కుటుంబ పరువుపోతుందనే నాడు చెప్పలేదు: వై.వీ.సుబ్బారెడ్డి

వైఎస్‌ వివేకానందరెడ్డి వివాహేతర సంబంధాల గురించి చెప్తే వైఎస్ కుటుంబ పరువు పోతుందని అప్పట్లో చెప్పలేదని వైసీపీ ప్రధాన కార్యదర్శి, తిరుమల తిరుపతి దేవస్థానం (టీటీడీ) ఛైర్మన్ వైవీ సుబ్బారెడ్డి అన్నారు. కానీ, ఇప్పుడు ఈ విషయాలు బయటకు చెప్పక తప్పని పరిస్థితులు వచ్చాయన్నారు. ఈ కేసులో వైఎస్‌ వివేకానందరెడ్డి కుమార్తె సునీత భర్త రాజశేఖరరెడ్డి పాత్రపై కూడా విచారణ జరగాలని డిమాండ్‌ చేశారు.

ఎంపీ అవినాష్ రెడ్డి విషయంలో విచారణ జరుగుతోంది.. ఈ కేసులో చట్టం తన పని తాను చేసుకు పోతుందని వైవీ సుబ్బారెడ్డి అన్నారు. ఈ కేసు అన్ని కోణాల్లో విచారణ జరగాలని తాము కోరుంటున్నామని చెప్పారు. కానీ, సెంట్రల్ బ్యూరో ఆఫ్ ఇన్వెస్టిగేషన్ (సీబీఐ) విచారణ పక్షపాత ధోరణితో సాగుతోందనే అనుమానాలు ఉన్నాయన్నారు. విచారణ వ్యక్తిగతంగా టార్గెట్‌ చేసేలా ఉండకూడదని పేర్కొన్నారు సీబీఐ విచారణ పక్షపాత ధోరణిలో జరుగుతున్నా.. అంతిమంగా తమకే న్యాయం జరుగుతుందని భావిస్తున్నట్లు వైవీ సుబ్బారెడ్డి తెలిపారు.

ఇక, ముఖ్యమంత్రి వైఎస్‌ జగన్మోహన్‌రెడ్డిపై కొన్ని పత్రికలు బురద జల్లడమే పనిగా పెట్టుకున్నాయని వైవీ సుబ్బారెడ్డి ఆరోపించారు. చివరికి, దేవుళ్లపై కూడా తప్పుడు ప్రచారం చేస్తున్నారని దుయ్యబట్టారు. విజయ్‌కుమార్‌స్వామి విజయవాడకు ఎవరి విమానంలో వచ్చారని ప్రశ్నించారు. రామోజీరావు వియ్యంకుడి విమానంలోనే ఆయన విజయవాడ వచ్చారని.. వాళ్ల కార్యక్రమం కోసమే స్వామి వచ్చారని చెప్పారు. విజయ్‌కుమార్‌ స్వామిని తెచ్చుకున్నది వాళ్లేనని.. మీ మార్గదర్శి కేసు నుంచి బయట వేయించుకునేందుకు తెచ్చుకున్నారా అని వైవీ సుబ్బారెడ్డి ప్రశ్నించారు.

మీరు చేస్తే దైవాశీస్సులు? మేం చేస్తే లాబీయింగా అని వైవీ సుబ్బారెడ్డి ప్రశ్నించారు. ఈ విషయంలో తోక పత్రికలు తప్పుడు వార్తలు రాస్తున్నాయని మండిపడ్డారు. స్వామీజీ ఆధ్వర్యంలో రామోజీరావు బంధువుల ఇంట్లో గృహ ప్రవేశం జరగలేదా అని ప్రశ్నించారు. 2007 నుంచి విజయ్‌కుమార్‌ స్వామిని కలుస్తూ ఉంటానని.. కానీ, చంద్రబాబు అనుకూల మీడియాలో అసత్య కథనాలు రాయడం దారుణమన్నారు. స్వామీజీలు, దేవుళ్ల విషయంలో కూడా రాజకీయ లబ్ధి కోసం నీచ రాజకీయాలకు పాల్పడవద్దని సుబ్బారెడ్డి హితవు పలికారు.