రష్యాలోని డాగేస్థాన్‌లో ఘోర అగ్ని ప్రమాదం.. చిన్నారుల సహా కనీసం 33 మంది మృతి

రష్యాలోని ఘోర ప్రమాదం సంభవించింది. మస్కోకు 1,600 కిలోమీటర్ల దూరంలోని దక్షిణ రష్యా ప్రావిన్సులు డాగేస్థాన్ రాజధాని మఖచ్కల నగరంలోని ఓ పెట్రోల్‌ స్టేషన్‌ వద్ద పేలుడు సంభవించి.. కనీసం, 33 మంది మృతి చెందారు. ఈ ఘటనలో పదుల సంఖ్యలో ప్రజలు గాయపడ్డారు. స్థానిక కాలమానం ప్రకారం సోమవారం అర్ధరాత్రి ఈ ఘటన చోటుచేసుకుంది. కాస్పియన్‌ సముద్రం ఒడ్డున ఉన్న ఈ నగరంలో జాతీయ రహదారిపై ఉన్న కార్ల సర్వీసింగ్‌ సెంటర్‌లో తొలుత మంటలు చెలరేగాయి. అనంతరం అవి ఎదురుగా ఉన్న గ్యాస్‌ ఫిల్లింగ్ స్టేషన్‌కు వ్యాపించాయి. దీంతో భారీ పేలుడు సంభవించినట్లు స్థానిక మీడియా పేర్కొంది.

ఉవ్వెత్తున మంటల ఎగిసిపడి పరిసర ప్రాంతాలకు సైతం వ్యాపించాయి. ప్రమాదంపై తక్షణమే స్పందించిన అగ్నిమాపక సిబ్బంది, పోలీసులు రెస్క్యూ ఆపరేషన్ చేపట్టారు. మొత్తం 260 ఫైరింజన్ల సహాయంతో మంటలను అదుపుచేసే ప్రయత్నం చేశారు. పలు కార్లు మంటల్లో చిక్కుకున్నాయి. గాయపడిన వారిలో 13 మంది చిన్నారులు ఉన్నట్లు అధికార వర్గాలు తెలిపాయి. అయితే, ఘటనకు కారణాలు ఏంటి? అనేది స్పష్టంగా తెలియరాలేదు. మృతుల్లో పలువురు చిన్నారులు ఉన్నట్టు వైద్యులు వెల్లడించారు.

మంటలు ఏకంగా 600 చదరపు మీటర్ల విస్తీర్ణంలో వ్యాపించాయని, ఇది తదుపరి పేలుళ్లకు కారణమైందని చెప్పారు. ‘పేలుడు తర్వాత ప్రతిదీ మా తలపై పడింది. మేము ఇకపై ఏమీ చూడలేకపోయాం’ అని ప్రత్యక్ష సాక్షులు తెలిపారు. కారు మరమ్మత్తు జరుగుతున్న సమయంలో మంటలు చెలరేగి.. ఎదురుగా ఉన్న ఫిల్లింగ్ స్టేషన్‌కు వ్యాపించినట్టు రష్యా దర్యాప్తు కమిటీ పేర్కొంది. ఈ ఘటనపై కేసు నమోదుచేసిన అధికారులు.. దర్యాప్తు చేపట్టారు.