రాప్తాడు సమీపంలో దారుణ హత్య,,,వైసీపీ నేతను హత్య

అనంతపురం జిల్లాలో కక్కలపల్లి దగ్గర వైఎస్సార్‌సీపీ నేత శ్రీనివాస్‌ను దారుణంగా హత్య చేశారు. టమోటా మార్కెట్‌లో శ్రీనివాస్‌ను దుండగులు హతమార్చారు. టమోటా మార్కెట్‌లో వంశీ అనే వ్యక్తితో గొడవ జరిగిందని తెలుస్తోంది. అనుచరులతో కలిసి వంశీ అనే వ్యక్తి చంపినట్లు పోలీసుల అనుమానిస్తున్నారు. ఈ ఘటనపై పోలీసులు సమగ్ర విచారణ చేపట్టారు. ఘటనా స్థలాన్ని రాప్తాడు ఎమ్మెల్యే తోపుదుర్తి ప్రకాష్ రెడ్డి సోదరుడు రాజశేఖరరెడ్డి పరిశీలించారు. బాధిత కుటుంబాన్ని పరామర్శించి వివరాలు అడిగి తెలుసుకున్నారు. ఈ ఘటనకు సంబంధించి పూర్తి వివరాలు తెలియాల్సి ఉంది.

కదిరిలో జరిగిన మరో ఘటనలో బాబాయిపై అబ్బాయి హత్యాయత్నం చేశాడు. యర్రగుంటపల్లికి చెందిన నాగప్పనాయుడు, అతని అన్న కుమారుడు శ్రీనివాసులునాయుడు మధ్య చిన్న గొడవ జరిగింది. అతడికి సర్ది చెప్పేందుకు బాబాయి నాగప్పనాయుడు ప్రయత్నించగా.. శ్రీనివాసులునాయుడు లిక్కర్ సీసా పగులగొట్టి దాడి చేశాడు. అతడికి గాయాలు కావడంతో కదిరి ప్రభుత్వం ఆస్పత్రికి తరలించారు. ఇటు పోలీసులకు కూడా ఫిర్యాదు చేశారు.

బాబాయి ఫిర్యాదు చేయడంతో పోలీసులు శ్రీనివాసులునాయుడ్ని స్టేషన్‌కు రమ్మని పిలిచారు. దీంతో బాబాయిపై అబ్బాయి సీరియస్ అయ్యాడు.. ఫోన్ చేసి కేసు ఎందుకు పెట్టావంటూ ఆగ్రహం వ్యక్తం చేశారు. డిగ్రీ కాలేజీ గ్రౌండ్‌లో ఉన్నా తేల్చుకుందాం రా అంటూ సవాల్ చేశాడు.. నాగప్పనాయుడు కూడా అక్కడికి వెళ్లాడు. ఇంతలో శ్రీనివాసులునాయుడు తన దగ్గర ఉన్న పెట్రోల్‌‌ బాటిల్ తీసి బాబాయిపై చల్లి నిప్పంటించాడు.

సెకన్ల వ్యవధిలోనే నాగప్పనాయుడికి మంటలు వ్యాపించాయి.. వెంటనే గమనించిన స్థానిక యువకులు మంటలను ఆర్పేశారు. అతడ్ని ప్రభుత్వ ఆసుపత్రికి తరలించారు. అనంతరం మెరుగైన వైద్యం కోసం బెంగళూరు తరలించారు. ఈ ఘటనపై పోలీసులు కేసు నమోదు చేశారు. చిన్న గొడవ సొంత బాబాయిపై హత్యాయత్నం వరకు వెళ్లింది. ఈ ఘటన స్థానికంగా కలకలంరేపింది.

తాడిమర్రి మండలం మర్రిమాకుపల్లిలో మరో యువకుడు కరెంట్ షాక్‌తో ప్రాణాలు కోల్పోయాడు. ఊటకూరి కృష్ణారెడ్డి, లక్ష్మీదేవిల కుమారుడు శ్రీనాథ్‌రెడ్డి చదువు పూర్తి చేసుకుని ఇంటి దగ్గర తండ్రికి వ్యవసాయ పనుల్లో తోడుగా ఉంటున్నాడు. శ్రీనాథ్ పొలానికి వెళ్లి మోటార్ ఆన్ చేశాడు.. ఇంతలో మోటారు ఆగిపోవడంతో చూసేందుకు విద్యుత్తు స్తంభం పైకి ఎక్కాడు. అతడికి విద్యుత్ తీగలు తగలడంతో కిందపడిపోయాడు. వెంటనే గమనించిన రైతులు తాడిమర్రి ప్రభుత్వ ఆసుపత్రికి తరలించగా.. అక్కడ డాక్టర్లు అప్పటికే చనిపోయాడని చెప్పారు. దీంతో తల్లిదండ్రులు తీవ్ర విషాదంలో ఉన్నారు.