మేయర్ హిస్సామ్ హుసేన్ మూడో పెళ్లి,,,16 ఏళ్ల బాలికతో వివాహం

ఓ నగర మేయర్ 65 ఏళ్ల వయసులో 16 ఏళ్ల బాలికను వివాహం చేసుకోవడంపై దుమారం రేగుతోంది. పదహారేళ్ల అమ్మాయిని పెళ్లి చేసుకున్న మేయర్.. ఆమె తల్లికి స్థానిక ప్రభుత్వంలో ఉన్నత పదవిని కట్టబెట్టాడు. దక్షిణ బ్రెజిల్‌ పరానా రాష్ట్రంలోని అరౌకారియా నగర మేయర్‌ హిస్సామ్‌ హుసేన్‌ దేహైని 65 ఏళ్ల వయసులో వివాహం చేసుకున్నారు. అయితే, ఆమె వయసు 16 ఏళ్లు కావడం.. స్థానిక ప్రభుత్వంలో సాంస్కృతిక, పర్యటకశాఖ కార్యదర్శిగా ఆమె తల్లిని నియమించడంతో తీవ్ర విమర్శలు చెలరేగుతున్నాయి. మేయర్‌పై వచ్చిన అవినీతి, బంధుప్రీతి ఆరోపణలపై దర్యాప్తు సంస్థలు విచారణ చేపట్టాయి.

అరౌకారియా నగర మేయర్ హిసామ్ హుస్సేన్ దెహైనీ (65).. మాజీ చైల్డ్ బ్యూటీ క్వీన్ కౌనే రోడే కామార్గోను గత నెలలో వివాహం చేసుకున్నారు. బ్రెజిల్‌ చట్టాల ప్రకారం 16 ఏళ్లు దాటిన అమ్మాయిలు తల్లిదండ్రుల అనుమతితో ఎవరినైనా వివాహం చేసుకోవచ్చు. దీంతో ఆ అమ్మాయికి గత నెల 11న 16 ఏళ్లు పూర్తి కావడం.. ఆ మర్నాడే అంటే ఏప్రిల్ 12న ఈ పెళ్లి జరిగింది. ఇక, కామార్గో తల్లి విద్యాశాఖలో చిన్న ఉద్యోగం చేస్తోంది. ఆమె హోదా చిన్నది కావడం వల్ల పెళ్లైన తర్వాత దేహైని ఆమెకు ప్రమోషన్ ఇచ్చారు. సాంస్కృతిక, పర్యటకశాఖ కార్యదర్శిగా నియమించారు.

ఈ విషయాన్ని డిప్యూటీ మేయర్‌ సీమా బయటపెట్టడంతో కొత్త పెళ్లికొడుకు ఇప్పుడు ఇరుకున పడ్డారు. రాజకీయ దుమారం రేగడంతో ఆయన సిడాడానియా పార్టీకి రాజీనామా చేశారు. అయితే, దేహైనీ 2000 సంవత్సరంలో డ్రగ్స్ అక్రమరవాణాకు పాల్పడినట్టు పార్లమెంటరీ విచారణ కమిషన్ దీనికి సంబంధించిన ఆధారాలను చూపడంతో అరెస్ట్ చేసి 100 రోజుల పాటు జైళ్లో ఉంచారు.

అరౌకారియాకు రెండోసారి మేయర్‌గా కొనసాగుతోన్న దేహైనీ.. 2016 ఎన్నికల ప్రచారంలో తన కుటుంబం వ్యాపారంలో విజయం సాధించినందున ప్రజల సొమ్ముపై ఎప్పటికీ భారం పడదని ప్రగల్భాలు పలికారు. ఎన్నికల్లో గెలిచిన కొద్ది వారాల్లోనే తన భార్య, కుమార్తెలను కీలక స్థానాల్లో నియమించారు.

దేహైనీకి ఇది మూడో వివాహం. కొత్త భార్య పదహారేళ్ల పడుచు కావడంతో ఇంకా కాలేజీకి వెళ్తోంది. ఈ వివాహం గురించి ఆయన మాట్లాడుతూ.. ‘మేము సంతోషంగా ఉన్నాం.... తనకు సంతోషిన్నిస్తోంది.. నేను ఆమెకు మేలు చేస్తాను.. ఇద్దరం కలిసి హాయిగా ఉంటాం’ అని వ్యాఖ్యానించారు. కాగా, కొత్త పెళ్లికొడుకు తీరుపై తీవ్ర విమర్శలు వెల్లువెత్తుతున్నాయి.