భారత జెండా ఎగురవేసిన సీమా హైదర్,,,హిందుస్థాన్ జిందాబాద్, భారత్ మాతాకీ జై అని నినాదాలు

పబ్జీలో ఉత్తర్‌ప్రదేశ్‌కు చెందిన యువకుడితో పరిచయమై అది కాస్త ప్రేమగా మారడంతో పాక్ నుంచి అక్రమంగా నలుగురు పిల్లలతో భారత్ వచ్చేసింది సీమా హైదర్ అనే మహిళ. గత కొన్నిరోజులుగా ఆమె తరచూ ఏదో రకంగా వార్తల్లో నిలుస్తోంది. ఈ క్రమంలోనే తాజాగా కేంద్ర ప్రభుత్వం చేపట్టిన హర్ ఘర్ తిరంగా అభియాన్‌లో పాల్గొని మరోసారి దేశ ప్రజలను ఆశ్చర్యంలో ముంచెత్తింది. స్వాతంత్ర్య దినోత్సవానికి ముందు ఆదివారం.. తమ ఇంటిపై భారత జెండాను ఎగురవేసి వార్తల్లో నిలిచింది. ఉత్తర్‌ప్రదేశ్‌లోని నోయిడాలో తన నివాసం వద్ద భర్తతో కలిసి జెండాను ఎగురవేసి.. భారత్‌కు అనుకూలంగా నినాదాలు చేసింది.

స్వాతంత్య్ర దినోత్సవానికి రెండు రోజుల ముందు భారతదేశ గొప్పతనాన్ని కొనియాడుతూ సీమా హైదర్‌ మువ్వన్నెల జెండాను ఎగరవేసింది. తన భర్త సచిన్‌ మీనా, వారి తరఫున లాయర్‌ ఏపీ సింగ్‌తో కలిసి నోయిడాలోని తన నివాసంలో జరిగిన ‘ హర్‌ ఘర్‌ తిరంగా అభియాన్’లో పాల్గొంది. ఈ సందర్భంగా జెండాను ఎగురవేసిన తర్వాత.. హిందుస్థాన్ జిందాబాద్‌, భారత్‌ మాతాకీ జై అంటూ నినాదాలు కూడా చేసింది. ఈ సందర్భంగా మాట్లాడిన సీమా హైదర్.. తనకు వచ్చిన సినిమా అవకాశాన్ని వదిలేసినట్లు పేర్కొంది. సినిమాలో నటించాలని బాలీవుడ్ డైరెక్టర్లు ఆమెను సంప్రదించారు. జానీ ఫైర్‌ఫాక్స్‌ ప్రొడక్షన్‌ హౌస్‌ నిర్మిస్తున్న ‘కరాచీ టు నోయిడా’, ‘ఏ టైలర్‌ మర్డర్‌ స్టోరీ’ సినిమాల్లో సీమా హైదర్ నటిస్తున్నట్లు వార్తలు వచ్చాయి. అయితే.. సినిమాను తిరస్కరించానని చెప్పిన సీమా.. అందులో ఏ చిత్రాన్ని తిరస్కరించారనేది మాత్రం ఆమె స్పష్టత ఇవ్వలేదు. అయితే సినిమా చేయవద్దని మహారాష్ట్ర నవనిర్మాణ్‌ సేన పార్టీ ఇచ్చిన హెచ్చరికల నేపథ్యంలో సినిమా చేయకూడదని ఆమె నిర్ణయం తీసుకున్నట్లు తెలుస్తోంది.

పాకిస్థాన్‌కు చెందిన సీమా హైదర్‌కు 2019లో పబ్జీ గేమ్‌లో ఉత్తర్‌ప్రదేశ్‌ నోయిడాకు చెందిన సచిన్ మీనా పరిచయమయ్యాడు. కొన్ని రోజులకు ఈ పరిచయం ప్రేమగా మారింది. దీంతో ఇటీవల సచిన్ మీనా కోసం పాక్‌లో ఉన్న ఇంటిని విక్రయించి.. తన నలుగురు పిల్లలతో సహా భారత్‌లోకి అక్రమంగా అడుగుపెట్టింది. ఈ విషయం బయటికి వచ్చిన తర్వాత ఈ వ్యవహారం ఎన్నో మలుపులు తిరిగింది. తాను పాక్ వెళ్లబోనని భారత్‌లోనే ఉంటానని సీమా హైదర్ తేల్చి చెప్పింది. దీనికి తోడు తనకు భారత పౌరసత్వం కల్పించాలని ఏకంగా రాష్ట్రపతి ద్రౌపది ముర్మును కోరుతూ పిటిషన్‌ దాఖలు చేసింది. అయితే సీమా హైదర్ పాకిస్థాన్ ఏజెంట్‌ అయి ఉంటుందని అనుమానిస్తున్న పోలీసులు ఆ దిశగా దర్యాప్తు కొనసాగిస్తున్నారు.