రేపు నేతన్న నేస్తం లబ్దిదారులకు నిధుల విడుదల

ఏపీ ముఖ్యమంత్రి వైఎస్ జగన్ మోహన్ రెడ్డి ఈ నెల 21న 'వైఎస్సార్ నేతన్న నేస్తం' నిధులను తిరుపతి జిల్లా వెంకటగిరిలో విడుదల చేయనున్నారు. ఈ సందర్భంగా సీఎం పర్యటనకు సంబంధించిన ఏర్పాట్లను అధికారులు, మంత్రులు చేశారు. బటన్ నొక్కి నేతన్న నేస్తం పథకాన్ని ప్రారంభించి.. బహిరంగ సభలో లబ్ధిదారులను ఉద్దేశించి ప్రసంగిస్తారు. అర్హుల జాబితాలో ఈ పథకం కింద ఏటా రూ.24వేలు అకౌంట్‌లలో జమ చేస్తారు.

రాష్ట్రవ్యాప్తంగా చేనేతల కోసం వైఎస్సార్ నేతన్న నేస్తం పథకం తీసుకొచ్చింది జగన్ సర్కార్. అర్హత కలిగి సొంత మగ్గం ప్రతి చేనేత కుటుంబానికి ఏడాదికి రూ.24,000 చొప్పున ప్రభుత్వం ఆర్ధిక సాయాన్ని అందజేస్తున్న సంగతి తెలిసిందే. ఈ పథకం ద్వారా ఐదేళ్లలో ప్రతి లబ్ధిదారుడికి రూ .1.2 లక్షలు సాయం అందుతోంది. ఈ రాష్ట్రానికి చెందిన వ్యక్తి.. తప్పనిసరిగా వృత్తిపరంగా చేనేతగా ఉండాలి. దరఖాస్తు చేసుకున్న వ్యక్తి కచ్చితంగా చేనేత సంఘంలో నమోదు చేసుకోని ఉండాలనే నిబంధన ఉంది. అలాగే తప్పనిసరిగా దారిద్య్ర రేఖ దిగువన ఉండాలి.. మగ్గాలు ఎన్ని ఉన్నా సరే ఒక కుటుంబంలో ఒకరికే మాత్రం పథకం అందుతుంది.

అర్హత ఉన్నవాళ్లు రాష్ట్ర చేనేత సంఘం జారీ చేసిన రిజిస్ట్రేషన్ సర్టిఫికేట్.. అలాగే తెల్ల రేషన్ కార్డు/బీపీఎల్ సర్టిఫికెట్, బ్యాంక్ అకౌంట్ వివరాలు అందజేయాలి. దరఖాస్తు చేసుకునేవారికి అడ్రస్, ఆధార్ కార్డ్ లేకపోతే ఓటర్ ఐడి కార్డ్ వంటి గుర్తింపు ఉండాల్సిందే. ఇలా అన్ని జిల్లాల్లో సచివాలయాలు సిద్ధం చేసిన జాబితాను పరిశీలించి లబ్ధిదారులను గుర్తిస్తారు. ఆ తర్వాత వాలంటీర్లు, సచివాలయాల సిబ్బంది బయోమెట్రిక్ తీసుకుని నమోదు చేస్తారు. అనంతరం ఈ జాబితా ఎంపీడీఓ, లేని పక్షంలో ఎంసీలు పరిశీలించి చేనేత శాఖ ద్వారా లిస్ట్ ఫైనల్ చేస్తారు.

నేతన్న నేస్తం పథకానికి అర్హుల జాబితాలను సచివాలయాలలో పాటు అధికారిక వెబ్‌సైట్‌లో జాబితాలు ప్రదర్శించారు. అంతేకాదు చేనేతలకు సాయం అందించడంతో పాటు మరికొన్ని కీలక నిర్ణయాలు తీసుకుంది ఏపీ ప్రభుత్వం. నేతన్నల కోసం ఆప్కో వస్త్రాలకు ఆన్‌లైన్‌ ద్వారా అంతర్జాతీయ మార్కెటింగ్‌ కల్పిస్తోంది జగన్ సర్కార్. అందుకే నేతన్నల ఆదాయం పెంచేందుకు ఈ–కామర్స్‌ సంస్థలైన అమెజాన్, మింత్ర, ఫ్లిప్‌కార్ట్, గోకూప్, లూమ్‌ఫోక్స్, లాంటి దిగ్గజాలతో ప్రభుత్వం ఒప్పందాలు చేసుకుంది. ఇలా చేనేతల వస్త్రాలు ఆన్‌లైన్‌లో కూడా అందుబాటులోకి వస్తున్నాయి.