రాజ్‌భవన్‌ ఎదుట దారుణం.. చీరలు అడ్డుపెట్టి నడిరోడ్డుపై మహిళకు ప్రసవం

ఉత్తర్‌ప్రదేశ్‌ రాజధాని లక్నోలో దారుణం చోటుచేసుకుంది. సమయానికి అంబులెన్స్ అందుబాటులో లేక.. ఓ మహిళ నడిరోడ్డుపైనే ప్రసవించింది. ఈ సంఘటన యూపీ గవర్నర్ అధికారిక నివాసం రాజ్‌భవన్‌ ఎదురుగానే జరగడం గమనార్హం. రూపా సోని అనే మహిళకు పురిటి నొప్పులు రావడంతో స్థానిక మహిళలు చీర అడ్డుగా పెట్టి ఆమెకు ప్రసవం చేయగా.. ఆమెకు మృతశిశువు జన్మించింది. ఈ ఘటనపై ఉత్తర్ ప్రదేశ్‌లో తీవ్ర రాజకీయ దుమారం రేగుతోంది. దీనికి సంబంధించిన వీడియో వైరల్ కావడంతో యోగి సర్కారుపై ప్రతిపక్షాలు దుమ్మెత్తిపోస్తున్నారు. అంబులెన్సు అందుబాటులో లేకపోవడం వల్లే ఈ దారుణం జరిగిందని ఆగ్రహం వ్యక్తం చేశాయి.

ఈ ఘటనపై యూపీ డిప్యూటీ సీఎం, ఆరోగ్య శాఖ మంత్రి బ్రజేశ్‌ పాఠక్‌ స్పందించారు. ఆస్పత్రిలో చికిత్స పొందుతున్న బాధిత మహిళను పరామర్శించారు. ఆయన మీడియాతో మాట్లాడుతూ.. నెలల నిండకుండానే ఆమె ప్రసవించిందని చెప్పారు. రిక్షాలో వెళ్తుండగా పురిటినొప్పులు రావడంతో అక్కడ ఉన్నవారు అంబులెన్స్‌కు ఫోన్ చేసి సమాచారం ఇచ్చారని తెలిపారు. 25 నిమిషాల్లోనే అంబులెన్స్ చేరుకుందని, కానీ అప్పటికే ఆమెకు ప్రసవం జరిగి.. మృతశిశువుకు జన్మనిచ్చిందని మంత్రి పేర్కొన్ననారు.

‘‘నెలలు నిండని ఆమె రిక్షాలో వెళుతుండగా పురిటి నొప్పులు మొదలయ్యాయి. ఆ దారిన వెళుతున్నవారు అంబులెన్సుకు ఫోను చేయడంతో 25 నిమిషాల్లోనే అక్కడకు చేరుకుంది.. ఆలోపు రాజ్‌భవన్‌ గేట్‌ నంబర్‌ 13 ఎదురుగా ప్రసవం జరిగిపోయింది.. దీనిపై విచారణ జరిపి, నిర్లక్ష్యం జరిగి ఉంటే చర్యలు తీసుకుంటాం’’ అని డిప్యూటీ సీఎం తెలిపారు. అయితే, ఈ ఘటనపై సమాజ్‌వాదీ పార్టీ అధినేత, మాజీ సీఎం అఖిలేశ్‌ యాదవ్‌ ట్విట్టర్ వేదికగా ముఖ్యమంత్రి యోగి ఆదిత్యనాథ్‌పై విమర్శలు ఎక్కుపెట్టారు. ‘‘బీజేపీ రాజకీయాల్లో ప్రజలకు అంబులెన్సు కంటే బుల్డోజరే ముఖ్యం కదూ!’ అంటూ వ్యగ్యంగా ట్వీట్ చేశారు.

అయితే, ఆదివారం ఉదయం నొప్పులు రావడంతో లక్నోలోని శ్యామ్ ప్రసాద్ ముఖర్జీ సివిల్ ఆస్పత్రికి రూపా సోనీ వెళ్లారు.. అక్కడ వైద్యులు ఇంజెక్షన్ చేసి ఇంటికి పంపించేశారు..అయినా ఆమెకు నొప్పులు ఆగలేదు.. దీంతో మరోసారి ఆస్పత్రికి వెళ్తుండగా మార్గమధ్యలో రాజ్‌భవన్ రోడ్డు వద్దకు వచ్చేసరికి మరింత ఎక్కువయ్యాయి.. అక్కడున్న మహిళలు చీరలు అడ్డుపెట్టి ప్రసవం చేశారు’ అని వీరంగన్ ఝల్కారీ బాయ్ మహిళ, శిశు ఆస్పత్రి వైద్యులు వెల్లడించారు. ప్రసవం తర్వాత మహిళతో పాటు శిశువును తీసుకొచ్చారని, అయితే శిశువు అప్పటికే చనిపోయినట్టు చెప్పారు.