మరో 10 రోజుల్లో పెళ్లికి ముహూర్తం ఖరారు,,,చివరి నిమిషంలో బిగ్ ట్విస్ట్ ఇచ్చిన కుక్క

పీటల మీద ఆగిపోయే పెళ్లిళ్లను మనం ఇప్పటివరకు చాలానే చూశాం. సినిమాల్లోనైతే ఏకంగా తాళికట్టే సమయంలో రద్దయిన వివాహాలు ఎన్నో ఉన్నాయి. అయితే అవి రకరకాల కారణాల వల్ల జరుగుతాయి. కానీ ఈ ఘటనలో మాత్రం పెంపుడు కుక్క కారణంగా ఓ వ్యక్తి పెళ్లి రద్దు అయ్యే పరిస్థితి తలెత్తింది. వినడానికి ఆశ్చర్యంగా ఉన్నా ఇదే నిజం. పెళ్లికి అన్ని రకాల ఏర్పాట్లు చేసుకున్న ఆ వరుడు.. తన పెంపుడు శునకం చేసిన పనికి తల పట్టుకుంటున్నాడు. ఇంతకీ ఆ కుక్క ఏం చేసిందంటారా. వరుడికి సంబంధించిన పాస్‌పోర్టును నమిలి తినేసింది. అయితే వారు ఈ పెళ్లిని వేరే దేశంలో పెట్టుకోవడంతో పాస్‌పోర్టు తప్పనిసరిగా మారింది. దీంతో ఆ వ్యక్తి ప్రస్తుతం అధికారుల చుట్టూ తిరుగుతున్నాడు. ఈ ఘటన అమెరికాలో జరిగింది.

అమెరికాకు చెందిన డొనాటో ఫ్రాట్టరోలిస్ అనే వ్యక్తికి మాగ్దా మజ్రీస్ అనే యువతితో పెళ్లి కుదిరింది. అయితే వారు ఈ పెళ్లిని ఇటలీలో చేసుకోవాలని నిర్ణయించుకున్నారు. అన్ని రకాల ఏర్పాట్లు చేసుకున్నారు. పెళ్లి కొడుకు, పెళ్లి కుమార్తె తరఫున పెళ్లికి హాజరయ్యే బంధువులు, స్నేహితులకు పాస్‌పోర్టులు, వీసాలు, టికెట్లు అన్నీ సిద్ధం చేసుకున్నారు. అయితే వరుడు.. పెళ్లికి సంబంధించిన కొన్ని పనుల కోసం ఇంటి నుంచి బయటికి వెళ్లాడు. అయితే ఆ సమంయలో డొనాట్ ఫ్రాట్టరోలిస్‌ పెంచుకుంటున్న శునకాన్ని ఇంట్లోనే వదిలేసి వెళ్లారు. అయితే ఇంట్లోని టేబుల్‌ మీద పెట్టిన పాస్‌పోర్టును ఆ పెంపుడు కుక్క నమిలి తినేసింది. అయితే పెళ్లి షాపింగ్‌కు వెళ్లిన డొనాట్ ఫ్రాట్టరోలిస్‌, అతని కుటుంబ సభ్యులు.. ఇంటి వచ్చి.. ఆ పెంపుడు శునకం చేసిన పని చూసి షాక్ అయ్యారు. పాస్‌పోర్టు చిరిగిపోయి ఉండటంతో డొనాట్ ఫ్రాట్టరోలిస్‌ తీవ్ర ఆందోళన చెందాడు. మరో పది రోజుల్లో పెళ్లి పెట్టుకుని.. ఇప్పుడు పాస్‌పోర్టు కుక్క నమిలేయడంతో ఏం చేయాలో అర్థం కాక కంగుతిన్నాడు. పెళ్లి కోసం ఎన్నో కలలు కన్న డొనాట్ ఫ్రాట్టరోలిస్‌.. ముహూర్తం సమయం దగ్గర పడుతున్న వేళ వింత ట్విస్ట్ చోటు చేసుకోవడంతో అవాక్కయ్యాడు.

పాస్‌పోర్టు చిరిగిపోవడంతో డొనాట్ ఫ్రాట్టరోలిస్‌.. వెంటనే పాస్‌పోర్టు ఆఫీస్‌కు వెళ్లి జరిగిన విషయం మొత్తాన్ని అక్కడి అధికారులకు వివరించాడు. తనకు పెళ్లి నిశ్చయమైందని.. ఆగస్టు 31 వ తేదీన ఇటలీలో జరుపుకునేందుకు అన్ని ఏర్పాట్లు సిద్ధం చేసుకున్నట్లు చెప్పాడు. తనకు ఏదైనా ప్రత్యామ్నాయం చూపించాలని వారిని వేడుకున్నాడు. తన పాస్‌పోర్టు సమస్యను వీలైనంత తొందరగా పరిష్కారం అవుతుందని ఆశాభావం వ్యక్తం చేశాడు. లేకపోతే తాను లేకుండానే తనకు కాబోయే భార్యతో పాటు కుటుంబం, బంధువులు అందరూ ఇటలీకి వెళ్లిపోతారని.. తాను మాత్రం ఇక్కడే ఉండిపోవాల్సి వస్తుందని అధికారులకు డొనాట్ ఫ్రాట్టరోలిస్‌ మొర పెట్టుకున్నాడు. దీనిపై డొనాట్ ఫ్రాట్టరోలిస్‌ సమస్యపై అమెరికా చట్టసభ సభ్యుడు ఒకరు, లించ్‌, మార్కీ పాస్‌పోర్టు కార్యాలయాలు స్పందించాయి. త్వరలోనే పరిష్కారం చూపిస్తామని హామీ ఇచ్చాయి.