కుప్పంలో చర్చకు సిద్ధమా.. చంద్రబాబుకు మంత్రి పెద్దిరెడ్డి సవాల్

తెలుగు దేశం పార్టీ అధినేత నారా చంద్రబాబునాయుడుకు రాయలసీమ ప్రాంతంపై మమకారమే లేదని రాష్ట్ర విద్యుత్ శాఖ మంత్రి పెద్దిరెడ్డి రామచంద్రారెడ్డి వ్యాఖ్యానించారు. అందుకే రాయలసీమ ప్రాంతంలో టీడీపీకి మూడు ఎమ్మెల్యే స్థానాలు మాత్రమే దక్కాయని ఎద్దేవా చేశారు. ఈ మేరకు మంగళవారం తిరుపతిలో మంత్రి పెద్దిరెడ్డి రామచంద్రారెడ్డి మీడియాతో మాట్లాడుతూ.. చంద్రబాబుకు ఇన్నేళ్ల తర్వాత ఇప్పుడు రాయలసీమ గుర్తుకు వచ్చిందన్నారు.

రాయలసీమ ప్రాంతంపై చంద్రబాబుకు మమకారం లేదని.. అందుకే సీమలో ఆయనకు మూడు స్థానాలు మాత్రమే దక్కాయని పెద్దిరెడ్డి అన్నారు. ఇందులో ఒకటి చంద్రబాబు అయితే.. మరొకటి ఆయన బావమరిది (బాలకృష్ణ) అని ఎద్దేవా చేశారు. రాయలసీమ ప్రజలు చంద్రబాబును పూర్తిగా తిరస్కరించినా.. ఈ ప్రాంతానికి తాము అన్యాయం చేశామని అంటున్నాడని మండిపడ్డారు. రాయలసీమలో పర్యటన కాకుండా చర్చ జరిపితే బాగుంటుందని హితవు పలికారు. చంద్రబాబు, వైఎస్సార్ హయాంలో రాయలసీమ ప్రాంతంలో జరిగిన అభివృద్ధి, న్యాయంపై చర్చకు రావాలని సవాల్ విసిరారు.

సొంత నియోజకవర్గం కుప్పంకు కూడా నీళ్లు ఇవ్వని వ్యక్తి చంద్రబాబు అని మంత్రి పెద్దిరెడ్డి ఆరోపించారు. సొంత జిల్లా, సొంత నియోజకవర్గాన్ని పట్టించుకోని వ్యక్తి చంద్రబాబు అని.. త్వరలోనే కుప్పంకు హంద్రీ – నీవా జలాలు ఇవ్వనున్నామని పేర్కొన్నారు. రాయలసీమకు మేలు చేసే పోతిరెడ్డిపాడు హెడ్ రెగ్యులేటర్ సామర్థ్యాన్ని 11 వేల నుంచి 44 వేల క్యూసెక్కులకు పెంచారని.. దీన్ని ముఖ్యమంత్రి వైఎస్‌ జగన్మోహన్ రెడ్డి 80 వేల క్యూసెక్కులకు పెంచనున్నారని వెల్లడించారు.

రాయలసీమ ప్రాజెక్టుల్లో పనులు కొనసాగుతున్నాయని.. ఇవన్నీ చంద్రబాబుకు కనపడదని మంత్రి పెద్దిరెడ్డి అన్నారు. చంద్రబాబు తన మనుషులతో కోర్టులో కేసులు వేసి కొన్ని ప్రాజెక్టు పనులు నిలిపివేసే ఆలోచనలో ఉన్నారని ఆరోపించారు. అలాగే, చిత్తూరు జిల్లాలో ఆగిన మూడు ప్రాజెక్టులపై సుప్రీం కోర్టుకు వెళ్లామని తెలిపారు. చంద్రబాబు ముందుగా చర్చకు రావాలని.. ఆ తర్వాతే ప్రాజెక్టుల సందర్శనకు వెళ్లాలని సూచించారు. కుప్పంలో సైతం ఆయనతో చర్చకు సిద్ధమని ప్రకటించారు. చంద్రబాబు చిత్తూరు జిల్లా పర్యటనను తాము అడ్డుకోబోమని పేర్కొన్నారు.