మసాలా దోశకు సాంబార్ ఇవ్వలేదని రెస్టారెంట్‌కు ఫైన్

మనం ఏదైనా వస్తువు కొన్నపుడు వినియోగదారులుగా కొన్ని హక్కులు ఉంటాయి. ఏదైనా వస్తువుగానీ, సర్వీసును గానీ మనం డబ్బు పెట్టి కొన్నప్పుడు.. ఆ వస్తువు, సర్వీసుకు సంబంధించి పూర్తిగా బాధ్యత సంబంధిత దుకాణదారుడిదే ఉంటుంది. దుకాణదారుడు.. సర్వీసులోగానీ, వస్తువులో గానీ.. వినియోగదారుడి హక్కులకు భంగం కలిగిస్తే మనం ఫిర్యాదు చేసేందుకు వినియోగదారుల కమిషన్ కూడా ఉంటుంది. ఈ విషయం మనలో చాలా మందికి తెలియదు. కొంత మందికి తెలిసినా.. పట్టించుకోకుండా వదిలేస్తారు. కానీ ఒక కస్టమర్ మాత్రం.. పట్టుపట్టి తనకు రావాల్సిన దాని కోసం పోరాడాడు. చివరికి అందులో విజయం సాధించాడు.

మసాలా దోశకు సాంబార్ ఇవ్వకపోవడంతో ఓ రెస్టారెంట్ భారీ మూల్యం చెల్లించుకుంది. తమ రెస్టారెంట్‌కు వచ్చి మసాలా దోశ ఆర్డర్ చేసిన కస్టమర్‌కు దోశతోపాటు సాంబార్ ఇవ్వలేదు. దీంతో ఆ కస్టమర్ వినియోగదారుల కమిషన్‌ను ఆశ్రయించాడు. తాను డబ్బు పెట్టి టిఫిన్ కొన్నపుడు.. దానిలోకి చట్నీ, సాంబార్ ఇవ్వాల్సిన బాధ్యత తప్పకుండా హోటల్‌దేనని కస్టమర్ వాదించాడు. చివరికి ఆ కస్టమర్ వాదనే నెగ్గింది. దీంతో ఆ రెస్టారెంట్‌కు వినియోగదారుల కమిషన్ రూ. 3500 జరిమానా విధించింది. ఈ సంఘటన బిహార్‌లో చోటు చేసుకుంది.

బిహార్‌కు చెందిన మనీష్ పాఠక్ అనే న్యాయవాది.. తన తల్లితో కలిసి టిఫిన్ చేయడానికి ఒక రెస్టారెంట్‌కు వెళ్లారు. అక్కడ మసాలా దోశను పార్సిల్ తీసుకున్నారు. ఆ దోశకు రూ. 140 కూడా చెల్లించాడు. తీరా ఇంటికి వెళ్లి చూసే సరికి ఆ పార్సిల్‌లో కేవలం దోశ, చట్నీ మాత్రమే ఉంది. సాంబార్ లేకపోవడంతో మరుసటి రోజు మనీష్ పాఠక్ మళ్లీ అదే రెస్టారెంట్‌కు వెళ్లారు. తాను అంతకు ముందు రోజు తీసుకెళ్లిన మసాలా దోశ పార్సిల్‌లో చట్నీతో పాటు సాంబార్ ఇవ్వలేదని రెస్టారెంట్ యాజమాన్యాన్ని ప్రశ్నించారు. అయితే మనీష్ పాఠక్ ప్రశ్నకు సదరు రెస్టారెంట్ యాజమాన్యం నిర్లక్ష్యంగా సమాధానం ఇచ్చింది. ఇచ్చిన రూ. 140 తో ఏకంగా హోటల్ మొత్తం కొంటావా అని ఆ రెస్టారెంట్ మేనేజర్ హేళన చేశాడు. దీంతో తీవ్ర మనోవేదనకు గురైన మనీష్ పాఠక్.. తాను స్వయంగా న్యాయవాది కనుక రెస్టారెంట్ యాజమాన్యానికి నోటీసులు పంపించారు.

అయితే మనీష్ పాఠక్ పంపించిన నోటీసులకు సదరు రెస్టారెంట్ యాజమాన్యం స్పందించలేదు. దీంతో మరింత ఆగ్రహం చెందిన మనీష్ పాఠక్.. జిల్లా వినియోగదారుల కమిషన్‌ను ఆశ్రయించారు. దీనిపై జిల్లా వినియోగదారుల కమిషన్ సుదీర్ఘంగా విచారణ చేసింది. చివరకు 11 నెలల తర్వాత మసాలా దోశతోపాటు సాంబార్ ఇవ్వకపోవడం రెస్టారెంట్‌ తప్పిదమేనని ఆ కోర్టు నిర్ధారణకు వచ్చింది. పైగా ప్రశ్నించిన కస్టమర్‌పై అనుచితంగా ప్రవర్తించినట్లు గుర్తించింది. దీంతో ఆ రెస్టారెంట్‌కు రూ.3,500 జరిమానా విధించింది. ఇందులో కస్టమర్‌ను మానసికంగా, శారీరకంగా, ఆర్థికంగా ఇబ్బంది పెట్టినందుకు రూ.2000 చెల్లించాలని ఆదేశించింది. లిటిగేషన్‌ ఛార్జీల కింద మరో రూ. 1500 జరిమానా విధించింది. దీంతో మొత్తం ఫైన్ రూ. 3500 కు చేరుకుంది. ఈ జరిమానాను తీర్పు ఇచ్చిన 45 రోజుల్లోగా చెల్లించాలని ఆదేశించింది. లేని పక్షంలో రూ. 3500 కు 8 శాతం వడ్డీ కలిపి చెల్లించాల్సి ఉంటుందని స్పష్టం చేసింది.