శరీరంపై ఒత్తిడి ప్రభావం తెలసుకునేందుకు ప్రయోగం

వృద్ధాప్యాన్ని జయించాలని.. ఎలాంటి వ్యాధుల్లేకుండా ఆరోగ్యవంతుడిగా ఎక్కువ కాలం జీవించాలనేది మనిషి కల. అందుకోసం ప్రపంచవ్యాప్తంగా రకరకాల ప్రయోగాలు కొనసాగుతున్నాయి. ఈ క్రమంలోనే 55 ఏళ్ల ఓ ప్రొఫెసర్ వినూత్న ప్రయోగాన్ని చేపట్టారు. నీటి అడుగున వంద రోజులపాటు గడిపాలని డిసైడయ్యారు. అంతే కాదు మార్చి 1 నుంచి ఆయన నీటి అడుగున గడుపుతున్నారు. పరిశోధనలో భాగంగా అమెరికాలోని ఫ్లోరిడాలో 55 మీటర్ల వెడల్పు, దాదాపు 30 అడుగుల లోతున్న నీటి భాగంలో ఆయన ఉంటున్నారు.

గతంలో నేవీలో డైవర్‌గా పని చేసిన జోసెఫ్ డిటురీ ప్రస్తుతం కాలేజీ ప్రొఫెసర్‌గా పని చేస్తున్నారు. ఎక్కువ కాలంపాటు తీవ్ర ఒత్తిడికి లోనైతే మానవ శరీరం ఎలా స్పందిస్తుందోనని జోసెఫ్ డిటురీ అధ్యయనం చేస్తున్నారు. ఇప్పటి వరకూ ఏకబిగిన నీటి అడుగున ఓ వ్యక్తి 73 రోజులపాటు ఉండటమే రికార్డ్. కాగా వంద రోజులపాటు నీటి అడుగున ఉండాలని లక్ష్యంగా పెట్టుకున్న ప్రొఫెసర్ జోసెఫ్.. నీటి అడుగు నుంచే ఆన్‌లైన్ ద్వారా బయోమెడికల్ ఇంజినీరింగ్ క్లాసులు బోధిస్తున్నారు.

ఈ ప్రయోగం మొదలైన దగ్గర్నుంచి సైకాలజిస్టులు, సైక్రియాటిస్టుల బృందం ప్రొఫెసర్ ఆరోగ్యాన్ని కీలక పారామీటర్లను నిశితంగా గమనిస్తోంది. ఎప్పటికప్పుడు అనేక సైకలాజికల్, సైకోసోషల్, మెడికల్ టెస్టులు చేయడం ద్వారా అతడి ఆరోగ్యంలో వస్తున్న మార్పులను నమోదు చేస్తున్నారు.

‘మానవ శరీరం ఎప్పుడూ అంత కాలంపాటు నీటి అడుగున లేదు. అందుకే నన్ను జాగ్రత్తగా పర్యవేక్షిస్తారు. నీటి అడుగున ఉండటం వల్ల నా శరీరం ఎలా ప్రభావితం అవుతుందనే విషయమై ప్రతి అంశాన్ని పరీక్షిస్తారు. కానీ నేను మాత్రం ఒత్తిడి పెరగడం వల్ల నా ఆరోగ్యం మెరుగుపడుతుందనే భావిస్తు్న్నా’ అని నీటిలోకి దిగే ముందు ప్రొఫెసర్ జోసెఫ్ అభిప్రాయపడ్డారు.

ఇంతకు ముందు అధ్యయనాల్లో తేలిన అంశాలను మరింత మెరుగుపర్చడమే లక్ష్యంగా ఈ పరిశోధన చేపట్టారు. శరీర కణాలు ఒత్తిడికి గురి కావడం ద్వారా మనుషుల దీర్ఘాయువు పెరుగుతుందని, వయసుతోపాటు వచ్చే వ్యాధులకు చెక్ పెట్టొచ్చని ఇప్పటి వరకూ చేపట్టిన పరిశోధనల్లో తేలింది.

ప్రొఫెసర్ జోసెఫ్ సౌత్ ఫ్లోరిడా యూనివర్సిటీలో చేరడానికి ముందు 28 ఏళ్లపాటు అమెరికా నేవీలో శాచ్యురేషన్ డైవింగ్ ఆఫీసర్‌గా పని చేశారు. 2012లో ఆయన నేవీ నుంచి రిటైరయ్యారు. వంద రోజుల ప్రయోగం సందర్భంగా ఆయన అనేక కొత్త టెక్నాలజీలను పరీక్షించనున్నారు. మానవ శరీరం అనారోగ్యానికి లోనైన విషయాన్ని గుర్తించి మందులు ఏవైనా అవసరమా అని నిర్ధారించే టూల్‌ను జోసెఫ్ కొలీగ్ ఒకరు రూపొందించారు. దాన్ని కూడా ఆయన పరీక్షించనున్నారు.

‘మిలటరీలోని చాలా మంది నా సోదరులు, సోదరీమణులు మెదడు గాయాలతో బాధపడ్డారు. వారికి సాయం చేయాలో నేర్చుకోవాలని అనుకున్నాను. హైపర్‌బారిక్ ప్రెజర్ (నీటి అడుగున కలిగే ఒత్తిడి) మస్తిష్కంలోకి రక్త సరఫరాను పెంచుతుందని తెలుసు. మెదడు గాయాలకు చికిత్స అందించడానికి ఇది ఉపయోగపడుతుందని అనుకుంటున్నాను’ అని ఆయన తెలిపారు. సముద్ర జలాల్లోని ఇప్పటి గుర్తించి జీవుల ద్వారా అనేక వ్యాధులను నయం చేయొచ్చని ఆయన నమ్ముతున్నారు.