మూడేళ్లుగా చైనా నిర్బంధంలో నరకయాతన,,,కన్నీళ్లుపెట్టిస్తున్న జర్నలిస్ట్ లేఖ

మూడేళ్లుగా చైనా నిర్బంధంలో ఉన్న ఆస్ట్రేలియాకు చెందిన జర్నలిస్టు చెంగ్ లీ ఆచూకీ కోసం ఆమె భర్త, కుటుంబసభ్యులు తీవ్ర ఆందోళన చెందుతున్నారు. ఈ నేపథ్యంలో చెంగ్‌ లీ తన పిల్లలకు రాసిన లేఖను ఆమె భర్త మీడియాకు బహిర్గతం చేశారు. చైనా జైలులో ఉన్న ఆమెపై మోపిన అభియోగాలను చాలా గోప్యంగా ఉంచారు. ఆమెకు ఇంకా శిక్షకు కూడా ఖరారు చేయలేదు. కాగా, చెంగ్ లీ తన పిల్లల కోసం పడుతున్న ఆరాటం లేఖ ద్వారా ప్రస్పుటమవుతోంది. ఆస్ట్రేలియా, చైనాల మధ్య దీర్ఘకాలంగా ఘర్షణ కొనసాగుతున్న తరుణంలో ఆస్ట్రేలియన్ అధికారులకు రాసిన నోట్‌లో చెంగ్ తన అస్పష్టమైన జైలు పరిస్థితులను వివరించారు.

తన నోట్‌ను ఆస్ట్రేలియాకు ‘ప్రేమ లేఖ’గా అభివర్ణించిన చెంగ్ లీ... నేను సూర్యుడ్ని కూడా చూడటం లేదని వాపోయారు. ‘నా సెల్‌లోకి సూర్యకాంతి కిటికీలోంచి ప్రకాశిస్తుంది.. కానీ నేను ఏడాదికి 10 గంటలు మాత్రమే నిలబడగలను’ అని జైలులో తాను ఎదుర్కొంటున్న దారుణ పరిస్థితిని లేఖలో వివరించారు. ప్రభుత్వ రహస్యాలను విదేశాలకు చేరవేశారనే అభియోగాలపై చైనా అధికారిక ఆంగ్ల మీడియా సీజీటీఎన్ మాజీ యాంకర్ చెంగ్ లీని 2020లో జిన్‌పింగ్ సర్కారు అరెస్ట్ చేసి జైల్లో పెట్టింది.

చెంగ్ లీ రాసిన లేఖను ఆస్ట్రేలియా మీడియాతో పాటు సోషల్ మీడియాలో ఆమె భర్త నిక్ కోయిల్ గురువారం సాయంత్రం పంచుకున్నారు. చైనా, ఆస్ట్రేలియా మధ్య ఉద్రిక్తతలు పెరుగుతున్న సమయంలో చెంగ్‌ను అదుపులోకి తీసుకున్నారు. ఆమె అరెస్ట్‌లో రాజకీయ వ్యూహాలు కీలక పాత్ర పోషించాయనే ప్రచారం కూడా ఉంది. అయితే, ఈ కేసును చైనాలో జన్మించిన ఆస్ట్రేలియన్ రచయిత యాంగ్ జున్‌తో పోల్చుతున్నారు. యాంగ్ కూడా గూఢచర్యం ఆరోపణలపై 2019 నుంచి చైనా నిర్బంధంలో ఉన్నారు. ఇటీవలి చైనా భారీ వాణిజ్య సుంకాలను రద్దు చేయడంతో డ్రాగన్, ఆస్ట్రేలియా మధ్య ఉద్రిక్తతలు మరింత తీవ్రమయ్యాయి. ఈ తరుణంలో చెంగ్ నిర్బంధం మరింత ఒత్తిడికి దారితీయనుంది.

ఆస్ట్రేలియా విదేశాంగ మంత్రి పెన్నీ వాంగ్ మాట్లాడుతూ.. చెంగ్ తిరిగి తన పిల్లలను కలుసుకోవాలని దేశం మొత్తం కోరుకుంటుందని చెప్పారు. ‘చెంగ్ కోసం ఆస్ట్రేలియా బలంగా వాదించింది.. అంతర్జాతీయ నిబంధనలకు అనుగుణంగా న్యాయం, విధానపరమైన, మానవీయ ప్రాథమిక ప్రమాణాలను పాటించాలని కోరింది’ అని ఆమె శుక్రవారం ఒక ప్రకటనలో తెలిపారు. ‘మేము చెంగ్, ఆమె కుటుంబానికి మద్దతుతో పాటు ఆమె శ్రేయస్సు కోసం పోరాటం సాగిస్తాం’ అని ఉద్ఘాటించారు.

చెంగ్ భావోద్వేగ లేఖలో తాను మూడేళ్లుగా చెట్టును చూడలేదని, ఆస్ట్రేలియా బుష్‌వాక్‌లు, బీచ్‌లు, అక్కడ సూర్యాస్తమయాలను చాలా మిస్సవుతున్నానని పేర్కొన్నారు. జైలులో ఉన్న తన పరుపును ఏడాదికి ఒకసారి మాత్రమే శుభ్రం చేయడానికి తీసుకెళ్తారని తెలిపారు. ‘బహుశా "నాలోని చైనీయులు భావజాలం చట్టపరమైన పరిమితులను దాటి ఉండొచ్చు’ అని చెంగ్ రాశారు. తనను తాను చైనీస్-ఆస్ట్రేలియన్‌గా పేర్కొన్నారు. ‘అన్నింటికంటే నేను నా పిల్లలను కోల్పోతున్నాను’ అని లేఖలో వాపోయారు.  గత మార్చిలో ఆమెను మూసి తలుపుల వెనుక ఉంచి విచారించారు. చైనాలోని ఆస్ట్రేలియా రాయబారిని కూడా విచారణ పరిశీలించడానికి కోర్టులోకి రాకుండా నిరోధించారు. 2020 ఆగస్టు 13న చెంగ్ లీను భద్రతా సిబ్బంది అదుపులోకి తీసుకున్నారు.