చిత్తూరు టమాటా రైతుకు లాభాల పంట,,,ఏకంగా రూ.3 కోట్లు వచ్చిందట

దేశవ్యాప్తంగా టమాటాల ధరలు ఆకాశాన్ని తాకాయి. సామాన్యుడు టమాటా దెబ్బకు వణికిపోతున్నాడు.. మిగిలిన కూరగాయల పరిస్థితి కూడా కాస్త పెరిగాయనే చెప్పాలి. టమాటా ధర మాత్రం కేజీ రూ.150 నుంచి రూ.180 వరకు కూడా పలికాయి. టమాటా ధర సామాన్యుడి జేబులు గుల్ల చేస్తుంటే.. రైతులకు మాత్రం భారీ లాభాలను తెచ్చి పెడుతున్నాయి. అనూహ్యంగా ధర పెరగడంతో కొందరి రైతుల జేబులు నింపుతున్నాయి. ఏకంగా రూ.కోట్లలో ఆదాయం వస్తోంది.. చిత్తూరు జిల్లాకు చెందిన ఓ రైతుకు భారీగా ఆదాయం వచ్చింది.

టమాటా అధికంగా సాగయ్యే చిత్తూరు జిల్లాకు చెందిన రైతుకు భారీగా లాభాలు దక్కాయి. కేవలం నెల రోజుల వ్యవధిలోనే రూ.3 కోట్ల ఆదాయం వచ్చింది. సోమల మండలం కరకమందకు చెందిన పి.చంద్రమౌళి, ఆయన తమ్ముడు మురళి, తల్లి రాజమ్మ ఉమ్మడిగా వ్యవసాయం చేస్తున్నారు. వీరికి సొంతూరు కరకమందలో 12 ఎకరాలు, పులిచెర్ల మండలం సువ్వారపువారిపల్లెలో 20 ఎకరాల పొలం ఉంది. ఈ కుటుంబం ఏళ్లుగా టమాటానే సాగు చేస్తోంది.

వేసవి తర్వాత టమాటా పంటకు మంచి ధర వస్తుందని ఈ కుటుంబం ముందుగానే అలర్ట్ అవుతోంది. గత రెండేళ్లుగా జూన్‌, జులైలో పంట చేతికి వచ్చేలా టమాటా సాగు చేస్తున్నారు. అంతేకాదు ఆధునిక సేద్య విధానాలు, నూతన వంగడాలతో పాటుగా మార్కెటింగ్‌పైనా రైతు చంద్రమౌళి ఎప్పటికప్పుడు తెలుసుకుంటున్నాడు. ఈ ఏడాది కూడా వేసవి తర్వాత వచ్చే టమాటా దిగుబడికి మంచి ధర వస్తుందని ముందే అంచనా వేశారు. ఏప్రిల్‌లో మొక్కలు నాటి జూన్‌ నాటికి దిగుబడి వచ్చేలా పంటను సాగు చేశారు.

22 ఎకరాల్లో ఏప్రిల్‌లో సాహూ రకం టమాటా మొక్కలు నాటారు. కట్టెసాగు విధానంలో మల్చింగ్‌, సూక్ష్మ సేద్య పద్ధతులు పాటించారు. జూన్‌ చివరిలో దిగుబడి మొదలవ్వగా.. దిగుబడిని జిల్లాకు దగ్గరగా ఉండే కర్ణాటకలోని కోలార్‌ మార్కెట్‌లో విక్రయించారు. మార్కెట్‌లో 15 కిలోల పెట్టె ధర రూ.వెయ్యి నుంచి రూ.1500 మధ్య పలికింది. చంద్రమౌళి 40వేల పెట్టెలు విక్రయించగా రూ.4 కోట్లు ఆదాయం వచ్చినట్లు రైతు చెబుతున్నారు. ఈ ఆదాయంలో 22 ఎకరాలకు పెట్టుబడి రూ.70 లక్షలు కాగా.. కమీషన్‌ రూ.20 లక్షలు, రవాణా ఖర్చులు రూ.10 లక్షలు పోనూ రూ.3 కోట్ల ఆదాయం వచ్చిందని రైతు అంటున్నారు.

ఒక్క చిత్తూరు మాత్రమే కాదు తెలంగాణలో కూడా మరో రైతుకు రూ.3 కోట్లు ఆదాయం వచ్చింది. మెదక్‌ జిల్లా కౌడిపల్లి మండలం మహ్మద్‌ నగర్‌ రైతు బాన్స్‌వాడ మహిపాల్‌రెడ్డి దంపతులు ఇప్పటికే రూ.2 కోట్ల విలువైన టమాటా పంటను విక్రయించామని.. మరో కోటి రూపాయల పంట కోతకు సిద్ధంగా ఉందని చెప్పారు. మహిపాల్‌రెడ్డి దంపతులను సీఎం కేసీఆర్‌ అభినందించారు.. రాష్ట్ర రైతులకు ఆయన ఆదర్శమన్నారు.