జనసేనకు సిద్దాంతం లేదంటూ పవన్‌ కళ్యాణ్‌పై మంత్రి రోజా ఫైర్

చదువులేనోడు నోటికి వచ్చినట్లు మాట్లాడుతున్నారని జనసేన అధినేత పవన్ కళ్యాణ్‌పై నగరి ఎమ్మెల్యే రోజా ఫైర్ అయ్యారు. . పవన్ కల్యాణ్ ఒక విశ్వాసపాత్రమైన పెంపుడు జంతువు లాంటివారే తప్ప ప్రజాసేవకు తగిన మనిషి కాదన్నారు. విశాఖపట్నంలోని రుషికొండ నిర్మాణాలపై అన్నిరకాల అనుమతులు ఉన్నాయని, రుషికొండ నిర్మాణాలకు సంబంధించి కేంద్ర అటవీశాఖ మార్చి 12, 2021న అనుమతి ఇచ్చిందని, అత్యంత ముఖ్యమైన సీఆర్జెడ్ పర్మిషన్‌ను మే 19, 2021న కేంద్ర ప్రభుత్వం ఇచ్చిందని ఆమె తెలిపారు.

ఈ రెండు అనుమతులు వచ్చిన తర్వాతనే స్థానిక ప్రభుత్వ శాఖలు, విభాగాలు మిగిలిన అనుమతులు ఇచ్చాయని రోజా తెలిపారు. ఫైర్ సేఫ్టీ పర్మిషన్, జీవీఎంసీ నుంచి బిల్డింగ్ ప్లాన్ అప్రూవల్‌తో పాటు ఏపీ పొల్యూషన్ కంట్రోల్ బోర్డు నుంచి CFC పర్మిషన్‌ కూడా వీటికి ఉందన్నారు. ఇవన్నీ తీసుకున్న తర్వాతనే 2021 సెప్టెంబర్‌లో చట్టబద్ధంగా ఈ భవనాల నిర్మాణం ప్రారంభం అయిందన్నారు. తీసుకోవాల్సిన అన్ని రకాల అనుమతులు తీసుకున్న తర్వాత రిషికొండలో కడుతున్న బిల్డింగ్‌లకు ఎలాంటి పర్మిషన్లు లేవంటూ ప్రతిపక్షాలకు చెందినవారు మాట్లాడటం అర్థరహితమన్నారు.

విశాఖపట్నం వేదికగా వ్యతిరేక ప్రచారానికి రుషికొండ నిర్మాణాలను వేదికగా చేసుకున్నారని రోజా ఆరోపించారు. ప్రభుత్వం ఇంత స్పష్టంగా నిబంధనలు పాటిస్తుంటే.. ఈ చదువులేనోడు, నోటికి వచ్చినట్టు మాట్లాడుతున్నారని ఘాటు వ్యాఖ్యలు చేశారు. పవన్ ఒక విశ్వాసపాత్రమైన పెంపుడు జంతువు లాంటివారే తప్ప, ప్రజాసేవకు తగిన మనిషి కాదన్నారు.

అసలు పవన్‌ పార్టీ లక్ష్యం ఏమిటి? అని ప్రశ్నించారు. తమది జగన్ వ్యతిరేక పార్టీ అని చెబుతారు తప్ప ప్రజలకు ఫలానాది చేయటానికి ఈ పార్టీ పెట్టామని సమాధానం చెప్పుకోలేని పరిస్థితి పవన్‌దని రోజా అన్నారు.

ఎంత చిన్న పార్టీ అయినా ఒక ఐడెంటిటీ ఉంటుందని, చంద్రబాబుకు పనిచేయడమే తన ఐడెంటిటీగా పవన్‌ భావిస్తున్నారని రోజా అన్నారు. సీఎం జగన్ రాజకీయంగా ఎదుర్కొనే దమ్ము లేక పొత్తులకోసం పాకులాడుతున్నారంటూ విమర్శించారు. వెనుకబడిన ఉత్తరాంధ్ర అభివృద్ధి చెందాలని ముఖ్యమంత్రి జగన్ విశాఖను పరిపాలనా రాజధానిగా ప్రకటించారని అన్నారు. విశాఖ ప్రజలపైన ప్రతిపక్షాలు కక్ష కట్టాయని, విశాఖ బ్రాండ్ ఇమేజ్‌ను దెబ్బతీసి ఆ ప్రాంత ప్రజలను అవమానిస్తున్నారని వ్యాఖ్యానించారు.