టీడీటీ ఛైర్మన్‌కు పుష్ప సినిమా చూపించాలని,,,జగన్ సర్కారుపై బండి సంజయ్ విమర్శలు

బీజేపీ జాతీయ ప్రధాన కార్యదర్శి బండి సంజయ్.. ప్రస్తుతం ఆంధ్రప్రదేశ్‌ మీద ఫోకస్ చేశారు. నిన్న విజయవాడలో పర్యటించిన బండి సంజయ్.. జగన్ సర్కారుపై విమర్శలు చేయగా.. ఇప్పుడు టీటీడీ ఛైర్మన్ భూమన కరుణాకర్ రెడ్డిపై విరుచుకుపడుతూ.. ఓ వీడియో విడుదల చేశారు. అసలు టీటీడీ ఛైర్మన్ భూమన కరుణాకర్ రెడ్డి ఎవరని ప్రశ్నించారు బండి. వాళ్ల కూతురి వివాహం ఏ మత సంప్రదాయంలో చేశారన్న ప్రస్తావన లేవనెత్తారు. ఆయన ఎన్నికల అఫిడవిట్లో ఏ మతానికి చెందిన వ్యక్తిగా పేర్కొన్నారని నిలదీశారు. సనాతన ధర్మం, హిందూ సంప్రదాయంపై ఎలాంటి అవగాహనలేని వ్యక్తిని తీసుకొచ్చి టీటీడీ ఛైర్మన్ పదవి కట్టబెట్టి.. హిందూ ప్రజలను తీవ్రంగా అవమానిస్తున్నారని విమర్శించారు. హిందూ సంప్రదాయానికి వ్యతిరేకంగా ఉన్న వ్యక్తులకు టీటీడీ ఛైర్మన్ పదవి ఇవ్వటాన్ని.. తెలుగు రాష్ట్రాల హిందూ సమాజంతో పాటు దేశవ్యాప్తంగా ఉన్న హిందువులంతా గమనించాలని.. ప్రతీ ఒక్కరూ స్పందించాలని బండి సంజయ్ కోరారు.

ఇదిలా ఉంటే... టీటీడీ ఛైర్మన్ భూమనకు తిరుమలపై అడవులున్న విషయం తెలియదటా అంటూ బండి సంజయ్ ఎద్దేవా చేశారు. ఆయనకు అల్లు అర్జున్ నటించిన పుష్ప సినిమా చూపించాలని సెటైర్ వేశారు. సినిమా చూపిస్తేనైనా.. ఇక్కడ అడవులున్న విషయం అర్థమవుతుందేమోనని వ్యాఖ్యానించారు. అడవులే లేకపోతే.. మరి ఇప్పుడొస్తున్న చిరుతలు ఎక్కడి నుంచి వస్తున్నట్టని ప్రశ్నించారు. ఇన్ని రోజులు అడవులు లేకపోతే.. ఇంతకు ముందు ఉన్న ప్రభుత్వాలు చెట్టు నాటారా అంటూ వ్యంగ్యాస్త్రాలు సంధించారు బండి సంజయ్

కాగా.. నిన్న కూడా.. విజయవాడలోని పార్టీ రాష్ట్ర కార్యాలయంలో నిర్వహించిన ఓటరు అవగాహన రాష్ట్ర స్థాయి శిక్షణ కార్యక్రమానికి హాజరైన బండి సంజయ్.. జగన్ ప్రభుత్వంపై విరుచుకుపడ్డారు. తెలుగు రాష్ట్రాల ప్రభుత్వాలు అవినీతి, అప్పులు, అరాచకాల్లో పోటీపడి మరీ దోచుకుంటున్నాయని ఆరోపించారు. ఆంధ్రప్రదేశ్‌లో రాజ్యమేలుతోన్న అవినీతి, అరాచక ప్రభుత్వాన్ని కూకటివేళ్లతో పెకిలించాల్సిన సమయం వచ్చిందన్నారు. ఈసారి కూడా అధికారంలోకి రావాలని వైసీపీ అడ్డదారులు తొక్కుతోందని ఆరోపించారు బండి సంజయ్.