విశాఖ సికింద్రాబాద్ వందేభారత్‌కు మరో స్టాప్,,,సామర్లకోటలో రైలు ఆగుతుంది

విశాఖపట్నం – సికింద్రాబాద్‌ మధ్య నడుస్తున్న వందేభారత్‌ ఎక్స్‌ప్రెస్‌ రైలుకు మరో స్టాప్ ఇచ్చిన సంగతి తెలిసిందే. సామర్లకోట జంక్షన్‌లో హాల్ట్‌ ఇచ్చేందుకు ఇప్పటికే గ్రీన్‌ సిగ్నల్‌ రాగా.. ఆ షెడ్యూల్ కూడా వచ్చేసింది. విశాఖ- సికింద్రాబాద్ వందేభారత్ రైలు ఇక మీదట గురువారం (ఆగస్టు 3) నుంచి సామర్లకోట స్టేషన్‌లో ఆగుతుందని దక్షిణ మధ్య రైల్వే తెలిపింది. విశాఖలో ఉదయం 5.45 గంటలకు బయలుదేరే వందేభారత్ ఎక్స్ ప్రెస్ రైలు 7.15 గంటలకు సామర్లకోట స్టేషన్‌‌లో ఆగుతుంది . సికింద్రాబాద్ స్టేషన్ నుంచి మధ్యాహ్నం 3గంటలకు బయలుదేరే వందేభారత్ రైలు రాత్రి 9.35 గంటలకు సామర్లకోట స్టేషన్‌కు వస్తుంది. కాకినాడ జిల్లా ప్రజలు, ప్రయాణికులతో పాటుగా కాకినాడ ఎంపీ వంగా గీత విజ్ఞప్తి మేరకు సామర్లకోటలో వందే భారత్ హాల్టింగ్ సదుపాయం కల్పించారు.

మరోవైపు ఆంధ్రప్రదేశ్‌లోని 72 రైల్వే స్టేషన్లను అమృత్‌ భారత్‌ స్టేషన్‌ పథకంలో భాగంగా ఆధునికీకరణ, అప్‌గ్రేడేషన్‌ కో­సం గుర్తించినట్లు రైల్వేమంత్రి అశ్విని వైష్ణవ్‌ తెలిపారు. 2023–24లో జూన్‌ 2023 వరకు దక్షిణ మధ్య రైల్వేలో అభివృద్ధి నిమిత్తం రూ.83.64 కోట్లు వ్యయం చేసినట్లు వైఎస్సార్‌సీపీ ఎంపీ సంజీవ్‌కుమార్‌ ప్రశ్నకు సమాధానం ఇచ్చారు. అలాగే దక్షిణమధ్య రైల్వేలో గ్రూప్‌ ఏ, సీల్లో పలు ఖాళీలున్నట్లు రైల్వేమంత్రి అశ్విని వైష్ణవ్‌ తెలిపారు. గ్రూపు ఏలో 110, గ్రూపు సీలో 10,338 ఖాళీలున్నాయని వైఎస్సార్‌సీపీ ఎంపీ చింతా అనూరాధ ప్రశ్నకు సమాధానమిచ్చారు. ఆంధ్రప్రదేశ్‌లోని ప్రాంతాలు సికింద్రాబాద్‌ రైల్వే రిక్రూట్‌మెంట్‌ బోర్డు పరిధిలోకి వస్తాయని రైల్వేమంత్రి అశ్విని వైష్ణవ్‌ తెలిపారు. వైఎస్సార్‌సీపీ ఎంపీ సంజీవ్‌కుమార్‌ ప్రశ్నకు మంత్రి జవాబిస్తూ.. దక్షిణమధ్య రైల్వే, తూర్పు కోస్తా రైల్వేలు సికింద్రాబాద్‌ పరిధిలోకి వస్తాయన్నారు. సెంట్రలైజ్డ్‌ ఎంప్లాయిమెంట్‌ నోటిఫికేషన్ల ప్రకారం దేశంలోని 21 బోర్డుల్లో ఎక్కడైనా దరఖాస్తు చేసుకోవచ్చని చెప్పారు.

సామర్లకోటలో వందేభారత్ రైలు హాల్ట్‌కు సంబంధించి రైల్వే శాఖ మంత్రి అశ్విన్‌ వైష్ణవ్‌ను కాకినాడ ఎంపీ గీత కలిసి రిక్వెస్ట్ చేశారు. వెంటనే స్పందించి సామర్లకోటలో రైలు ఆగేందుకు ఆదేశాలు ఇచ్చారు. తన వినతిపై స్పందించి వెంటనే ఆదేశాలు ఇచ్చినందుకు రైల్వే మంత్రి అశ్విన్‌ వైష్ణవ్‌కు ఎంపీ గీత కృతజ్ఞతలు తెలియజేశారు. విశాఖ సికింద్రాబాద్ వందేభారత్ రైలుకు ఉమ్మడి తూర్పు గోదావరి జిల్లాలో రాజమహేంద్రవరంలో మాత్రమే హాల్ట్‌ ఉంది. కానీ సామర్లకోట నుంచి రాజమహేంద్రవరం రైల్వే స్టేషన్‌కు వెళ్లాలంటే ఇబ్బందులతో పాటుగా సమయం, వ్యయం అవుతుందని ప్రయాణికులు ఆవేదన వ్యక్తం చేశారు. ఎంపీ గీత చొరవతో వారి సమస్యకు పరిష్కారం లభించింది.