దండుపాళ్యం బ్యాచ్‌,,,వాలంటీర్లపై పవన్ సంచలన వ్యాఖ్యలు

వాలంటీర్ వ్యవస్థపై జనసేన అధినేత పవన్ కళ్యాణ్ మరోసారి సంచలన వ్యాఖ్యలు చేశారు. గొంతులు కోసే దండుపాళ్యం బ్యాచ్‌కు, వాలంటీర్లకు తేడా లేదని ఘాటుగా స్పందించారు. ఇళ్లల్లో చొరబడి వాలంటీర్లు గొంతులు కోస్తున్నారని సెన్సేషనల్ కామెంట్స్ చేశారు. వాలంటీర్ ఉద్యోగానికి పోలీస్ వెరిఫికేషన్ ఎందుకు తీసుకోవట్లేదని ప్రశ్నించారు. తనకు విధించిన ఆంక్షలను వాలంటీర్లకు విధిస్తే అరాచకాలు ఉండవని తెలిపారు.

శనివారం పెందుర్తి నియోజకవర్గంలోని సుజాతనగర్ ప్రాంతంలో వాలంటీర్ చేతిలో హత్యకు గురైన వృద్ధురాలు కుటుంబాన్ని పవన్ కళ్యాణ్ పరామర్శించారు. అనంతరం మీడియాతో మాట్లాడుతూ వాలంటీర్లపై నిప్పులు చెరిగారు. ఒంటరి మహిళలను వాలంటీర్లు టార్గెట్ చేస్తున్నారని ఇప్పటికే చెప్పానని, ఇవన్నీ కేంద్ర హోంశాఖ దృష్టికి తీసుకెళ్తానని స్పష్టం చేశారు. నర్సీపట్నంలో కూడా ఒంటరి మహిళను వాలంటీర్ గర్భవతిని చేశాడని, వైసీసీ నేతలు కనీసం పరామర్శించడానికి కూడా వెళ్లలేదని ఆరోపించారు. ఉత్తరాంధ్రలో 155 మంది చిన్నపిల్లలు అదృశ్యం అయ్యారని, అస్సలు లాండ్ ఆర్డర్ బాగలేదని చెప్పారు.

తనకు ఆంక్షలు విధిస్తారని, తప్పు చేసే వారికి మాత్రం ఆంక్షలు ఉండడం లేదని పవన్ విమర్శించారు. పోలీసులను సక్రమంగా విధులు నిర్వహించుకోనివ్వడం లేదని, పిల్లలు, పెద్దవారిని జాగ్రత్తగా కాపాడుకోవాలన్నారు. వరలక్ష్మిని హతమార్చిన నిందితుడికి శిక్ష పడేవరకు జనసేన అండగా ఉంటుందన్నారు. వైసీపీ ప్రభుత్వంలో ఎంపీ కుటుంబానికే రక్షణ లేదని, ఎంపీ సొంత కుటుంబంపై దాడి జరిగితే దిక్కు,మక్కు లేదని ఆరోపించారు. ఎంపీ ఎందుకు భయపడతున్నావు? అనుమానం ఉన్న వ్యక్తులపై పోలీసులకు తెలియజేయండి అని సూచించారు. ఏపీలోని శాంతి భద్రతలపై కేంద్రానికి తెలియజేస్తానన్నారు. నవరత్నాల కోసం ఏర్పాటు చేసుకున్న ప్రైవేట్ సైన్యం.. ప్రజల ప్రాణాలను తీస్తే ఎలా? అని ప్రశ్నించారు. పాస్‌పోర్ట్ కావాలంటేనే పోలీస్ వెరిఫికేషన్ ఉంటుందని, అలాంటిది వాలంటీర్లను తీసుకునేటప్పుడు వెరిఫికేషన్ ఉండదా? అని ప్రశ్నించారు.