హిమాచల్‌ను వణికిస్తున్న భారీ వర్షాలు,,,సిమ్లా వేసవి విడిదిపై విరిగిపడ్డ కొండచరియలు

హిమాచల్ ప్రదేశ్‌లో భారీ వర్షాల కారణంగా జరిగిన రెండు వేర్వేరు ఘటనల్లో 21 మంది ప్రాణాలు కోల్పోయారు. ఆదివారం రాత్రి సోలన్ జిల్లాలో క్లౌడ్ బరస్ట్ కారణంగా ఏడుగురు ప్రాణాలు కోల్పోగా.. సిమ్లా నగరంలోని వేసవి విడిది సమీపంలో శివాలయం వద్ద కొండచరియలు విరిగిపడి మరో 14 మంది మృతిచెందారు. శివాలయం వద్ద 15 నుంచి 20 మంది శిథిలాల్లో కూరుకుపోయినట్టు సిమ్లా డీసీపీ ఆదిత్య నేగి తెలిపారు. సోలన్‌లో మృతిచెందినవారిని హర్నామ్ (38), కమల్ కిశోర్ (35), హేమలత (34), రాహుల్ (14), నేహ (12), గొలూ (8), రక్షా (12)‌గా గుర్తించారు. కాగా, ఈ ఘటనపై హిమాచల్ ప్రదేశ్ ముఖ్యమంత్రి సుఖ్విందర్ సింగ్ సుఖు తీవ్ర దిగ్భ్రాంతి వ్యక్తం చేశారు. మృతుల కుటుంబాలకు తన ప్రగాఢ సానుభూతి తెలిపిన ఆయన.. బాధితులను అన్ని విధాలుగా ఆదుకోవాలని అధికారులను ఆదేశించారు.

సోలన్ జిల్లా ధావ్లా సబ్-తహసీల్‌లో జడోన్ గ్రామంలో ఆకాశానికి చిల్లుపడినట్టు కురిసిన వర్షానికి ఇల్లు కొట్టుకుపోయాయి. కండాఘాట్‌ సబ్-డివిజన్‌లోని మామ్లిగఢ్‌లో ఆరుగుర్ని ఎన్డీఆర్ఎఫ్ సిబ్బంది రక్షించారు. ఈ ఘటన జరిగిన గంటన్నరలోపు సిమ్లా ఆలయ సమీపంలో కొండచరియలు విరిగిపడ్డాయి. శిథిలాల నుంచి 9 మృతదేహాలను బయటకు తీశారు. రెస్క్యూ ఆపరేషన్ ఇంకా కొనసాగుతోంది. శిథిలాల కింద మరో 10 మంది వరకూ ఉంటారని అధికారులు భావిస్తున్నారు. ఈ ఏడాది వర్షాకాలంలో ఇప్పటి వరకూ 257 మంది ప్రాణాలు కోల్పోయారు.

గత నెల రోజుల నుంచి కురుస్తోన్న వర్షాలకు తీవ్రంగా ప్రభావితమైన ఉత్తరాది రాష్ట్రాల్లో హిమాచల్ ప్రదేశ్ ముందు వరుసలో ఉంది. పెద్ద సంఖ్యలో వంతెనలు, భవనాలు కొట్టుకుపోయాయి. ఎక్కడికక్కడ కొండచరియలు విరిగి.. రవాణా వ్యవస్థ స్తంభించిపోయింది. విపత్తు నేపథ్యంలో ఆ రాష్ట్రంలో 752 రహదారులు మూతపడ్డాయి.

ఇక, వర్షాల కారణంగా సోమవారం విద్యా సంస్థలకు సెలవు ప్రకటించారు. పలు పరీక్షలను కూడా వాయిదా వేస్తున్నట్టు ఆ రాష్ట్ర విద్యాశాఖ ప్రకటించింది. రహదారులు మూసివేత, కొండచరియలు విరిగిపడటం వల్ల కలిగిన నష్టాన్ని ఆ రాష్ట్ర సీఎం వెల్లడించారు. వర్షాల కారణంగా ఇప్పటి వరకూ రూ.7,020 కోట్లు నష్టం వాటిల్లినట్టు చెప్పారు. భారీ వర్షాల దృష్ట్యా పరిస్థితిని నిశితంగా పరిశీలించాలని ప్రభుత్వ ప్రధాన కార్యదర్శి, హోంశాఖ కార్యదర్శితో పాటు ఉన్నతాధికారులను ముఖ్యమంత్రి ఆదేశించారు. అడ్మినిస్ట్రేటివ్ సిబ్బంది అప్రమత్తంగా ఉండాలని, రోడ్లు, విద్యుత్, నీటి ఏర్పాట్లను సజావుగా నిర్వహించాలని ముఖ్యమంత్రి సూచించారు.

రుతుపవనాలు, ఉపరితల ఆవర్తన ద్రోణి ప్రభావంతో హిమాచల్ ప్రదేశ్, ఉత్తరాఖండ్‌లో భారీ వర్షాలు కురుస్తున్నాయని భారత వాతావరణ శాఖ తెలిపింది. ‘ఆవర్తన ద్రోణి హిమాలయాల దిగువన ఉంది.. అందువల్ల నైరుతి అరేబియాలోని రుతుపవనాలు హిమాలయ పర్వత ప్రాంతాలను తాకుతున్నాయి’ అని ఐఎండీ పేర్కొంది. చంబా, కాంగ్రా, హమీర్‌పూర్, మండి, బిలాస్‌పూర్, సోలన్, సిమ్లా జిల్లాలోని పలుచోట్ల భారీ నుంచి అత్యంత భారీ వర్షాలు కురిసే అవకాశం ఉందని హెచ్చరించింది.