కొత్త చిక్కుల్లో అమెరికా మాజీ అధ్యక్షుడు,,,,డొనాల్డ్ ట్రంప్ సహా 18 మందిపై కేసు

వచ్చే ఏడాది జరగనున్న అమెరికా అధ్యక్ష ఎన్నికల్లో మరోసారి తన అదృష్టాన్ని పరీక్షించుకోడానికి సిద్ధమవుతోన్న మాజీ అధ్యక్షుడు డొనాల్డ్ ట్రంప్‌కి వరుస ఎదురుదెబ్బలు తగులుతున్నాయి. తాజాగా, ఆయనపై అభియోగం నమోదయ్యింది. 2020 అధ్యక్ష ఎన్నికల్లో జార్జియాలో ఫలితాలను తారుమారు చేయడానికి ప్రయత్నించినట్లు ఫుల్టన్‌ కౌంటీ గ్రాండ్‌ జ్యూరీ జారీ చేసిన 41-ఛార్జి డాక్యుమెంట్‌లో ట్రంప్‌ సహా 18 మందిపై అభియోగాలు మోపారు. వీరిలో ట్రంప్‌ మాజీ లాయర్‌ రూడీ గులియానీ, వైట్‌హౌస్ మాజీ చీఫ్‌ మార్క్‌ మెడోస్‌, వైట్‌‌హౌస్‌ లాయర్‌ జాన్‌ ఈస్ట్‌మన్‌, జస్టిస్‌ డిపార్ట్‌మెంట్‌‌కు చెందిన మాజీ న్యాయమూర్తి జెఫ్రీ క్లార్క్‌ తదితరులు ఉన్నారు. తాజాగా కేసుతో ఇప్పటి వరకూ ట్రంప్ నాలుగోసారి క్రిమినల్‌ అభియోగాలను ఎదుర్కొన్నట్టయ్యింది.

వాస్తవానికి 2021లోనే ఎన్నికల్లో ట్రంప్ జోక్యంపై ఫుల్టన్‌ కౌంటీ డిస్ట్రిక్‌ అటార్ని ఫనీ విల్లిస్ దర్యాప్తు ప్రారంభించారు. ట్రంప్‌నకు అనుకూలంగా ఎన్నికల ఫలితాలను తారుమారు చేయాలనే ఉద్దేశంతోనే సహ కుట్రదారులు ఇందులో భాగస్వాములయ్యారని పేర్కొన్నారు. అభియోగపత్రంలో వీరిన వ్యవస్థీకృత నేరగాళ్లతో ఆయన పోల్చడం గమనార్హం. తప్పుడు వాంగ్మూలాలు, పత్రాలు సృష్టించి.. ఫోర్జరీ, తప్పుడు సమాచారంతో వాటిని పూర్తిచేయడం, సాక్షులను ప్రభావితం చేయడం, దొంగతనం, చట్ట ఉల్లంఘన వంటి నేరాభియోగాలను వీరిపై మోపారు.

ప్రస్తుత కేసులో ట్రంప్‌పై మోపిన మొత్తం అభియోగాల్లో ‘ది రాకెటీర్‌ ఇన్‌ఫ్లూయెన్స్‌ అండ్‌ కరప్ట్‌ ఆర్గనైజేషన్స్‌ యాక్ట్‌’ (రికో) ఉల్లంఘన అత్యంత తీవ్రమైంది. ట్రంప్‌ బృందంపై కూడా ఈ అభియోగాలు నమోదయ్యాయి. క్రిమినల్‌ సిండికేట్లను నిరోధించేందుకు రికో చట్టాన్ని తీసుకొచ్చారు. వేర్వేరు అంశాలను కలిపి కుట్రలను బయటపెట్టే అవకాశం ప్రాసిక్యూటర్లకు లభిస్తుంది.

మరోవైపు, ఈ ఆరోపణలపై ట్రంప్‌ బృందం స్పందించింది. ప్రాసిక్యూటర్‌ను ఆవేశపూరిత పక్షపాతిగా అభివర్ణించింది. ఈ ఆరోపణలు చేసిన వారే 2024 ఎన్నికల్లో జోక్యం చేసుకోవాలనుకుంటున్నారని ఎదురుదాడి ప్రారంభించింది. ట్రంప్‌ ప్రచార ఆధిపత్యాన్ని వాళ్లు దెబ్బతీయాలని పయత్నిస్తున్నారని ప్రత్యారోపణలు చేస్తోంది. న్యూయార్క్, సౌత్ ఫ్లోరిడా, వాషింగ్టన్‌లలో నమోదైన అభియోగాలపై ఇప్పటికే విచారణ జరగాల్సి ఉండగా.. తాజా ఆరోపణలు 2024 అధ్యక్ష ఎన్నికలకు సంబంధించి ట్రంప్‌ను మరింత చిక్కుల్లో పడేసివిగా ఉన్నాయి. గత ఎన్నికల్లో దాదాపు 12,000 ఓట్లతో జార్జియాలో బైడెన్ విజయం సాధించారు.