పోస్ట్‌మార్టం కోసం తీసుకెళ్తుండగా ఆ చిన్నారి మళ్లీ బతికింది

మతిస్థిమితం లేని ఓ చిన్నారి కాల్వలో పడిపోయి ఎలాంటి చలనం లేకుండా నీటిపై నిర్జీవంగా కనిపించింది. దీంతో ఆ చిన్నారి చనిపోయిందని భావించిన పోలీసులు పోస్ట్‌మార్టం కోసం తీసుకెళ్లేందుకు సిద్ధమయ్యారు. కానీ, బాలిక కుటుంబసభ్యులు మాత్రం ఒక్కసారి ఆస్పత్రికి తీసుకెళ్లి వైద్యులకు చూపించాలని ప్రాధేయపడ్డారు. వారి అభ్యర్థన మేరకు ఆసుపత్రికి తీసుకెళ్లగా చిన్నారి మళ్లీ ఊపిరి తీసుకోవడం ప్రారంభించింది. అనూహ్యమైన ఈ ఘటన ఉత్తర్‌ ప్రదేశ్‌‌లోని మీర్జాపుర్‌ జిల్లాలో ఆదివారం చోటుచేసుకుంది.

వివరాల్లోకి వెళ్తే.. సంత్ నగర్ పోలీస్ స్టేషన్ పరిధిలోని కలాన్‌ హద్వా గ్రామానికి చెందిన భోళాకు రవీన అనే కుమార్తె ఉంది. మతిస్థిమితం లేని ఆ బాలిక.. ఆదివారం కనిపించకుండా పోయింది. చిన్నారి కోసం కుటుంబసభ్యులు సుమారు 2 గంటల పాటు వెతికినా ఆచూకీ లభించలేదు. చివరకు ఈ విషయం గురించి గ్రామ పంచాయతీ సభ్యుడు మనీశ్‌కు తెలియజేయడంతో ఆయన పోలీసులకు సమాచారం ఇచ్చారు. దీంతో గ్రామానికి చేరుకున్న పోలీసులు.. గాలింపు చర్యలు చేపట్టారు. స్థానికంగా ఉన్న సిర్సీ కాల్వలో బాలికను కనుగొన్నారు.

నీటిలో అచేతనంగా పడి ఉన్న బాలికను చూసి తల్లిదండ్రులు బోరున విలపించారు. ఆ చిన్నారి మృతిచెందినట్లుగా నిర్ధరించిన పోలీసులు.. పోస్ట్‌మార్టం కోసం తీసుకెళ్లేందుకు ప్రయత్నించారు. ఈ సమయంలో అడ్డుకున్న బాలిక కుటుంబసభ్యులు.. ఆమె మానసిక స్థితి గురించి వివరించారు. ఒకసారి ఆసుపత్రికి తీసుకెళ్లి వైద్యులకు చూపించాలని వేడుకున్నారు. వారు కోరినట్టుగానే స్థానికంగా ఉన్న పటెహ్రా ఆరోగ్య సంరక్షణ కేంద్రానికి పోలీసులు తరలించారు.

అక్కడ చికిత్స అందిస్తున్న సమయంలో బాలిక స్పృహలోకి వచ్చిందని డాక్టర్ గణేశ్‌ శంకర్‌ త్రిపాఠి తెలిపారు. ఆస్పత్రికి తీసుకొచ్చినప్పుడు ఆమె గుండె పనితీరు పరిశీలించగా.. సాధారణంగా ఉందని చెప్పారు. చికిత్స అనంతరం బాలిక పూర్తిగా కోలుకోవడంతో కుటుంబసభ్యుల్లో ఒక్కసారిగా సంతోషం వెల్లివిరిసింది. చనిపోయిందని భావించిన బాలిక తిరిగి ప్రాణం పోసుకోవడంతో ఆసుపత్రి సిబ్బంది, పోలీసులు ఆశ్చర్యానికి గురయ్యారు. మతిస్థిమితం లేకపోవడంతోనే ప్రమాదవశాత్తూ కాల్వలో పడిపోయి ఉంటుందని భావిస్తున్నారు.