ఏపీలో తగ్గముఖం పట్టిన టమాటా ధరలు,,,కేజీకి ఏకంగా రూ.65 నుంచి 100 వరకు

మొన్నటి వరకు సామాన్యుడికి భారంగా మారిన టమాటా ధరలు తగ్గుముఖం పట్టాయి. ఆదివారం అనంతపురం కక్కలపల్లి మార్కెట్‌‌కలో కిలో మొదటి రకం ధర రూ.110 కాగా.. రెండో రకం ధర రూ.90.. మూడో రకం రూ.75 చొప్పున పలికాయి. 15 కిలోల బుట్ట మొదటి రకం రూ.1,650, రెండో రకం రూ.1,350, మూడో రకం రూ.1,125 చొప్పున ధర పలికింది. ఆదివారం మార్కెట్‌కు మొత్తం 750 టన్నులు వచ్చాయి. మరోవైపు అన్నమయ్య జిల్లా ములకలచెరువు వ్యవసాయ మార్కెట్‌లో రెండు రోజులుగా టమోటా ధరలు తగ్గుతూ వస్తున్నాయి. మొన్నటి వరకు రూ.4300 పలికిన 23 కేజీల బాక్సు ధర ఆదివారం మాత్రం రూ.2300కి చేరింది. టమాటా నాణ్యతను బట్టి బాక్సు రూ.1500 నుంచి రూ.2300 వరకు పలికింది.

టమాటా ధరలు డబుల్ సెంచరీని కూడా దాటిపోయాయి. ఇప్పుడేమో కిలో ధర రూ.65 నుంచి రూ.100 వరకు పడిపోయింది. ఈ ధరలు కేజీ రూ.300 వరకు చేరతాయని అంచనా వేస్తే.. ఒక్కసారిగా తగ్గుముఖం పట్టాయి. దీంతో టమాటా రైతుల్లో (Ap Tomato Farmers) ఆందోళన మొదలైంది.. ఈ ధరలు మరింత తగ్గుతాయేమోనని ఆవేదన వ్యక్తం చేస్తున్నారు. ధరలు తగ్గినా సరే మార్కెట్‌ల నుంచి ఇతర రాష్ట్రాలకు ఎగమతులు కొనసాగుతున్నాయి. ఇక్కడి నుంచి ఢిల్లీ, ఛత్తీస్‌గడ్, ఉత్తరప్రదేశ్‌, మధ్యప్రదేశ్‌కు ఎగుమతి అవుతున్నాయి.

అనంతపురంతో పాటూ చిత్తూరు జిల్లాల్లో టమాట కొత్త పంట కోతకు వచ్చినట్లు చెబుతున్నారు.. అందుకే టమాటా ధరలు తగ్గాయా అనే చర్చ జరుగుతోంది. మరోవైపు వైరస్‌ కారణంగా కర్ణాటకలో టమోటా పంటలు దెబ్బతినడంతో ధరలు నిలకడగా ఉండవచ్చని పలువురు రైతులు ఆశగా ఉన్నారు. మరి రాబోయే రోజుల్లో పరిస్థితి ఎలా ఉంటుందన్నది చూడాలి. మార్కెట్‌లో ధరలు తగ్గడంతో ఇటు వ్యాపారులు కూడా కొంత రేటును తగ్గించారు. మొన్నటి వరకు టమాటాల పేరు చెబితేనే భయపడిన సామాన్యుడు ధరలు కాస్త తగ్గడంతో ఊపిరి పీల్చుకుంటున్నారు. మరి రాబోయే రోజుల్లో ఈ ధరలు ఇలానే తగ్గుతాయా.. మళ్లీ పెరుగతాయా అన్నది ఆసక్తికరంగా మారింది.