వారాహి యాత్రలో రెచ్చగొట్టారంటూ ,,,పవన్‌కు విశాఖ పోలీసుల నోటీసులు

జనసేన అధినేత పవన్ కల్యాణ్‌కు మరోసారి విశాఖ పోలీసులు నోటీసులు జారీ చేశారు. వారాహి యాత్రలో రెచ్చగొట్టేలా వ్యాఖ్యలు చేశారంటూ నోటీసులిచ్చారు. సెక్షన్ 30 కింద జనసేన పీఏసీ సభ్యుడు కోన తాతారావుకు నోటీసులను పంపించారు. ఈ సందర్బంగా బహిరంగ సభల్లో రెచ్చగొట్టేలా మాట్లాడవద్దని, బాధ్యతగా మాట్లాడాలని హెచ్చరించారు. బహిరంగ సభల్లో జాగ్రత్తగా వ్యవహరించాలని, లేకపోతే నిర్వాహకులు బాధ్యత వహించాల్సి ఉంటుందని విశాఖ పోలీసులు హెచ్చరించారు. వారాహి యాత్రలో విద్వేష వ్యాఖ్యలు చట్ట విరుద్దమని నోటీసుల్లో పేర్కొన్నారు.

గురువారం విశాఖలో పవన్ మూడో విడత వారాహి యాత్రను ప్రారంభించారు. ఈ సందర్భంగా జగదాంబ జంక్షన్‌లో భారీ బహిరంగ సభ నిర్వహించారు. ఈ సభలో జగన్ ప్రభుత్వంపై విరుచుకుపడ్డారు. వైసీపీ ప్రభుత్వ పాలనను తప్పుబడుతూ జగన్‌పై తీవ్ర వ్యాఖ్యలు చేశారు. దీంతో రెచ్చగొట్టేలా వ్యాఖ్యలు చేశారంటూ పవన్‌కు విశాఖ పోలీసులు నోటీసులివ్వడంపై జనసైనికులు మండిపడుతున్నారు. ప్రభుత్వాన్ని విమర్శిస్తే పవన్‌కు నోటీసులిస్తారా? అంటూ ఆగ్రహం వ్యక్తం చేస్తున్నారు. గతంలో విశాఖలో పవన్ కల్యాణ్ పర్యటనను పోలీసులు అడ్డుకున్నారు. జనవాణి కార్యక్రమం చేపట్టేందుకు పవన్ విశాఖ పర్యటనకు వచ్చారు. కానీ అదే సమయంలో విశాఖ ఎయిర్‌పోర్ట్‌లో మంత్రులు, వైసీపీ నేతలపై రాళ్ల దాడి జరగడం కలకలం రేపింది.

రాళ్ల దాడిలో జనసేన నేతలు, కార్యకర్తలను పోలీసులు అరెస్ట్ చేసి జైలుకు తరలించడంతో పవన్ కల్యాణ్ మండిపడ్డారు. జనసైనికులను విడుదల చేసేంతవరకు విశాఖలోనే ఉంటానంటూ తెలిపారు. కానీ ఉద్రిక్త పరిస్థితుల క్రమంలో విశాఖను వదిలి వెళ్లాల్సిందిగా పవన్‌కు అప్పట్లో నగర పోలీసులు నోటీసులిచ్చారు. జనవాణి కార్యక్రమానికి కూడా అనుమతి ఇవ్వలేదు. అయితే అరెస్ట్ చేసిన జనసేన నేతలను విడుదల చేస్తేనే తాను విశాఖ వదిలి వెళతానంటూ పోలీసులకు పవన్ తెలిపారు. ఆ తర్వాత రాళ్ల దాడి వ్యవహారంలో పలువురు జనసేన నేతలను పోలీసులు విడుదల చేయడంతో తర్వాతి రోజు ఉదయం విశాఖ నుంచి విజయవాడకు పవన్ చేరుకున్నారు. పవన్ పర్యటనను అడ్డుకోవడం, జనసేన నేతలను అరెస్ట్ చేయడంపై ప్రతిపక్ష పార్టీలన్నీ ఖండించాయి. ఈ మేరకు చంద్రబాబుతో పాటు వామపక్ష నేతలు ఫోన్ చేసి సంఘీభావం ప్రకటించారు. అటు ఇవాళ మధ్యాహ్నం రుషికొండ, ఎర్ర మట్టి దిబ్బలను చూడటానికి పోలీసుల అనుమతి అడగకుండా వెళ్లేందుకు పవన్ ఏర్పాట్లు చేసుకున్నారు. చివరి నిమిషంలో బయలుదేరే ముందు జనసేన నేతలు అనుమతి కోసం పోలీసులకి సమాచారం ఇచ్చారు. దీంతో పవన్ కళ్యాణ్‌కు షరతులతో కూడిన అనుమతి జారీ చేశారు. జోడుగుల్ల పాలెం మీదుగా వెళ్ళే క్రమంలో 8 వాహనాలకి అనుమతి ఇచ్చారు.