వరద ప్రభావిత ప్రాంతాల్లో బాగా పనిచేశారంటూ,,,అధికారుల పరితీరుపై సీఎం జగన్ ప్రశంసలు

వరద సహాయక చర్యలకు సంబంధించి అధికారుల పనితీరుపై సీఎం జగన్ ప్రశంసలు కురిపించారు. బాగా పనిచేశారని, శభాష్ అంటూ ప్రశంసించారు. వరద బాధితులకు అందాల్సిన అన్నీ సహాయ సహాకరాలు అందించారని, పరామర్శ పేరుతో ఫోటోలు దిగి వెళ్లిపోకుండా ప్రతి గ్రామానికి వెళ్లి సాయం అందించారని అధికారులకు కితాబిచ్చారు. కలెక్టర్ల దగ్గర నుంచి వాలంటీర్ల వరకు ప్రతీఒక్కరూ బాగా పనిచేశారని, సహాయం అందలేదని ఏ ఒక్కరి నుంచి ఫిర్యాదు అందలేదని జగన్ తెలిపారు.

సోమవారం అల్లూరి సీతారామరాజు, ఏలూరు జిల్లాలోని వరద ప్రభావిత ప్రాంతాల్లో సీఎం జగన్ పర్యటించారు. సహాయక చర్యలను పరిశీలించిన జగన్.. వరద బాధితులను పరామర్శించారు. ఈ సందర్భంగా జగన్ మాట్లాడుతూ.. శభాష్‌ అని చెప్పి వెన్ను తట్టడానికే వచ్చానని తెలిపారు. కూనవరం ఎస్‌ఐ వెంకటేశ్‌ గురించి మంచి వార్త విన్నానని, గొప్పగా ఆదుకుని నిలబడ్డాడని విన్నానని అన్నారు. ఆగస్టు 15న ఇచ్చే మెడల్స్‌లో ఆయన పేరు ఉండాలని కలెక్టర్‌కు సూచించానన్నారు. అధికారులను నిలదీయడానికి ఇక్కడకు రాలేదని. వెన్ను తట్టి బాగా చేశావు అని చెప్పడం కోసం వచ్చినట్లు జగన్ పేర్కొన్నారు.

సచివాలయాల నుంచి వాలంటీర్ల వరకు అందరిని యాక్టివేట్ చేశామని, ఎవరికైనా మంచి జరగలేదని ఫిర్యాదులు ఉంటే నేరుగా తనకు చెప్పవచ్చని జగన్ సూచించారు. ఎందుకు చేయలేదో అప్పుడు అధికారులను నిలదీస్తానని, పరిహారం అందలేదనుకుంటే ఎవరైనా తనకు కంప్లైంట్ చేయవచ్చన్నారు. ఎవరి ఇల్లు దెబ్బతిన్నా వారికి పరిహారం రాకపోతే దానిని తమ తప్పుగా అంగీకరిస్తామని, ఎవరికైనా నష్ట పరిహారం రాకపోతే ఖచ్చితంగా వారికి న్యాయం చేయడం కోసమే బాధితుల దగ్గరకు తాను వచ్చినట్లు జగన్ స్పష్టం చేశారు. ప్రభుత్వం మీదని, ప్రజలు తోడుగా ఉండబట్టే తాను సీఎం స్థానంలో ఉన్నానన్నారు. డబ్బు ఎలా మిగిల్చుకోవాలనే ఆలోచన తనకు అసలు లేదని, ఏ ఒక్కరూ సహాయం అందకుండా మిగిలి పోకూడదనే తపన, తాపత్రయం మాత్రమే ఉందని జగన్ అన్నారు. పోలవరానికి సంబంధించిన విషయాలన్నీ పద్ధతిలో జరిగిపోతాయని, క్రెడిట్ తీసుకోవడానికి తాము ప్రయత్నాలు చేయడం లేదన్నారు.