తినడానికి ముద్ద కూడా సహించడం లేదు,,,ఎన్డీఆర్ఎఫ్ సిబ్బంది

ఏదో తెలియని భయం, భ్రాంతి. మానసిక అశాంతి. తినడానికి ముద్ద కూడా సహించడం లేదు. ఒడిశాలో ఘోర రైలు ప్రమాద ఘటన స్థలంలో సహాయక చర్యల్లో పాల్గొన్న జాతీయ విపత్తు నిర్వహణ దళం (ఎన్డీఆర్ఎఫ్) సిబ్బంది ఎదుర్కొంటున్న ఇబ్బందికర పరిస్థితి ఇది. శుక్రవారం రాత్రి జరిగిన ఘోర రైలు ప్రమాదం అనంతరం సుమారు తొమ్మిది ఎన్డీఆర్ఎఫ్ బృందాలు సహాయక చర్యల్లో పాల్గొన్నాయి. బాలాసోర్ వద్ద జరిగిన రైలు ప్రమాదంలో 288 మంది మరణించగా, వెయ్యి మందికి పైగా గాయపడిన తెలిసిందే. ప్రమాద స్థలిలో తెగిపడిన అవయవాలు, మాంసం ముద్దలు, రక్తపు మడుగుతో భీతావహంగా దృశ్యాలే సిబ్బంది కళ్ల ముందు ఇంకా కదలాడుతున్నాయి. ఆ ఘోర దృశ్యాలను నుంచి బయటపడి మామూలు స్థితికి రాలేకపోతున్నారు. దీంతో వీరికి నిపుణులు కౌన్సెలింగ్ ఇస్తున్నట్టు ఎన్డీఆర్ఎఫ్ డైరెక్టర్ జనరల్ అతుల్ కర్వాల్ వెల్లడించారు. ఢిల్లీలోని విజ్ఞాన్ భవన్‌లో విపత్తు ప్రతిస్పందన కెపాసిటీ బిల్డింగ్ వార్షిక సమావేశంలో అతుల్ కర్వాల్ మాట్లాడుతూ.. రైలు ప్రమాదంలో ఎన్డీఆర్ఎఫ్ సిబ్బంది సుమారు 44 మందిని కాపాడగా.. 121 మృతదేహాలను వెలికితీశారని చెప్పారు.

‘‘బాలాసోర్ రైలు ప్రమాదం సహాయక చర్యల్లో పాల్గొన్న సిబ్బందిని కలుసుకున్నాను. మంచినీళ్లు తాగుతున్న ప్రతిసారీ తనకు రక్తమే కనిపిస్తున్నట్టుందని ఓ జవాను చెప్పాడు. సహాయక చర్యల తర్వాత తనకు ఆకలి వేయడం లేదని మరో ఉద్యోగి తెలిపాడు. బృందాలు శారీరకంగా, మానసికంగా దృఢంగా ఉండాలి. ఇందుకోసం పలు కార్యక్రమాలు చేపట్టాం. కౌన్సెలింగ్ సెషన్లు నిర్వహిస్తున్నాం.. టర్కీ భూకంపం సహాయక కార్యక్రమాల్లో పాల్గొని తిరిగొచ్చిన సిబ్బందికీ ఇదే విధమైన కార్యక్రమాలు నిర్వహించాం’’ అని ఎన్డీఆర్ఎఫ్ డైరెక్టర్ జనరల్ అతుల్ కర్వాల్ తెలిపారు.

ప్రస్తుతం కౌన్సెలర్లు తాత్కాలిక ప్రాతిపదికన సేవలు అందిస్తున్నారని, శాశ్వత సలహాదారుని నియమించుకునే ప్రక్రియ మొదలుపెట్టామని డీజీ పేర్కొన్నారు. గత ఏడాది జనవరిలో ప్రత్యేక ఫిట్‌నెస్, వ్యాయమాలు ప్రారంభించిన తర్వాత అంచనా వేసిన 18,000 మంది సిబ్బందిలో 95 శాతం మంది ఫిట్‌గా ఉన్నారని, ఒక వ్యక్తి శారీరకంగా దృఢంగా ఉన్నారనడానికి సూచికగా 90 శాతం సగటు బీఎంఐ  25 కంటే తక్కువగా ఉందని కార్వాల్ చెప్పారు.

దేశవ్యాప్తంగా వరదలు, నీటి ప్రమాదాల వల్ల సంభవించే మరణాలను నివారించడానికి నేషనల్ క్రైమ్ రికార్డ్స్ బ్యూరో (NCRB) అందించిన మరణాలపై డేటాను అధ్యయనం చేసిన తర్వాత హీట్ మ్యాప్‌ను సిద్ధం చేసినట్లు డీజీ తెలిపారు. దేశంలో నీటిలో మునిగిపోవడం వల్ల ప్రతి సంవత్సరం సగటున 36,000 మంది విలువైన ప్రాణాలు కోల్పోతున్నారని NCRB ద్వారా మాకు సమాచారం అందింది. చాలా ప్రదేశాలలో ఈ సంఘటనలు స్నాన ఘాట్‌ల వద్ద జరుగుతున్నాయని, మూడింట రెండు వంతుల మరణాలు ఇవేనని ఆయన చెప్పారు. ఇటువంటి మరణాలను నివారించడానికి చర్యలు తీసుకుంటున్నామని స్పష్టం చేశారు.