ఇంటర్నేట్ ను షేక్ చేస్తున్న ఆ సైన్ బోర్డ్

డెన్మార్క్‌లో ఓ కేఫ్ నిర్వాహకులు భర్తల కోసం డే కేర్ సెంటర్ పెడుతూ ఏర్పాటు చేసిన సైన్ బోర్డు ఇప్పుడు ఇంటర్నెట్‌ను షేక్ చేస్తోంది. 

 మహిళలు షాపింగ్‌కు వెళ్లినప్పుడు తమకు కొంత సమయం కావాలని భావిస్తారు. ఒకవేళ వాళ్లు తమ భర్తతో కలిసి ఉంటే, షాపింగ్‌ను హడావిడిగా చేసుకొని రావాల్సి వస్తోందట. ఈ నేపథ్యంలో డెన్మార్క్‌లోని ఒక కేఫ్ వారు హస్ బెడ్డే కేర్ సెంటర్ పెట్టారు. ‘మీ భర్తను మాకు అప్పగించండి. ఇక మీరు హాయిగా షాపింగ్ చేసుకోండి’ అంటూ చమత్కారమైన సైన్‌బోర్డును ఏర్పాటు చేశారు. ‘మేము మీ కోసం ఆయణ్ని బాగా చూసుకుంటాము. మీరు అతడి డ్రింక్స్‌కు త్రమే చెల్లించాల్సి ఉంటుంది’ అని రాశారు.

కోపెన్‌హాగన్‌లోని గ్రీన్ టవర్స్ వద్ద ఏర్పాటు చేసిన ఈ సైన్‌బోర్డ్ సోషల్ మీడియాలో వైరల్‌గా మారింది. నెటిజన్లు దీనిపై ఫన్నీ కామెంట్లు చేస్తున్నారు. వామ్మో, సరికొత్త ఐడియా అంటూ ప్రశంసలు కురిపించేవారూ లేకపోలేదు!  సోషల్ మీడియాలో ఆసక్తికర అంశాలపై తనదైన శైలిలో స్పందించే ప్రముఖ వ్యాపారవేత్త ఆనంద్ మహీంద్రాను సైతం ఈ సైన్‌బోర్డు ఆకట్టుకుంది. దీనిపై ఆయన స్పందిస్తూ ‘ఇన్నోవేషన్ అంటే.. కేవలం కొత్త ఉత్పత్తులను సృష్టించడం మాత్రమే కాదు. ఇప్పటికే ఉన్న ఉత్పత్తుల కోసం ఇలా పూర్తిగా కొత్త వినియోగ-కేసులను సృష్టించడం తెలివైన ఆలోచన’ అని పేర్కొన్నారు.

‘భర్తలకు డే కేర్ సెంటర్లు అవసరం లేదు. ఇంట్లో ఎవరూ లేకుంటే వాళ్లు హాయిగా ఉంటారు’ అంటూ ఈ హజ్బండ్ కేర్ సెంటర్ గురించి ఓ నెటిజన్ చేసిన కామెంట్ నవ్వులు పూయిస్తోంది. ‘ఇది కేవలం ఆవిష్కరణ కాదు. ఈ ఆవిష్కరణ మరో స్థాయికి తీసుకెళ్లింది. ఇది తెలివైన వ్యాపార సూత్రం’ అంటూ మరొక నెటిజన్ రాసుకొచ్చారు.

‘క్రేజీ ఇన్నోవేషన్. అయితే, ఎంత మంది మహిళలు తమ భర్తలను ఇక్కడ వదిలివేస్తారో చూడాలి. అయితే, లోపల ఏం చేస్తారో తెలుసుకోవడం కూడా ముఖ్యం’ అంటూ మరో నెటిజన్ కామెంట్ చేశాడు. ‘హా హ్మ.. ఎంత వినూత్నమైన మార్కెటింగ్ సార్’ అంటూ పలువురు నెటిజన్లు కామెంట్ చేశారు.

తాము ఏర్పాటు చేసిన సైన్‌బోర్డు వైరల్ అవుతున్న విషయంపై కేఫ్ నిర్వాహకులు స్పందించారు. తమ కేఫ్‌లో అవుట్‌డోర్ సిట్టింగ్ ఏరియా ఉందని అక్కడ ఆల్కహాల్, స్నాక్స్ సఫ్లై చేస్తామని తెలిపారు. మద్యం తాగని వాళ్ల కోసం సాఫ్ట్ డ్రింక్స్ అందుబాటులో ఉంటాయని తెలిపారు. ‘భర్తలు ఇక్కడ తమ కాళ్లు చాపుకొని కూర్చుని హాయిగా విశ్రాంతి తీసుకుంటారు. వారి భార్య, పిల్లలు ఏ ఇబ్బందీ లేకుండా షాపింగ్ చేసుకుంటారు’ అని కేఫ్‌ నిర్వాహకులు అన్నారు. ఏదేమైనా.. తమ కేఫ్‌కు ప్రచారం కల్పించుకునేందుకు ఇదొక ఇన్నోవేటివ్ ఐడియానే కదూ..! ఇలాంటి ‘భర్తల కేర్ సెంటర్’ మన వాళ్లకూ అవసరమేనంటారా?