సబ్సిడీపై టమాటా అమ్మకాలు ప్రారంభించిన కేంద్రం,,,,ఒకరికి రెండు కిలోలు మాత్రమే విక్రయం

ఆకాశాన్ని తాకిన టమాటా ధరల నుంచి ప్రజలకు ఉపశమనం కలిగించే చర్యలను కేంద్రం ప్రారంభించింది. టమాటాలు ఎక్కువగా పండిచే రాష్ట్రాల నుంచి కొనుగోలు చేసి.. వాటిని రాయితీపై శుక్రవారం నుంచి మార్కెట్‌లలో విక్రయిస్తోంది. ఢిల్లీ-ఎన్సీఆర్, లక్నో, పట్నా సహా దేశంలోని పెద్ద నగరాల్లో కిలో రూ.90కు అమ్మకం ప్రారంభించింది. ఒక్కో వ్యక్తికి రెండు కిలోల చొప్పున రాయితీపై అందజేస్తోంది. ఆంధ్రప్రదేశ్, కర్ణాటక, మహారాష్ట్రల నుంచి ఢిల్లీ మార్కెట్లకు ఇప్పటికే చేరుకున్నాయి. టమాటాలను రాయితీపై శుక్రవారం నుంచి అందజేస్తామని రెండు రోజుల కిందట అధికారులు వెల్లడించిన విషయం తెలిసిందే.

నొయిడాలో రజినిగంధ్ చౌక‌లోని ఎన్‌సీసీఎఫ్ ఆఫీస్‌ వద్ద, గ్రేటర్ నొయిడా, ఇతర ప్రాంతాల్లో మొబైల్ వ్యాన్‌లలో విక్రయించనున్నారు. దీంతో లక్నో, కాన్పూర్, జైపూర్ వంటి నగరాల్లో ఈ వారాంతంలో విక్రయించనున్నట్టు అధికారులు తెలిపారు. ఢిల్లీలోని 11 జిల్లాల్లో 20 మొబైల్ వ్యాన్స్, ఐదు కేంద్రాల్లో రాయితీపై టమాటాల విక్రయం ప్రారంభమైంది. మొదటి రోజు 17,000 కిలోల టమాటాలను విక్రయించనున్నట్టు ఎన్‌సీసీఎఫ్ ఛైర్మన్ విశాల్ సింగ్ తెలిపారు. అయితే, ఒక్కొక్కరికి రెండు కిలోల చొప్పున మాత్రమే విక్రయిస్తామని చెప్పారు.

కిలో రూ.120 నుంచి రూ.130కు కొనుగోలుచేస్తోన్న టమాటాలను.. రూ.90లకు విక్రయించాలని నిర్ణయించినట్టు ఎన్‌సీసీఎఫ్ ఎండీ అనిస్ జోసెఫ్ చంద్ర అన్నారు. ఈ నష్టాన్ని కేంద్ర ప్రభుత్వమే పూర్తిగా భరిస్తుందని చెప్పారు. శనివారం 20,000 కిలోల టమాటాల విక్రయానికి ప్లాన్ చేస్తున్న ఎన్‌సీసీఎఫ్.. క్రమంగా రోజుకూ 40,000 కిలోలు విక్రయించాలని భావిస్తోంది. టమాటా ధరలను తగ్గించడానికి తక్షణమే చర్యలు చేపట్టాలని, ఉత్పత్తి ఎక్కువ ఉన్న రాష్ట్రాల నుంచి కొనుగోలు చేయాలని నేషనల్ అగ్రికల్చరల్ కో ఆపరేటివ్ మార్కెట్ ఫెడరేషన్ - నాఫెడ్, నేషనల్ కో ఆపరేటివ్ కన్స్యూమర్ ఫెడరేషన్‌లకు కేంద్రం బుధవారం ఆదేశాలు జారీ చేసింది.

ఈ స్థాయిలో ధరలు పెరుగుదలకు వర్షాలే కారణమని ప్రభుత్వం చెబుతోంది. టామాటాలు సాపేక్షంగా తక్కువ రోజులు నిల్వ ఉంటాయి. జులై-ఆగస్టు, అక్టోబరు- నవంబర్ కాలాల్లో వీటి ఉత్పత్తి కూడా తక్కువగా ఉంటుంది. దేశంలో ఉత్పత్తి అయ్యే మొత్తం టమాటాల్లో 56-58 శాతం దక్షిణ, పశ్చిమ భారత దేశం నుంచే ఉంటాయి. ‘దక్షిణ, పశ్చిమ ప్రాంతాలు, మిగులు రాష్ట్రాలు కావడంతో ఉత్పత్తి సీజన్‌లను బట్టి ఇతర మార్కెట్‌లకు సరఫరా చేస్తాయి.. సీజన్లు కూడా ప్రాంతాల వారీగా విభిన్నంగా ఉంటాయి. గరిష్ట పంట కాలం డిసెంబర్ నుంచి ఫిబ్రవరి వరకు ఉంటుంది’ అని కేంద్ర ఆహార మంత్రిత్వ శాఖ పేర్కొంది.