ప్రతిపక్షాలకు 135 సీట్లు ఖాయమంటూ రఘురామకృష్ణంరాజు వ్యాఖ్యలు

ఏపీలో రానున్న అసెంబ్లీ ఎన్నికల్లో ఎవరు గెలుస్తారనే దానిపై వైసీపీ రెబల్ ఎంపీ రఘురామకృష్ణ రాజు కీలక వ్యాఖ్యలు చేశారు. వచ్చే ఎన్నికల్లో ప్రతిపక్ష పార్టీలు 135 సీట్లలో గెలవడం పక్కా అని స్పష్టం చేశారు. తాజాగా మీడియాతో మాట్లాడిన ఆయన.. ఇటీవల ఎవరో సర్వే చేసి వైసీపీ వచ్చే ఎన్నికల్లో 120 నుంచి 130 స్థానాల్లో గెలవబోతుందంటూ రిపోర్ట్ ఇచ్చారని, ఆ రిపోర్ట్‌ను పార్టీ పెద్దలు పేపర్లలో రాయించుకున్నారని తెలిపారు. వారిచ్చిన సీట్ల సంఖ్య వాస్తవమే గానీ, అవి వైసీపీకి కాదని తెలిపారు. రాష్ట్రానికి రాజధాని లేకుండా, పోలవరాన్ని నిర్మించకుండా వదిలేసిన వైసీపీకి ప్రజలు ఓట్లు ఎలా వేస్తారని రఘురామ ప్రశ్నించారు. డబ్బులు ఇస్తే ఎవరైనా మనకు అనుకూలంగా సర్వేలు ఇస్తారని, దొంగ సర్వేలను పట్టించుకోకూడదని తెలిపారు. పోలవరం ముంపు గ్రామాల ప్రజలు వరదల వల్ల ఇబ్బందులు పడుతుంటే అంబటి రాంబాబు పట్టించుకోకుండా బ్రో సినిమాపై ఫిర్యాదు చేయడానికి ఢిల్లీ వెళ్లారన్నారు. శ్యాం బాబు పాత్ర గురించి ఆయన ఎందుకు అంతగా ఫీల్ అవుతున్నారో అర్థం కావడం లేదన్నారు. అభివృద్ది మీద దృష్టి పెట్టాలని చిరంజీవి సూచిస్తే వైసీపీ నేతలు ఓర్చులేకపోతున్నారని, చిరు మంచి మాటలే చెప్పారని అన్నారు. చిరంజీవికి అన్ని కులాల్లోనూ అభిమానులు ఉన్నారని, ఆయనను కాపు నేతలతో తిట్టిస్తున్నారని విమర్శించారు. పోలవరం నిర్మాణంపై జగన్ చేతులెత్తేశారని, కేంద్రానిది పూర్తి బాధ్యత అని చెప్పి తప్పించుకుంటున్నారని ఆరోపించారు.

అయితే ఇటీవల పుంగనూరు ఘటన తర్వాత ఓ యూట్యూబ్ ఛానెల్‌కు ఇచ్చిన ఇంటర్వ్యూలో రఘురామకృష్ణ రాజు మాట్లాడుతూ.. వచ్చే ఎన్నికల్లో టీడీపీ, జనసేన, బీజేపీ కలిసి పోటీ చేయడం ఖాయమని తెలిపారు. ఆ పార్టీల కూటమికి 130కిపైగా సీట్లు రావడం ఖాయమని, వైసీపీకి 40 సీట్లు కూడా వచ్చే అవకాశం లేదని తెలిపారు. నర్సాపురం తరపున కూటమి అభ్యర్దిగా తాను పోటీ చేస్తానంటూ ఆయన చెప్పారు.

ఏపీ రాజకీయాలపై రఘురామకృష్ణరాజు ఎప్పటికప్పుడు సర్వేలు చేయిస్తూ ఉంటారు. ఆయన ఎవరితో సంబంధం లేకుండా వ్యక్తిగతంగా వివిధ ఏజెన్సీలతో తన డబ్బులతో సర్వేలు చేయిస్తారు. ఈ సర్వే వివరాలను మీడియాకు వెల్లడిస్తూ ఉంటారు. దీంతో ఆయన విడుదల చేసే సర్వే ఫలితాల గురించి తెలుసుకునేందుకు అందరూ ఆసక్తి చూపుతూ ఉంటారు. గతంలో పలుమార్లు మీడియా వేదికగా తాను చేయించిన సర్వే వివరాలను రఘురామకృష్ణరాజు బయటపెట్టారు. దీంతో ఆయన సర్వేలపై అందరిలోనూ ఆసక్తి ఉంటుంది.