ఏపీ విద్యార్థినికి అరుదైన అవకాశం,,,ఐరాస విద్యా సదస్సుకు ఎంపిక

ఏపీ విద్యార్థినికి అరుదైన అవకాశం దక్కింది. అల్లూరి సీతారామరాజు జిల్లా చింతూరు డివిజన్‌లోని ఎటపాకకు చెందిన విద్యార్థిని మోతుకూరి చంద్రలేఖ ఐక్యరాజ్య సమితి విద్యా సదస్సులో పాల్గొనేందుకు ఎంపికయ్యారు. ఈ మేరకు సీఎం క్యాంప్ కార్యాలయం నుంచి ఆమెకు సమాచారం అందింది. ఈ ఎంపిక కోసం తొలుత సమగ్రశిక్ష అభియాన్‌ ఆధ్వర్యంలో రాష్ట్రంలో అమలవుతున్న విద్యా విధానంపై విద్యార్థులకు రాత పరీక్ష నిర్వహించారు. ఎటపాక కేజీబీవీలో గత విద్యా సంవత్సరం పదో తరగతి చదివిన చంద్రలేఖ.. 523 మార్కులు సాధించి జిల్లాలోని 19 కేజీబీవీల్లో టాపర్‌గా నిలిచారు.

జులై 31న జరిగిన రాత పరీక్షలో ఉత్తీర్ణురాలైంది. రాష్ట్ర వ్యాప్తంగా వివిధ విభాగాల పాఠశాలల టాపర్లకు జగనన్న ఆణిముత్యాలు పథకంలో భాగంగా గత నెలలో ఆన్‌లైన్‌లో పరీక్ష, ఇంటర్వ్యూలు నిర్వహించారు. ఈ పరీక్షలో చంద్రలేఖ 100 మార్కులకు గాను 94 మార్కులు సాధించి ఆన్‌లైన్‌ ఇంటర్వ్యూకు ఎంపికయ్యారు.. ఈ నెల 3న నిర్వహించిన ఇంటర్వ్యూలో పాల్గొని.. విద్యా సదస్సులో పాల్గొనేందుకు ఎంపికైంది. రాష్ట్రంలో విద్యా విధానంపై అక్కడ చంద్రలేక ప్రసంగించనుంది. రాష్ట్రంలోని కేజీబీవీ విద్యాలయాల విభాగంలో ఈ విద్యార్థిని ఒక్కరే ఎంపికవడం విశేషం.

ఈమెతో పాటు శ్రీకాకుళం జిల్లాలో కేజీబీవీల నుంచి ఇద్దరు ఇంటర్వ్యూకు హాజరు కాగా.. ఉత్తమ ప్రతిభ కనబరిచిన చంద్రలేఖ ఎంపికయ్యారు. చంద్రలేఖ త్వరలో యూఎస్‌ఏ వెళ్లేందుకు అవసరమైన ఏర్పాట్లు ప్రభుత్వం చేపడుతుందని అధికారులు తెలిపారు. విద్యార్థిని తండ్రి రామారావు ట్రాలీ ఆటో నడుపుతుంటారు.. ఆయన కష్టంతోనే కుటుంబం నడుస్తోంది.

మరోవైపు ఏలూరు జిల్లా నూజివీడు ట్రిపుల్‌ఐటీకి చెందిన ఈసీఈ ఆఖరి సంవత్సరం విద్యార్థులు 9 మంది అమెరికన్ మల్టీ నేషనల్ సెమీ కండక్టర్‌ కంపెనీ అయిన అన్‌లాగ్‌ డివైజెస్‌కి ఎంపికయ్యారు. ఆ సంస్థ ప్రతినిధులు వీరిని ఏడాది పాటు లాంగ్‌టర్మ్‌ ఇంటర్న్‌షిప్‌కు ఎంపిక చేశారు. ఇంటర్న్‌షిప్‌ సమయంలో వీరికి నెలకు రూ.40వేలు చొప్పున స్టయిఫండ్‌ ఇస్తారు. ఇంటర్న్‌షిప్‌ పూర్తయిన తర్వాత వారి పని తీరు ఆధారంగా విద్యార్థులను ఉద్యోగాల్లోకి తీసుకుంటారు.