కరెంట్ బిల్లుల పేరుతో కొత్తరకం మోసం.. పొరపాటున కూడా ఈ తప్పు చేయొద్దు!

ఇటీవ కాలంలో సైబర్ మోసాలు పెరిగిపోతున్నాయి. రోజుకో కొత్త మార్గంలో కేటుగాళ్లు రెచ్చిపోతున్నారు.. అమాయకుల్ని టార్గెట్ చేసి నిండా ముంచేస్తున్నారు. లింకులు పంపి అకౌంట్‌లో డబ్బులు మొత్తాన్ని ఖాళీ చేస్తున్నారు. తాజాగా పశ్చిమ గోదావరి జిల్లాలో కూడా అదే జరిగింది. సైబర్ నేరగాళ్లు కరెంట్ బిల్లు పేరుతో లింకును పంపి అకౌంట్‌లో డబ్బుల్ని లాగేశారు. దీంతో బాధితుడు పోలీసుల్ని ఆశ్రయించారు.

ఉండి మండలం పెదపుల్లేరుకు చెందిన కలిదిండి బలరామ కృష్ణంరాజు మొబైల్‌కు ఈ ఏడాది మార్చి 28న ఓ మెసేజ్ పంపారు. అందులో విద్యుత్తు బిల్లు కట్టకపోతే సర్వీసు తొలగిస్తామని పేర్కొన్నారు. దీంతో ఆ నంబరుకు ఫోన్‌ చేసి తాను విద్యుత్తు చెల్లించినట్లు చెప్పారు. మెసేజ్ పంపిన వ్యక్తి.. 'మీకో లింకు పంపుతాం.. దానిపై క్లిక్‌ చేస్తే బిల్లు చెల్లింపు సమాచారం వస్తుందని' ఆ గుర్తు తెలియని వ్యక్తి నమ్మబలికాడు. అలా చేసినా బిల్లు సమాచారం రాకపోవడంతో మరోసారి అతడికి ఫోన్‌ చేసి విషయం చెప్పారు.

ఆ గుర్తు తెలియని వ్యక్తి తాను చెప్పిన నంబరుకు రూ.5 యాప్‌ ద్వారా పంపితే సమాచారం వస్తుందని నమ్మించాడు. రూ.5 చెల్లించాక అతడికి ఫోన్‌ చేసినా సమాధానం లేకపోవడంతో బలరామకృష్ణంరాజు ఈ విషయాన్ని పట్టించుకోలేదు. ఆయన ఇటీవల బ్యాంకుకు వెళ్లారు.. తన అకౌంట్ నుంచి మార్చి 28న రూ.1.82 లక్షల డ్రా అయినట్లు గుర్తించారు. వెంటనే పోలీసులకు ఫిర్యాదు చేయగా.. సైబర్‌ మోసం కేసు నమోదు చేసి దర్యాప్తు చేస్తున్నట్లు పోలీసులు తెలిపారు.

గుర్తు తెలియని మొబైల్స్ నుంచి వచ్చే ఫోన్ కాల్స్, లింకుల విషయంలో జాగ్రత్తగా ఉండాలని పోలీసులు ఎన్నో సందర్భాల్లో హెచ్చరించారు. అయినా సరే కొందరు మాత్రం అమాయకంగా మోసపోతున్నారు. సైబర్ కేటుగాళ్లు ఇప్పుడు కరెంట్ బిల్లు పేరుతో కూడా మోసాలు చేస్తున్నారని.. అప్రమత్తంగా ఉండాలని సూచించారు. ఏదైనా అనుమానం ఉంటే తమకు సమాచారం ఇవ్వాలంటున్నారు.