ఒడిశా ప్రమాదంలో తన భర్త చనిపోయాడంటూ కపట నాటకం.,,,రూ. 20 లక్షల పరిహారం కాజేసేందుకు యత్నం

ఒడిశా రైలు ప్రమాద ఘటన మిగిల్చిన విషాదం యావత్ దేశాన్ని తీవ్ర దిగ్భ్రాంతికి గురిచేస్తే.. కొంత మంది దురాశపరులు చనిపోయిన వారి ఆత్మలు కూడా క్షోభించేలా ప్రవర్తిస్తూ మరింత గాయపరుస్తున్నారు. ప్రభుత్వం ఇచ్చే పరిహారం సొమ్ములు కాజేయడానికి ఎంతకైనా తెగిస్తున్నారు. ఇంకా ఎవరూ గుర్తించని మృతదేహాల వద్దకు వచ్చి, అవి తమవారివేనంటూ లేని కన్నీళ్లను ఒలకబోస్తున్నారు. ఆదివారం (జూన్ 4) చోటుచేసుకున్న ఓ ఘటనతో ఒడిశా ప్రభుత్వ అధికారులు.. రైల్వే అధికారులను అప్రమత్తం చేశారు.

ఒడిశా రైలు ప్రమాదంలో మృతి చెందిన ప్రయాణికుల మృతదేహాలను భద్రపరిచిన బాలాసోర్‌లోని తాత్కాలిక శవాగారం వద్ద అధికారులు బిజీగా ఉన్నారు. కొంత మంది బాధితులు తీసుకొచ్చిన పత్రాలను పరిశీలిస్తున్నారు. ఇంతలో 40 ఏళ్ల ఓ మహిళ అక్కడికి వచ్చింది. తన పేరు గీతాంజలి దత్తా అని, తాను కటక్‌ నుంచి వచ్చానని తెలిపింది. జూన్ 2న ప్రమాదానికి గురైన కోరమాండల్ ఎక్స్‌ప్రెస్ రైల్లో తన భర్త ప్రయాణించాడని, అతడి ఆచూకీ తెలియడంలేదని అధికారులకు చెప్పింది.

అధికారులకు ఆమెకు కొన్ని ఫోటోలను చూపించి, అందులో ఆమె భర్త ఉన్నారేమో చూసుకోవాలని పోలీసులు సూచించారు. ఆమె కొన్ని ఫొటోలను చూసిన తర్వాత ఓ వ్యక్తి ఫొటో చూపిస్తూ.. అతడే తన భర్త అని చెప్పింది. అయితే, అలా చెప్తున్నప్పుడు ఆమె ముఖంలో ఎలాంటి విచారం లేకపోవడాన్ని ఓ అధికారి గుర్తించారు. ఆమె ప్రవర్తనా తీరుపై అనుమానం వచ్చి పక్కకు తీసుకెళ్లి విచారించారు. కటక్‌లో ఆమె ఎక్కడ ఉంటారో చిరునామా అడిగి తెలుసుకొని అక్కడి పోలీసులను అలర్ట్ చేశారు. కటక్‌ జిల్లాలోని బారంబాలో ఆమె భర్త బతికే ఉన్నారని.. అక్కడి పోలీసులు కాసేపటి తర్వాత చెప్పారు.

గీతాంజలిని అదుపులోకి తీసుకుని గట్టిగా మందలించడంతో.. మృతుల కుటుంబాలకు ప్రభుత్వం అందించే పరిహారం కోసం తాను అలా చేసినట్లు అంగీకరించింది. ఆమెను మందలించి వదిలేసిన పోలీసులు.. ఆ తర్వాత అధికారులను అప్రమత్తం చేశారు. అయితే, కథ ఇంతటితో ముగియలేదు. కటక్‌ వెళ్లిన తర్వాత గీతాంజలికి మరో చేదు అనుభవం ఎదురైంది. ఆమెపై ఆమె భర్త బిజయ్ దత్తా పోలీసులకు ఫిర్యాదు చేశాడు.

‘నేను చనిపోయినట్లు చిత్రీకరించి, ప్రజా ధనాన్ని కాజేసేందుకు ప్రయత్నించిన, మోసపూరిత చర్యకు పాల్పడిన నా భార్యపై కఠిన చర్యలు తీసుకోండి’ అంటూ బిజయ్ దత్తా తన ఫిర్యాదులో కోరారు. బిజయ్, గీతాంజలి గత 13 ఏళ్లుగా వేర్వేరుగా ఉంటున్నట్లు పోలీసుల విచారణలో తేలింది. భర్త ఫిర్యాదు చేసిన విషయం తెలిసి ఆమె పరారైంది. ఒడిశా ప్రమాదంలో మృతి చెందిన కుటుంబాలకు ఆ రాష్ట్ర ప్రభుత్వం రూ. 5 లక్షల పరిహారం ప్రకటించింది. ప్రధాని నరేంద్ర మోదీ రూ. 2 లక్షల పరిహారం ప్రకటించారు. మృతుల కుటుంబాలకు ఒక్కొక్కరికీ రూ. 10 లక్షల చొప్పున పరిహారం అందిస్తామని రైల్వే మంత్రిత్వ శాఖ ప్రకటించింది. ఈ సొమ్మును కాజేసేందుకు కుట్రపూరిత చర్యలకు పాల్పడే ముప్పు ఉన్నట్లు తాజా ఉదంతం బహిర్గతం చేసింది.

ఒడిశా రైలు దుర్ఘటనలో 280 మందికి పైగా ప్రయాణికులు మరణించారు. మృతి చెందిన వారిలో కొంతమందిని ఇప్పటికీ గుర్తించలేదు. ఈ పరిస్థితిని తమకు అనుకూలంగా మలచుకుని పరిహారం సొమ్ములు కాజేయడానికి కొంత మంది దుర్మార్గులు ప్రయత్నిస్తున్నారు. ఎవరూ గుర్తించని మృతదేహాలను తమ కుటుంబసభ్యులుగా నమ్మించి మోసం చేస్తున్నారు. ఈ నయా మోసం వెలుగులోకి రావడంతో అటు ఒడిశా ప్రభుత్వం అప్రమత్తమైంది. మోసపూరిత చర్యలకు పాల్పడుతున్న వారిపై కఠిన చర్యలు తీసుకోవాలని అధికారులకు ఆదేశాలు జారీ చేసింది.