దొంగతనాలకు ముందు దేవుడికి ప్రార్ధనలు,,,,పట్టుకున్న పోలీసులు

ఆ ఇద్దరూ దొంగతనాలు, చోరీలు చేయడంలో ఆరితేరిపోయారు. అంతేకాదు, చోరీకి వెళ్లే ముందు దొంగతనం విజయవంతం కావాలని దేవుడికి మొక్కుకుంటారు. చోరీ ప్రయత్నం ఫలిస్తే కానుకలు హుండీలో వేసి గుండు కొట్టించుకుని మొక్కులు చెల్లించుకుంటామని కోరుకుంటారీ దొంగలు. అదేంటి దొంగలు కూడా దొంగతనాలకు ముందు దేవుడ్ని ప్రార్ధిస్తారా? ముడుపులు కట్టి.. తలనీలాలు సమర్పించుకుంటారా? అని ఆశ్చర్యపోకండి. మీరు చదువుతున్నది నిజమే. ఈ తరహా దొంగలు కర్ణాటకలోని బెంగళూరు నగరంలో పట్టుబడ్డారు. ఇటీవల దొంగతనం చేసి.. మొక్కలు చెల్లించుకుని ఇంటికి వచ్చేసరికి పోలీసులు ప్రత్యక్షం కావడంతో గుట్టురట్టయ్యింది.

పోలీసుల తెలిపిన వివరాల ప్రకారం.. మంజునాథ, యతీశ్‌ అనే ఇద్దరు చోరులు.. దొంగతనానికి ముందు చామరాజనగరలోని ప్రముఖ మలెమహాదేశ్వర స్వామి ఆలయనాకి వెళ్తారు. తాము చేసే దొంగతనం విజయవంతమైతే మళ్లీ నీ కొండకు వచ్చి గుండు కొట్టించుకుంటామని మొక్కుకుంటారు. మంజునాథ, యతీశ్‌ ప్రతిసారీ ఇలాగే ఆలయానికి వెళ్లి ముడుపులు కడతారని పోలీసులు తెలిపారు. గొలుసు చోరీ, వాహనం దొంగతనం అనంతరం మలెమహదేశ్వర స్వామి గుడికి వెళ్లి గుండు కొట్టించుకుని, హుండీలో కానుకలు వేసి వస్తుంటారు.

ఈ క్రమంలో ఆగస్టు 13న సదాశివనగరి పరిధిలోని ఓ వృద్ధురాలి మెడలో గొలుసును దొంగలు చోరీ చేసి పరారయ్యారు. అయితే, చోరీ దృశ్యాలు స్థానికంగా ఉన్న సీసీటీవీ కెమెరాలో రికార్డయ్యాయి. దీంతో పోలీసులు నిందితులు గుర్తించడంతో మంజునాథ, యతీశ్‌ల చోరీ బాగోతం బయటపడింది. గిరినగరి పరిధిలోని శ్యామల అనే వృద్ధురాలి మెడలో గొలుసును అపహరించిన ఇద్దరూ.. మలేమహదేశ్వర ఆలయానికి వెళ్లి, మొక్కు చెల్లించుకుని ఇంటికి వచ్చేసరికి వారి ముందు పోలీసులు ప్రత్యక్షమయ్యారు. చోరీ సమయంలో స్థానిక సీసీటీవీ కెమెరా ఫుటేజ్‌ ఆధారంగా నిందితులను త్వరగా గుర్తించారు. స్వామి దర్శనం చేసుకుని ఇంటికి వచ్చేసరికి పోలీసుల దర్శనమైంది. దీంతో ఇద్దర్నీ పోలీసులు అరెస్ట్ చేసి.. వారి నుంచి 25 గ్రాముల బంగారు గొలుసు, మూడు బైకులను స్వాధీనం చేసుకున్నారు. నిందితులపై కేసు నమోదుచేసి జైలు పంపినట్టు పోలీసులు తెలిపారు.