ఏపీ ప్రభుత్వ ఉద్యోగులకు శుభవార్త,,,హౌసింగ్‌పై కసరత్తు ముమ్మరం

ఏపీ ప్రభుత్వ ఉద్యోగులకు జగన్ సర్కార్ శుభవార్త చెప్పింది. ప్రభుత్వ ఉద్యోగులకు ఇళ్ల స్థలాలపై కసరత్తు చేస్తోంది.. రెవెన్యూ శాఖ అధికారులు తో సి ఎస్ జవహర్ రెడ్డి సమీక్ష చేశారు. 10 రోజుల్లోగా ఉద్యోగుల కోసం ఖాళీ స్థలాలు గుర్తించాలని ఆదేశించారు.. ఉద్యోగ సంఘాలతో చర్చించాలని రెవెన్యూ అధికారులను ఆదేశించారు. ఉద్యోగుల హౌసింగ్ సొసైటీలకు స్థలాల కేటాయింపులు పై నివేదిక సిద్ధం చేయాలని సీఎస్ ఆదేశించారు.

రాష్ట్ర ప్రభుత్వ ఉద్యోగులకు ఆయా ఉద్యోగ సంఘాల హౌసింగ్‌ సొసైటీల వారీ ఇళ్ల స్థలాలకు ఎంత మేర భూమి అవసరమవుతుందో పరిశీలించాలన్నారు సీఎస్. ఉద్యోగ సంఘాల ప్రతినిధులతో చర్చించి నివేదిక సమర్పించాలని ఆదేశించారు. ఉద్యోగులకు సంబంధించిన ఇళ్ల స్థలాలపై పది రోజుల్లో ఇదే అంశంపై సీఎం వైఎస్‌ జగన్‌మోహన్‌రెడ్డి సమీక్షించనున్నారని జవహర్‌రెడ్డి తెలిపారు. పట్టణ ప్రాంతాల్లో పబ్లిక్‌ హౌసింగ్‌ విధానాన్ని తీసుకొచ్చే అంశంపై దృష్టి సారించాలని అధికారులకు సీఎస్ సూచించారు.

పట్టణ ప్రాంతాల్లో ఇళ్లు లేని వారు, ఇళ్లున్నా రోడ్లు, ఫుట్‌పాత్‌లు, కాలువలు, డ్రైన్లు వంటి వివిధ ప్రభుత్వ స్థలాలను ఆక్రమించుకుని చిన్నచిన్న గుడిసెలు, గుడారాలు వంటివి ఏర్పాటు చేసుకుని జీవనం సాగించే వారిని కట్టడి చేసి.. వారికి ప్రభుత్వమే పబ్లిక్‌ హౌసింగ్‌ విధానంలో నిర్మించిన ఇళ్లలో నివసించేలా చేయొచ్చని తెలిపారు. రాష్ట్ర వ్యాప్తంగా అన్ని పట్టణాల్లో పరిశీలన జరిపి సీఎం సమావేశం నాటికి ఒక నివేదికను సిద్ధం చేయాలని మున్సిపల్‌ అధికారులను ఆదేశించారు.

ఉద్యోగుల ఆరోగ్య పథకం (ఇహెచ్‌ఎస్‌)ను మరింత పారదర్శకంగా, పటిష్టంగా అమలు చేసేందుకు చర్యలు తీసుకుంటున్నామన్నారు సీఎస్ జవహర్ రెడ్డి. వైద్యారోగ్యశాఖ అధికారులతో సీఎస్‌ సమీక్ష నిర్వహించారు. మరో పది రోజుల్లో ఇహెచ్‌ఎస్‌ అంశంపై సీఎం సమీక్షిస్తారన్నారు. ఈ పథకం అమలు గురించి ఉద్యోగ సంఘాల నాయకుల నుంచి వచ్చిన ప్రతిపాదనల అమలుకు చర్యలు తీసుకున్నామన్నారు వైద్యారోగ్యశాఖ ముఖ్య కార్యదర్శి ఎంటీ కృష్ణబాబు. మరికొన్ని ప్రతిపాదనలు రాష్ట్ర ప్రభుత్వ స్థాయిలో నిర్ణయం తీసుకోవాల్సి ఉంటుందన్నారు.

ఏపీ ప్రభుత్వ ఉద్యోగుల కోసం ప్రభుత్వం మరో కీలక నిర్ణయం తీసుకుంది. గుంటూరు జిల్లా మంగళగిరి ఎంఐజీ జగనన్న స్మార్ట్‌ టౌన్‌షిప్‌ లో.. 10 శాతం ప్లాట్లను రిజర్వ్‌ చేసి, 20 శాతం రాయితీతో ప్లాట్లను అందిస్తోంది. ఈ ప్లాట్లు 200, 240 చదరపు గజాలుగా అందుబాటులో ఉండగా.. చదరపు గజానికి రూ.17,499గా ధరగా నిర్ణయించింది సీఆర్డీఏ. ఒప్పందం అయ్యాక నెల లోపు మొత్తం సొమ్మును ఒకేసారి చెల్లించిన వారికి 5శాతం తగ్గింపు కూడా ఉంది.

ఆగస్టు 1 నుంచి ఎంఐజీ పోర్టల్‌ https://migapdtcp.ap.gov.in, ఏపీసీఆర్‌డీఏ పోర్టల్‌ https://crda.ap.gov.in లో అందుబాటులోకి వచ్చాయి. ఆసక్తి ఉన్నవారు ఆగస్టు 31 సాయంత్రం 5 గంటలలోగా దరఖాస్తులు సమర్పించాల్సి ఉంటుంది. ఇతర వివరాలకు 0866-2527124 ఫోన్‌ నంబరులో సంప్రదించాలని సూచించారు. రాష్ట్రవ్యాప్తంగా జగనన్న స్మార్ట్‌ టౌన్‌షిప్‌ ప్రాజెక్టుల్లో ఎక్కడైనా ప్లాట్‌ కొనుగోలు చేసేందుకు అవకాశం కల్పించింది ప్రభుత్వం.