వై.ఎస్.అవినాష్ రెడ్డికిి బెయిల్ ఇవ్వోద్దు...కోర్టును కోరిన సీబీఐ తరఫు న్యాయవాదులు

ముఖ్యమంత్రి వైఎస్ జగన్మోహన్ రెడ్డి బాబాయ్, మాజీ మంత్రి వైఎస్ వివేకానందరెడ్డి హత్య కేసులో ఆరోపణలు ఎదుర్కొంటున్న కడప వైఎస్సార్ కాంగ్రెస్ పార్టీ ఎంపీ వైఎస్ అవినాష్‌రెడ్డి ముందస్తు బెయిల్ పిటిషన్‌పై మంగళవారం తెలంగాణ హైకోర్టులో విచారణ జరిగింది. ఈ సందర్భంగా సీబీఐ తరఫు న్యాయవాదులు తమ వాదనలు వినిపించారు. వైఎస్ అవినాష్‌ నుంచి మరింత సమాచారం సేకరించాల్సి ఉందని.. ఆయనకు ముందస్తు బెయిల్‌ ఇవ్వొద్దని హైకోర్టును కోరారు.

వైఎస్ వివేకా హత్య కుట్ర వైఎస్ అవినాష్‌రెడ్డికి ముందే తెలుసు అని సీబీఐ అధికారులు కోర్టు దృష్టికి తీసుకొచ్చారు. గత నాలుగు విచారణల్లో అవినాష్ రెడ్డి ఏ మాత్రం సహకరించలేదని పేర్కొన్నారు. వివేకా హత్యకు సంబంధించిన దర్యాప్తులో శాస్త్రీయ, సాంకేతిక ఆధారాలను సేకరించామని.. హత్యకు ముందు, ఆ తర్వాత వైఎస్ అవినాష్‌ రెడ్డి ఇంట్లో సునీల్‌ యాదవ్‌, ఉదయ్‌ ఉన్నారని తెలిపారు. వివేకా హత్యను గుండెపోటుగా ఎందుకు చిత్రీకరించారో తెలియాల్సి ఉందన్నారు.

వివేకా హత్య జరిగిన రోజు ఉదయం వైఎస్ అవినాష్‌రెడ్డి వైఎస్సార్ జిల్లాలోని జమ్మలమడుగుకు దగ్గర్లో ఉన్నట్లు చెప్పారని.. మొబైల్‌ సిగ్నల్స్‌ చూస్తే మాత్రం ఆయన ఇంట్లోనే ఉన్నట్లు తెలుస్తోందని సీబీఐ అధికారులు తెలిపారు. హత్య జరిగిన రోజు రాత్రంతా తన ఫోన్‌ను అసాధారణంగా వినియోగించినట్లు గుర్తించామని సీబీఐ తరఫు న్యాయవాదులు కోర్టుకు తెలిపారు. అనంతరం విచారణను హైకోర్టు మధ్యాహ్నం 2.30 గంటలకు వాయిదా వేసింది.

ఇదిలావుంటే  వైఎస్ వివేకా హత్య కేసులో విచారణకు రావాలంటూ ఆదివారం సాయంత్రం సీబీఐ మరోసారి నోటీసులు ఇచ్చిన నేపథ్యంలో ఎంపీ అవినాష్‌రెడ్డి సోమవారం తెలంగాణ హైకోర్టును ఆశ్రయించిన విషయం తెలిసిందే. ఈ పిటిషన్‌ తేలే వరకు మధ్యంతర ముందస్తు బెయిల్‌ ఇవ్వాలని న్యాయస్థానాన్ని ఆయన కోరారు. వైఎస్ వివేకా హత్యతో తనకు ఎలాంటి సంబంధం లేదని.. దస్తగిరి వాంగ్మూలం మేరకు తనను ఇరికించాలని సీబీఐ చూస్తోందని ఎంపీ అవినాష్ రెడ్డి ఆరోపించారు. తనను ఈ కేసులో నిందితుడిగా చేర్చి అరెస్టు చేసే ఉద్దేశంలో సీబీఐ ఉందని అనుమానం వ్యక్తం చేశారు.

సీబీఐ ఆశ్చర్యకరంగా గూగుల్‌ టేకవుట్‌ డేటాను తెరపైకి తెచ్చిందని.. వాస్తవానికి, ఒక వ్యక్తి ఎక్కడున్నారో గూగుల్‌ టేకవుట్‌ డేటా చెప్పలేదని అవినాష్ రెడ్డి అన్నారు. నాలుగేళ్లలో అనేక పరిణామాల తర్వాత తనను లక్ష్యంగా చేసుకున్నారని.. తనను అరెస్టు చేయకుండా మధ్యంతర ఉత్తర్వులు ఇవ్వాలని కోరారు. ఒక వేళ అరెస్టు చేస్తే బెయిల్‌పై విడుదల చేసేలా సీబీఐని ఆదేశించాలని బెయిల్‌ పిటిషన్‌పై వైఎస్ అవినాష్‌రెడ్డి అభ్యర్థించారు.