శరద్ పవార్‌తో రహస్యంగా భేటీ అయిన అజిత్ పవార్,,,బీజేపీతో కలవాలని కోరుతున్నట్టు చెప్పిన ఎన్సీపీ చీఫ్

బాబాయ్ శరద్ పవార్‌తో తిరుగుబాటు నేత, మహారాష్ట్ర డిప్యూటీ సీఎం అజిత్ పవార్ రహస్యంగా భేటీ కావడంతో మరోసారి మరాఠా రాజకీయాలు వేడెక్కాయి. ఈ నేపథ్యంలో భేటీపై ఎన్‌సీపీ అధ్యక్షుడు పవార్ స్పందించారు. తన శ్రేయాభిలాషులు బీజేపీతో కలవాలని కోరుకుంటున్నారని, కానీ, ఆ పార్టీతో కలిసే ప్రసక్తే లేదని శరద్‌ పవార్‌ స్పష్టంచేశారు. బీజేపీకి తమ రాజకీయ విధానం పూర్తిగా వ్యతిరేకమని పేర్కొన్నారు. పుణేలో శనివారం అజిత్‌ పవార్‌తో శరద్‌ పవార్‌ రహస్యంగా భేటీ కావడం మళ్లీ బాబాయ్‌-అబ్బాయి కలుస్తారనే ఊహాగానాలు మొదలయ్యాయి. విపక్ష కూటమి ‘ఇండియా’లోకి అజిత్‌ వస్తారని కొందరు.. బీజేపీతో శరద్‌ చేతులు కలుపుతారని మరికొందరు ప్రచారం చేశారు.

దీంతో అజిత్‌తో భేటీపై పవార్‌ ఆదివారం వివరణ ఇచ్చారు. ‘మాలో కొందరు (అజిత్‌ నేతృత్వంలోని కూటమి) భిన్నమైన మార్గాన్ని ఎంచుకున్నారు. మా బాగు కోరే కొందరు మా విధానంలో ఏమైనా మార్పు ఉందా అని ఎదురు చూస్తున్నారు. అందుకే వాళ్లు మాతో చర్చలు జరుపుతున్నారు. కానీ.. నేషనలిస్ట్ కాంగ్రెస్ జాతీయ అధ్యక్షుడిగా చెబుతున్నాను.. మేము బీజేపీతో కలిసే ప్రసక్తే లేదు’ అని పవార్‌ కుండబద్దలు కొట్టారు.

అజిత్‌తో సమావేశం గురించి మాట్లాడుతూ.. ‘‘అతడు మా కుటుంబ పెద్ద.. నా అన్న కొడుకు.. ఇంకో కుటుంబసభ్యుడిని కలిస్తే తప్పేంటి..’’ అని ప్రశ్నించారు. అజిత్‌- శరద్‌పవార్‌ భేటీకి అంత ప్రాధాన్యత ఇవ్వాల్సిన అవసరం లేదని ఉద్దవ్‌ వర్గానికి చెందిన శివసేన నేత సంజయ్‌ రౌత్‌ తెలిపారు. శివసేన (ఉద్ధవ్), ఎన్‌స్పీ (శరద్ పవార్ గ్రూపు), కాంగ్రెస్‌లతో కూడిన మహా వికాస్ అఘాడీకి మహారాష్ట్ర ప్రజలు తిరిగి అధికారాన్ని అప్పగిస్తారని శరద్ పవార్ విశ్వాసం వ్యక్తం చేశారు. కాగా, ఆదివారం షోలాపూర్ జిల్లాలో దివంగత ఎమ్మెల్యే గణపత్రావ్ దేశ్‌ముఖ్ విగ్రహ ఆవిష్కరణ కార్యక్రమంలో మరో డిప్యూటీ సీఎం, బీజేపీ నేత దేవేంద్ర ఫడ్నవీస్‌తో కలిసి పవార్ వేదికను పంచుకున్నారు. కాగా, గత నెలలో శరద్ పవార్‌పై తిరుగుబాటు చేసిన అజిత్ పవార్.. తన వర్గం ఎమ్మెల్యేలతో కలిసి శివసేన (షిండే)- బీజేపీ ప్రభుత్వంతో చేతులు కలిపారు. ఆయన డిప్యూటీ సీఎంగా.. ఎన్సీపీకి చెందిన ఎనిమిది మంది ఎమ్మెల్యేలు మంత్రులుగా ప్రమాణ స్వీకారం చేశారు. గతేడాది ఉద్ధవ్ ఠాక్రేపై తిరుగుబావుటా ఎగురువేసిన.. ఏక్‌నాథ్ షిండే శివసేనలోని 40 మంది ఎమ్మెల్యేలతో బయటకు వెళ్లారు. అనంతరం బీజేపీ మద్దతుతో ప్రభుత్వాన్ని ఏర్పాటు చేశారు.