేసి ‘హీరో’గా నిలిచాడు. కాంగోలోని ఓ బంగారు గనిలో చోటు చేసుకున్న ప్రమాదం నుంచి 9 మంది మైనర్ బాలురను ఖాళీ చేతులతో రక్షించాడు. ఇందుకు సంబంధించిన వీడియో ఇప్పుడు ఇంటర్నెట్‌ను షేక్ చేస్తోంది. గనిలో కూలీలందరూ పనిచేస్తుండగా.. అది ఒక్కసారిగా కుప్పకూలడం ప్రారంభమైంది. బయటకి వచ్చే మార్గం మూసుకుపోయింది. అప్పటికే చాలా మంది కూలీలు బయటపడగా.. మైనర్లైన 9 మంది బాలుడు లోపలే చిక్కుకుపోయారు.

మట్టి చరియలు విరిగిపడుతుండటంతో గని ప్రవేశ ద్వారం వద్దకు వచ్చేందుకు ఎవరూ సాహసం చేయలేదు. కానీ, వారిలో ఒక కూలీ మాత్రం అందరిలా అలా చూస్తూ నిలబడి ఉండలేదు. ఒక్క ఉదుకుటన గని ద్వారం వద్దకు వచ్చి చేతులతో మట్టిని తొలగించాడు. ఓ వైపు మీద నుంచి మట్టి పెళ్లలు ప్రమాదకరంగా విరిగిపడుతుంటే.. వెనక్కి, ముందుకూ పరుగెత్తుతూ ప్రవేశద్వారాన్ని దఫదఫాలుగా క్లియర్ చేశాడు. అతడికి మరో వ్యక్తి సహకరించాడు. దీంతో గనిలో చిక్కుకున్న బాలురు ఒకరి తర్వాత ఒకరు సజీవంగా బయటకి వచ్చారు. తృటిలో పెను ప్రమాదం తప్పింది.

ఇదంతా నిమిషాల వ్యవధిలోనే జరిగిపోయింది. బాలురు ఒక్కొక్కరూ క్షేమంగా బయటకి వస్తుండగా.. గని వెలువల నిల్చొని చూస్తున్న కూలీలందరూ కన్నీళ్లు, ఆనందం కలగలిపిన భావోద్వేగంతో గట్టిగా అరిచారు. డెమొక్రాటిక్ రిపబ్లిక్ ఆఫ్ కాంగోలో శనివారం (మార్చి 25) ఈ ఘటన చోటు చేసుకుంది.

గోల్డ్ మైన్ వద్ద ప్రమాదం జరిగినట్లు సమాచారం అందగానే.. అధికారులు రెస్క్యూ టీమ్‌తో అక్కడికి చేరుకున్నారు. అయితే, వారంతా అక్కడికి వచ్చే సరికే, గనిలో చిక్కుకున్న వారందరినీ ఒకే వ్యక్తి వట్టి చేతులతో రక్షించాడు. ‘మేము ప్రవేశానికి అడ్డుగా ఉన్న శిథిలాలను తొలగించడానికి రెస్క్యూ టీమ్‌ను త్వరగా సమీకరించాం. అప్పటికే వారు తొమ్మిది మంది బాలురను రక్షించగలిగారు’ అని స్థానిక పౌర సమాజ ప్రతినిధి క్రిస్పిన్ కయుకా చెప్పినట్లు రాయిటర్స్ పేర్కొంది.

ఈ వీడియో సోషల్ మీడియాలో పోస్టు చేయడంతో వైరల్‌గా మారింది. తన తోటి వారిని రక్షించడానికి తన ప్రాణాలను పణంగా పెట్టిన ఆ వ్యక్తిని ‘సూపర్ హీరో’ నెటిజన్లు కొనియాడుతున్నారు.  కాంగోలో గనుల్లో ప్రమాదాలు తరచుగా చోటు చేసుకుంటున్నాయి. కనీస భద్రతా ప్రమాణాలు పాటించకపోవడం, సరైన యంత్రాలను ఉపయోగించకపోవడం, నిబంధనలకు విరుద్ధంగా తవ్వకాలు చేయడం వల్లే ఈ ప్రమాదాలు చోటు చేసుకుంటున్నాయని అనేక నివేదికలు వెల్లడించాయి. ఇలాంటి ప్రమాదాల్లో వందలాది మంది మరణిస్తున్నారు. ప్రాణాంతకం అయినా, ప్రమాదకర పరిస్థితుల్లో గనుల్లో పనిచేయడానికి చాలా మంది వెళ్తుంటారు. ఆ పని చేయకపోతే, అక్కడి పేదలకు పూట గడవదు. మైనర్లు, వయసు పైబడిన వాళ్లు కూడా గనుల్లో పనులకు వెళ్లి ప్రమాదాల్లో చిక్కుకొని మృత్యువాతపడుతుండటం విషాదరకర అంశం.