తాతయ్య అయిన ముకేశ్ అంబాని... వారి ఇంట వచ్చిన వారసురాలు

రిలయన్స్ ఇండస్ట్రీస్ అధినేత ముకేశ్‌ అంబానీ తాతయ్య అయ్యారు. వారి ఇంటికి వారసురాలు వచ్చింది. ఆయన పెద్ద కుమారుడు అకాశ్‌ అంబానీ దంపతులు మరోసారి తల్లిదండ్రులయ్యారు. ఆకాశ్ భార్య శ్లోకా బుధవారం ఇక్కడి ఓ ఆస్పత్రిలో పండంటి పాపకు జన్మినిచ్చారు. అంబానీ ఇంటికి వారసురాలు రావడంతో ఆ కుటుంబంలో సంతోషం వెల్లివిరిసింది. ఆకాశ్, శ్లోకాలకు 2019లో వివాహం జరగ్గా.. 2020లో తొలి సంతానంగా బాబు పుట్టిన విషయం తెలిసిందే. ఆ బాబుకు పృథ్వీ ఆకాశ్ అంబానీ అని పేరు పెట్టగా.. ప్రస్తుతం అతడికి రెండేళ్లు.

అకాశ్ దంపతులకు ఆడపిల్ల పుట్టిన విషయాన్ని అంబానీ కుటుంబానికి అత్యంత సన్నిహితుడు, రాజ్యసభ ఎంపీ పరిమల్ నథ్వానీ ట్విట్టర్ ద్వారా వెల్లడించారు. ‘ఆకాశ్, శ్లోకా అంబానీల లిటిల్ ప్రిన్సెస్ సంతోషకరమైన రాకకు హృదయపూర్వక శుభాకాంక్షలు.. ఈ అమూల్యమైన క్షణాలు మీ జీవితాలకు అపారమైన ఆనందాన్ని ప్రేమను తెస్తుంది’ అని ట్వీట్ చేశారు.

ఇదిలావుంటే ఏప్రిల్‌లో ముంబయి ముకేశ్‌ అంబానీ కల్చరల్‌ సెంటర్‌ ప్రారంభోత్సవంలో బేబీ బంప్‌తో శ్లోకా కనిపించారు. ఆ సమయంలో ఆమె రెండో బిడ్డకు జన్మనిస్తున్నట్టు ప్రకటించారు. వారం కిందట కుటుంబ సభ్యులతో కలిసి ముంబయిలోని సిద్ధి వినాయక ఆలయాన్ని దర్శించుకున్నారు. ప్రస్తుతం ఆకాశ్‌ అంబానీ రిలయన్స్‌ జియో ఛైర్మన్‌గా వ్యవహరిస్తున్నారు. అంబానీ కుటుంబ ఆధ్వర్యంలో నడుస్తోన్న పాఠశాలలో చదువుకున్న ఆకాశ్, శ్లోకాలు.. ఒకరినొకరు ఇష్టపడటంతో ఇరు కుటుంబాలకు పెళ్లికి అంగీకరించాయి. శ్లోకా తండ్రి ప్రముఖ వజ్రాల వ్యాపారి రుస్సెల్ మెహతా.

మరోవైపు, ముకేశ్ అంబానీ కుమార్తె ఈషా గతేడాది కవలలకు జన్మనిచ్చిన విషయం తెలిసిందే. ఆమె ప్రసవం అమెరికాలో జరిగింది. అక్కడ నుంచి భారత్‌కు తన కవలలతో వచ్చిన కుమార్తెకు అంబానీ కుటుంబం ఘనస్వాగతం పలికింది. ఈ సమయంలో దేశంలోని అన్ని ప్రముఖ ఆలయాల నుంచి వేద పండితులను రప్పించి, ప్రత్యేక పూజలు చేయించారు. అలాగే, 300 కిలోల బంగారాన్ని దానం చేసినట్టు ప్రచారం జరిగింది. అంతేకాదు, అభాగ్యుల కోసం ఐదు అనాథ శరణాలయాలను కూడా అంబానీ ప్రారంభించారు. ముకేశ్ అంబానీకి ముగ్గురు సంతానం పెద్ద కుమారుడు ఆకాశ్, కవలలు ఈశా, అనంత్.