ఇప్పుడు గ్రాండ్ రీఎంట్రీ,,,సీడబ్ల్యూసీలో రఘువీరారెడ్డికి చోటు

కాంగ్రెస్ పార్టీలో కీలకమైన సీడబ్ల్యూసీలోఉమ్మడి ఆంధ్రప్రదేశ్ మాజీ మంత్రి, కాంగ్రెస్ సీనియర్ నేత నీలకంఠాపురం రఘువీరారెడ్డికి శాశ్వత సభ్యుడిగా స్థానం కల్పించింది. కాంగ్రెస్ పార్టీలో ఏ నిర్ణయం తీసుకోవాలన్నా.. సీడబ్ల్యూసీదే అంతిమ నిర్ణయం అన్న సంగతి తెలిసిందే. అలాంటి కమిటీలో తెలుగువారికి, అందులోనూ ఏపీ నుంచి ప్రాతినిధ్యం దక్కడం ప్రాధాన్యం సంతరించుకుంది. ఏపీలో కాంగ్రెస్ పార్టీ ప్రభావం అంతంతమాత్రంగానే ఉందన్న వార్తలు వినిపిస్తున్న వేళ, అందులోనూ రఘువీరారెడ్డి చాలా కాలంగా రాజకీయాలకు దూరంగా ఉన్న వేళ కాంగ్రెస్ హైకమాండ్ ఇలాంటి నిర్ణయం తీసుకోవడం విశేషం.

రఘువీరారెడ్డితో పాటు తెలుగు రాష్ట్రాల్లో మొత్తం ఆరుగురు నేతలకు సీడబ్ల్యూసీలో చోటు దక్కింది. అయితే, వారందరిలో రఘువీరారెడ్డి ఒక్కరికే శాశ్వత సభ్యత్వం కల్పించారు. దామోదర రాజనరసింహ, టి. సుబ్బరామిరెడ్డి, కె రాజుకు శాశ్వత ఆహ్వానితులుగా సీడబ్ల్యూసీలో చోటు కల్పించారు. ప్రత్యేక ఆహ్వానితులుగా పల్లంరాజు, వంశీచంద్‌ రెడ్డిను ఎంపిక చేశారు. ఏడెనిమిది నెలల్లో సార్వత్రిక ఎన్నికలు జరగనున్న నేపథ్యంలో కాంగ్రెస్‌ పార్టీ తీసుకున్న నిర్ణయానికి ప్రాధాన్యం సంతరించుకుంది. మొత్తంగా 84 మందితో సీడబ్ల్యూసీ జాబితాను ఆదివారం (ఆగస్టు 20) విడుదల చేసింది. వీరిలో 39 మందిని సీడబ్ల్యూసీ జనరల్‌ సభ్యులుగా ప్రకటించగా.. 18 మందిని CWC శాశ్వత ఆహ్వానితులుగా, 14 మందిని ఇంఛార్జిలుగా, తొమ్మిది మందిని ప్రత్యేక ఆహ్వానితులు, నలుగురిని ఎక్స్‌అఫిషియో సభ్యులుగా పేర్కొన్నారు.

కాంగ్రెస్‌లో అసమ్మతి వర్గంగా పేరొందిన జీ23 నేతలైన శశిథరూర్‌, ఆనంద్‌ శర్మ, ముకుల్‌ వాస్నిక్‌ లాంటి నేతలకు కూడా ఈ కమిటీలో చోటు కల్పించడం గమనార్హం. సచిన్‌ పైలట్‌తో పాటు దీపా దాస్‌ మున్షి, సయ్యద్‌ నసీర్‌ హుస్సేన్‌‌ను కొత్తగా సీడబ్ల్యూసీలోకి తీసుకున్నారు. ఉమ్మడి ఆంధ్రప్రదేశ్‌లో రెవెన్యూ మంత్రిగా పనిచేశారు రఘువీరారెడ్డి. రాష్ట్ర విభజన అనంతరం ఏపీసీసీ చీఫ్‌గా పనిచేశారు. ఆ తర్వాత రెండు పర్యాయాలు పోటీ చేసి ఓటమి పాలైన ఆయన రాజకీయాలకు దూరమైపోయారు. సొంతూరు సత్యసాయి జిల్లా నీలకంఠాపురంలో సాధారణ జీవితం గడుపుతున్నారు. వ్యవసాయం చేసుకుంటూ, కుటుంబసభ్యులతో ఆహ్లాదంగా గడుపుతూ జీవనం సాగిస్తున్నారు. గ్రామస్థులకు, రైతులకు సాయం చేస్తున్నారు. గ్రామంలో ఆలయాలను పునర్నిర్మించారు.

పార్టీలకు అతీతంగా రఘువీరారెడ్డికి మంచి పేరుంది. అలాంటి రఘువీరారెడ్డిని మళ్లీ యాక్టివ్ చేయాలని కాంగ్రెస్ అధిష్టానం భావించినట్లు తెలుస్తోంది. కొన్ని నెలల కిందట రాహుల్ గాంధీ తన భారత్ జోడో యాత్ర సమయంలో రఘువీరారెడ్డిని కలిశారు. ఆ తర్వాత కర్ణాటక అసెంబ్లీ ఎన్నికల్లో బెంగళూరు పార్టీ ఎన్నికల పర్యవేక్షకులుగా రఘువీరారెడ్డి పనిచేశారు. తాజాగా సీడబ్ల్యూసీ సభ్యుడిగా నియమితులయ్యారు.