అంబానీ, అదానీయే కాదు...మనదేశంలో చాలామంది బిలీనియర్లు ఉన్నారు

దేశంలో అంబానీ, అదానీ వంటి కుబేరుల గురించి తెలియని వారు దాదాపు ఉండరు. అయితే వారు ఇద్దరే కాదు మన దేశంలో చాలా మంది బిలియనీర్లు ఉన్నారు. కొన్ని అభివృద్ధి చెందిన దేశాలను సైతం ఈ కేటగిరీలో భారత్ వెనక్కి నెట్టింది. వరల్డ్ ఆఫ్ స్టాటిస్టిక్స్ డేటా ప్రకారం చూసుకుంటే భారత్‌లో ప్రస్తుతం 169 మంది బిలియనీర్లు ఉన్నారు. ప్రపంచం వ్యాప్తంగా చూసుకుంటే మన దేశం మూడో స్థానంలో నిలుస్తోంది. ఈ జాబితాలో అమెరికా 735 మంది బిలియనీర్లతో తొలి స్థానంలో ఉండగా.. రెండో స్థానంలో చైనా 495 మంది బిలియనీర్లను కలిగి ఉంది.

అభివృద్ధి చెందిన దేశాలైన జర్మనీ, ఇటలీ, కెనడా, యూకే, ఆస్ట్రేలియా, ఫ్రాన్స్, స్విట్జర్లాండ్, జపాన్ దేశాలు ఈ లిస్ట్‌లో భారత్‌ కంటే వెనుకే ఉన్నాయి. ఎక్కువ మంది బిలియనీర్లు ఉన్న 15 దేశాల జాబితాలో చూసుకుంటే జపాన్ కేవలం 40 మందితో చివరి స్థానానికి పరిమితం కావడం గమనార్హం. రష్యాలో 105 మంది, జర్మనీలో 126 మంది, భారత్‌లో 169 మంది చైనాలో 495 మంది, అమెరికాలో 735 మందితో ఈ దేశాలు మాత్రమే వంద మందికిపైగా బిలియనీర్లు ఉన్న దేశాలుగా నిలిచాయి. ఫ్రాన్స్‌కు చెందిన బెర్నార్డ్ ఆర్నాల్ట్ అండ్ ఫ్యామిలీ ప్రస్తుతం 236 బిలియన్ డాలర్లతో ప్రపంచంలోనే అత్యంత ధనవంతుడిగా నిలిచారు.

ఫోర్బ్స్ బిలియనీర్ల జాబితా-2023 ప్రకారం రిలయన్స్ ఇండస్ట్రీస్ అధినేత ముకేశ్ అంబానీ భారత రిచెస్ట్ పర్సన్‌గా నిలిచారు. ఆయన సంపద 87 బిలియన్ డాలర్లుగా ఉంది. ఆ తర్వాత గౌతమ్ అదానీ 48.3 బిలియన్ డాలర్లతో రెండో స్థానంలో ఉన్నారు. ఆ తర్వాతి స్థానాల్లో హెచ్‌సీఎల్ అధినేత శివ్ నాడారా 24.5 బిలియన్ డాలర్లు, సైరస్ పూనావాలా 22.8 బిలియన్ డాలర్లు, సావిత్రి జిందాల్ అండ్ ఫ్యామిలీ 17.9 బిలియన్ డాలర్లు, లక్ష్మీ మిట్టల్ 16.9 బిలియన్ డాలర్లు, దిలిప్ సంగ్వి 16.2 బిలియన్ డాలర్లు, రాధాకిషన్ దమానీ 15.8 బిలియన్ డాలర్లు, కుమార్ బిర్లా 14.9 బిలియన్ డాలర్లు, ఉదయ కోటక్ 14.5బిలియన్ డాలర్లు, కుశాల్ పాల్ సింగ్ 9.9 బిలియన్ డాలర్లు, రవి జైపూరియా 9.9 బిలియన్ డాలర్లు కలిగి ఉన్నారు.

బిలియనీర్లు ఎక్కువగా ఉన్న భారత నగరాల జాబితాలో ముంబై తొలి స్థానంలో నిలిచింది. మొత్తం 169 మందిలో ఇక్కడే 66 మంది బిలియనీర్లు ఉండడం గమనార్హం. ఆ తర్వాత దేశ రాజధాని ఢిల్లీలో 39 మంది, బెంగళూరులో 21 మంది బిలియనీర్లు ఉన్నారు.