ఆరు నెలల తర్వాత భారీగా కరోనా కొత్త కేసులు నమోదు,,,ఏప్రిల్ 10, 11 తేదీల్లో దేశవ్యాప్తంగా మాక్ డ్రిల్

చాపకిందనీరులా  గత కొన్ని రోజులుగా దేశంలోని చాలా చోట్ల కరోనా వైరస్ కేసులు పెరగడంతో పలు రాష్ట్రాలు మరోసారి తప్పనిసరి మాస్క్ సహా కరోనా నిబంధనలు అమలుకు సిద్ధమయ్యాయి. అలాగే, ప్రజలు ముందుజాగ్రత్తలు పాటించాలని కొన్ని రాష్ట్రాలు సూచనలు చేస్తున్నాయి. దేశంలో కరోనా పరిస్థితులపై సమీక్షా సమావేశం నిర్వహించిన కేంద్ర ఆరోగ్య మంత్రి మనుసుఖ్ మాండవీయా... ఆరోగ్య మౌలిక సౌకర్యాల సన్నద్ధతపై సమీక్షించాలని రాష్ట్రాలకు సూచించారు. దేశవ్యాప్తంగా సోమ, మంగళవారాలు ప్రభుత్వ, ప్రయివేట్ ఆస్పత్రుల్లో కోవిడ్ సన్నద్ధతపై మాక్ డ్రిల్ నిర్వహిస్తున్నారు.

దేశంలో ప్రస్తుతం కరోనా కేసులు పెరుగుదల వెనుక ఒమిక్రాన్ సబ్-వేరియంట్ ఎక్స్‌బీబీ1.16 కారణంగా భావిస్తున్నారు. అయితే, ఉప-వేరియంట్లు అంత ప్రమాదకరం కాదని నిపుణులు అభిప్రాయపడుతున్నారు. అయితే, ముందస్తు జాగ్రత్తలు పాటించడం వల్ల కొత్త వేరియంట్ల ముప్పు నుంచి తప్పించుకోవచ్చని అంటున్నారు. ఈ నేపథ్యంలో హరియాణా, కేరళ, ఢిల్లీ వంటి రాష్ట్రాలు మాస్క్ నిబంధనలు మళ్లీ అమల్లోకి తీసుకొచ్చాయి.

బహిరంగ ప్రదేశాల్లో మాస్క్ తప్పనిసరి చేస్తూ హరియాణా ప్రభుత్వం శనివారం ఉత్తర్వులు జారీచేసింది. ప్రజలు కోవిడ్ నిబంధనలు పాటించాలని హరియాణ ఆరోగ్య శాఖ విజ్ఞ‌ప్తి చేసింది. రాష్ట్రవ్యాప్తంగా జిల్లా, పంచాయతీలకు కోవిడ్ నిబంధనల అమలుపై సూచనలు చేసింది. అటు, కేరళ ప్రభుత్వం కూడా గర్భిణి మహిళలు, వృద్ధులు, దీర్ఘకాలిక అనారోగ్యంతో బాధపడుతోన్నవారు తప్పనిసరిగా మాస్క్ ధరించాలని సూచించింది.

రాష్ట్రంలో కరోనా పరిస్థితులపై అత్యుతన్న స్థాయి సమావేశం నిర్వహించిన కర్ణాటక ఆరోగ్య మంత్రి వీణా జార్జ్.. కరోనా మరణాల్లో ఎక్కువ శాతం 60 ఏళ్లు దాటినవారు, దీర్ఘకాలిక అనారోగ్యంతో బాధపడుతున్న బాధితులే ఉన్నారని అన్నారు. ఆస్పత్రుల్లో తగినంత ఆక్సిజన్ నిల్వలు ఉండేలా చూడాలని ఆమె స్పష్టం చేశారు.

పుదుచ్చేరిలోనూ బహిరంగ ప్రదేశాల్లో మాస్క్ తప్పనిసరి చేస్తూ ఉత్తర్వులు జారీచేసింది. ఇవి తక్షణమే అమల్లోకి వస్తుందని తెలిపింది. హాస్పిటల్స్, హోటల్స్, రెస్టారెంట్లు, మద్యం దుకాణాలు, ప్రభుత్వం కార్యాలయాలు, సినిమా థియేటర్లలో తప్పనిసరిగా మాస్క్‌లు ధరించాలని ప్రకటనలో తెలిపింది. ఉత్తర్ ప్రదేశ్ ప్రభుత్వం అన్ని విమానాశ్రయాలలో అంతర్జాతీయ ప్రయాణీకులను పరీక్షించేలా చూడాలని అధికారులను ఆదేశిస్తూ అధిక ప్రాధాన్యత ఆదేశాన్ని జారీ చేసింది. పాజిటివ్ వచ్చినవారి నమూనాలను జన్యు పరీక్షలకు పంపాలని ప్రభుత్వం ఉత్తర్వులు జారీచేసింది. అటు, ఢిల్లీ హాస్పిటల్స్, పాలీక్లినిక్స్, డిస్పెన్సరీల్లో పరీక్షలను పెంచాలని కేజ్రీవాల్ సర్కారు ఆదేశించింది.