పాక్ యువకుడితో ప్రేమలో పడిన అంజు,,,తీవ్ర ఆగ్రహం వ్యక్తం చేసిన తల్లిదండ్రులు

ఫేస్‌బుక్‌లో పరిచయమైన యువకుడి కోసం పాకిస్థాన్‌కు వెళ్లిన భారతీయ మహిళ అంజు.. అతడ్ని పెళ్లిచేసుకున్న విషయం తెలిసిందే. దీనిపై అంజు తండ్రి గయ ప్రసాద్ థామస్ స్పందిస్తూ.. తన కుమార్తె చర్యలపై తీవ్ర విచారం వ్యక్తం చేశారు. అది చచ్చిపోవడమే మంచిదని ఆగ్రహం వ్యక్తం చేశారు. గయ ప్రసాద్ ఏఎన్ఐ వార్తా సంస్థతో మాట్లాడుతూ.. ఆమె తమ కుటుంబం దృష్టిలో చనిపోయిందని, తిరిగి భారత్‌కు వచ్చే హక్కులేదని అన్నారు. ఒకవేళ ఆమె వచ్చినా కఠిన శిక్ష ఎదుర్కోవాల్సి ఉంటుందని హెచ్చరించారు. ఆమె తప్పు చేసిందని, అలాంటి వాళ్లు శిక్షార్హులేనని పేర్కొన్నారు.

‘ఆమె తమ కుటుంబం దృష్టిలో చచ్చిపోయింది... తిరిగి భారత్‌కు వచ్చే హక్కులేదు... ఒకవేళ ఆమె వచ్చినా కఠిన శిక్ష ఎదుర్కోవాల్సి ఉంటుంది... ఆమె తప్పు చేసింది.. అలాంటి వాళ్లు శిక్షార్హులే’ అని ఆయన హెచ్చరించారు. రాజస్థాన్‌కు చెందిన అంజు పాకిస్థాన్ ఖైబర్ పఖ్తుంఖ్వా ప్రావిన్సులకు చెందిన నస్రుల్లా అనే యువకుడితో ఫేస్‌బుక్‌లో ఏర్పడిన పరిచయం ప్రేమగా మారడంతో అతడి కోసం భర్త, పిల్లలను వదిలిపెట్టి వెళ్లిపోయింది. పాక్ వీసా, అనుమతి పత్రాలతో ఆ దేశంలో అంజు అడుగుపెట్టిన ఆమె.. మంగళవారం స్థానిక కోర్టులో అతడ్ని పెళ్లాడింది. అంజుకు తన ఇద్దరు పిల్లలపై ఎలాంటి హక్కులేదని ఆయన అన్నారు.

‘భారత్ గౌరవప్రదమైన దేశం.. ఆమె చేసిన పనికి నేను సిగ్గుపడుతున్నాను.. ప్భుత్వానికి క్షమాపణలు చెప్పాను. తన ఇద్దరు పిల్లలను తీసుకెళ్లే హక్కు ఆమెకు లేదు..వారిని అసలు తాకనివ్వవద్దు’ అని ఆగ్రహం వ్యక్తం చేశారు. అంతేకాదు, ఆమె చర్య, పేరు మాకు కళంకం కలిగిస్తాయి కాబట్టి నా కుమార్తె పేరు నుంచి నా పేరును తీసివేయాలని ప్రభుత్వాన్ని అభ్యర్థించాను అని చెప్పారు. ‘తనతో మాకు ఎటువంటి సంబంధాలు లేవు.. ఆమె ఎప్పుడైతే భారత్ దాటిందో అప్పుడే అన్ని సంబంధాలు తెంచుకున్నాం... నా కుమార్తె ఇలాంటి పని చేస్తుందని కలలో కూడా ఊహించలేదు.. ఆమె చేసిన పనికి సిగ్గుతో తలదించుకోవాల్సి వచ్చింది’ అని ఆయన ఆవేదన చెందారు.