కిడ్నాప్ ఎపిసోడ్ తర్వాత పోలీసులు దూకుడు,,,రౌడీషీటర్లకు కౌన్సిలింగ్ ఇచ్చారు

రౌడీ షీటర్లపై తాజాగా విశాఖ నగర పోలీసులు నజర్ పెట్టారు. ఇదిలావుంటే విశాఖలో అధికార పార్టీ ఎంపీ కుటుంబ సభ్యుల కిడ్నాప్‌ ఎపిసోడ్ కలకలంరేపింది. ప్రశాంతంగా ఉన్న సాగరతీర నగరంలో ఇలాంటి ఘటన జరగడంతో జనాల్లో ఆందోళన మొదలయ్యింది. దీంతో ఇలాంటివి మళ్లీ పునరావృతం కాకుండా పోలీసులు చర్యలు ప్రారంభించారు. స్వయంగా సీపీ త్రివిక్రమ్ వర్మ రంగంలోకి దిగారు.. విశాఖలో రౌడీషీటర్లపై నిఘా పెంచారు. ప్రధానంగా నగరంలో భూ కబ్జాలు, సెటిల్‌మెంట్‌లు నిర్వహిస్తున్న రౌడీషీటర్లు, గ్యాంగులపై ఫోకస్ పెట్టారు. నేరుగా సీపీ యాక్షన్‌లోకి దిగడంతో సీన్ మారుతోంది. రెండు, మూడు రోజులుగా నగరంలోని రౌడీ షీటర్లకు సీపీ స్ట్రిక్ట్ వార్నింగ్ ఇస్తున్నారు. దీంతో చాలా మంది రౌడీలు బెంగుళూరు, ముంబైకు మకాం మార్చేశారు.

విశాఖలో 280 మంది A కేటగిరీ రౌడీ షీటర్‌లకు కౌన్సిలింగ్ ఇచ్చామని సీపీ తివిక్రమ్ వర్మ తెలిపారు. ఇప్పటికే రౌడీ షీటర్‌లకు స్ట్రిక్ట్ వార్నింగ్ ఇచ్చామన్నారు. ప్రతి పోలీస్‌స్టేషన్‌లో ప్రతి ఆదివారం రౌడీ షీటర్‌లకు కౌన్సిలింగ్ ఇస్తామన్నారు. బెయిల్‌పై బయటకి వచ్చిన వారు మళ్లీ నేరాలకి పాల్పడితే బెయిల్ క్యాన్సిల్ చేసేలా చూస్తామని చెప్పుకొచ్చారు. ఇప్పటికైనా రౌడీ షీటర్లు పద్దతి మార్చుకోకపోతే కఠిన చర్యలు తప్పవని హెచ్చరించారు.

అంతేకాదు విశాఖలో పోలీసులు రౌడీషీటర్లపై నిఘా పెంచారు. నగర పరిధిలో ఉన్న ప్రతీ పోలీస్‌స్టేషన్ పరిధిలో ఎస్‌హెచ్ ఓ స్థాయిలో కౌన్సిలింగ్ ఇస్తున్నారు. ఈ కిడ్నాప్ ఎపిసోడ్ తర్వాత పోలీసులు కూడా సీరియస్‌గా ఉన్నారు. విశాఖలో నేరాల నియంత్రణే లక్ష్యంగా ముందుతుకు సాగుతున్నారు. సీపీ ఎప్పటికప్పుడు పోలీస్ సిబ్బందికి దిశా నిర్దేశం చేస్తున్నారు. సీపీనే స్వయంగా ఆరిలోవ పోలీస్ స్టేషన్‌ను తనిఖీ చేశారు. పోలీస్ స్టేషన్ అధికారులు, సిబ్బంది పని తీరు సమీక్షించి, జనరల్ డైరీ, బ్లూ కొట్స్ పని తీరు, రౌడీ షీటర్లపై నిఘా ఉంచాలని, ఫిర్యాదు చేయడానికి వచ్చిన వారితో మర్యాదపూర్వకంగా ఉండాలన్నారు.

సీపీ త్రివిక్రమ్ వర్మ రెండు రోజుల క్రితం నగర ఉన్నతాధికారులు, అన్ని పోలీస్ స్టేషన్ల లా & ఆర్డర్, క్రైమ్ ఇన్స్పెక్టర్లతో, స్పెషల్ బ్రాంచ్, టాస్క్ ఫోర్స్ అధికారులతో కలిసి ప్రత్యేక సమావేశం ఏర్పాటు చేశారు. నగరంలో ప్రతీ పోలీస్ స్టేషన్ పరిధిలో యాక్టివ్ గా ఉన్న రౌడీ షీటర్లు, గంజాయి పెడ్లర్స్‌పై దృష్టి పెట్టాలని, నగర భద్రత, స్వేచ్ఛకు భంగం కలిగేలా ప్రవర్తించే వారిపై పీడీ యాక్ట్, నగర బహిష్కరణ చేసేలా చర్యలు తీసుకోవాలని సీపీ ఆదేశించారు.