కిలో బియ్యం రూ.340, కిలో ద్రాక్ష రూ. 1600,,,,రంజాన్ మాసం రాకతో ఆకాశనంటిన ధరలు

రంజాన్ మాసం నేపథ్యంలో పండ్ల ధరలు ఆకాశనంటాయి.  ఒక్క పూట తిండి కోసమే సామాన్యులు తీవ్ర ఇక్కట్లు పడుతున్నారు. తిండి లేక కొంత మంది, క్యూ లైన్లలో గంటల తరబడి నిల్చొని మరి కొంత మంది మృత్యువాతపడుతున్నారు. రంజాన్ మాసం ప్రారంభం కావడంతో పండ్ల ధరలు చుక్కలనంటాయి. డజన్ అరటిపండ్లు రూ. 500 పైనే పలుకుతున్నాయి. కిలో ద్రాక్ష రూ. 1600 పైనే ఉంది. బత్తాయి కిలో రూ. 440, దానిమ్మ కిలో రూ. 400 పలుకుతున్నాయి. బియ్యం ధర కిలో రూ.340కి ఎగబాకింది. ఉల్లిగడ్డల ధరలు మరింత పెరిగాయి. ఆర్థిక సంక్షోభంతో కొట్టుమిట్టాడుతున్న పాకిస్థాన్‌లో రంజాన్ మాసం కూడా ప్రారంభం కావడంతో ప్రస్తుత పరిస్థితి ఇది. ఇప్పటికే నిత్యావసర ధరలు ఆకాశాన్నంటగా.. రంజాన్ మాసం ప్రారంభంతో డిమాండ్ పెరిగి, ధరలు మరింత పెరిగాయి. వెరసి పాకిస్థాన్ ప్రజలు కుదేలవుతున్నారు.

పవిత్ర రంజాన్ మాసం నేపథ్యంలో కష్టాల్లో ఉన్న నిరుపేదల కోసం కొంత మంది వ్యక్తులు, కొన్ని స్వచ్చంధ సంస్థల ప్రతినిధులు గోధుమపిండి, ఇతర నిత్యావసరాలు ఉచితంగా పంపిణే చేస్తున్నారు. ఇలాంటి చోట్లకు జనం విపరీతంగా ఎగబడుతున్నారు. పంజాబ్‌ ప్రావిన్స్‌లోని ఓ ప్రాంతంలో చేపట్టిన ఉచిత పంపిణీ కార్యక్రమంలో తొక్కిసలాట జరిగి ఒక మహిళ మృతి చెందగా.. మరో ఇద్దరు తీవ్రంగా గాయపడి ఆస్పత్రిలో చికిత్స పొందుతున్నట్లు వార్తలు వెలువడ్డాయి. ఇందుకు సంబంధించిన వీడియో సోషల్ మీడియాలో వైరల్‌గా మారినట్లు మీడియా కథనాల్లో రాశారు.

పెషావర్‌లో గోధుమపిండి ప్యాకెట్ల లోడుతో వెళ్తున్న ఓ ట్రక్కును జనం లూటీ చేశారు. పాకిస్థాన్‌లో ఏ వస్తువు ధర చూసినా మండిపోతోంది. అటు ఔషధాల ధర కూడా పెరిగింది. దీనికి తోడు ముఖ్యమైన ఔషధాల కొరత ప్రజలను మరిన్ని ఇక్కట్లకు గురిచేస్తోంది. నింగిని అంటుతున్న ద్రవ్యోల్బణం ఒకవైపు, ప్రభుత్వ నిస్సహాయత మరోవైపు పాకిస్థాన్‌ను దివాలా దిశగా నడిపిస్తున్నాయి.

బంగారం ధరైతే ఏకంగా 2 లక్షల రూపాయల పైనే ఉంది. 10 గ్రాముల బంగారం ధర రూ. 2.06 లక్షలు పలుకుతోంది. పెట్రోల్, డీజిల్, గ్యాస్ ధరలు ఇప్పటికే ఆకాశన్నంటిన సంగతి తెలిసిందే. అమెరికా డాలర్‌తో పోల్చితే పాకిస్థాన్ రూపాయి విలువ అత్యంత కనిష్టానికి పడిపోవడమే ఈ పరిస్థితికి కారణం.

ఓ నివేదిక ప్రకారం.. పాకిస్థాన్‌లో ఉల్లిపాయల ధర 228.28 శాతం పెరిగింది. గోధుమ పిండి ధర 120.66 శాతం, గ్యాస్ ధర 108.38 శాతం పెరిగింది. లిప్టన్ టీ ధర 94.60 శాతం, సిగరెట్ ధర 165.88 శాతం పెరిగింది. మరోవైపు.. ఆర్థిక సంక్షోభాన్ని బూచీగా చూపి దళారులు ధరలను మరింత పెంచుతున్నారు.

డీజిల్ ధర 102.84 శాతం, గుడ్ల ధర 79.56 శాతం పెరిగాయి. నిత్యావసర వస్తువుల్లో 26 వస్తువుల ధరలు ప్రజలకు అందుబాటులో లేకుండా విపరీతంగా పెరిగాయని నివేదికలు వెల్లడిస్తున్నాయి. అధికార, ప్రతిపక్ష పార్టీల నేతలకు ఒకరిపై మరొకరు నిందలు మోపుకునేందుకు సరిపోతోంది. పాక్ తలరాత ఎప్పుడు మారుతుందా అని అక్కడి ప్రజలు దీనంగా ఎదురుచూస్తున్నారు.