ఇంటిని అద్దెకు తీసుకుని మరి ,,,విజయనగరంలో మాజీ సీఆర్‌పీఎఫ్ కానిస్టేబుల్ దొంగతనాలు

విజయనగరంలో వరుసగా చోరీ చేస్తున్న వ్యక్తిని అరెస్ట్ చేశారు పోలీసులు. అతడి గురించి ఆరా తీస్తే.. సంచలన విషయాలు బయటపడ్డాయి. నగరానికి చెందిన శ్రీనివాసరావు ఛత్తీస్‌గఢ్‌‌లో సీఆర్‌పీఎఫ్‌ కానిస్టేబుల్‌గా పనిచేసేవాడు. అతడు సెలవుపై గతేడాది ఆగస్టులో వచ్చేశాడు.. అతడు ఉడా కాలనీ సమీపంలో ఓ ఇల్లు అద్దెకు తీసుకున్నాడు. శ్రీనివాసరావు ఆన్‌లైన్‌లో బెట్టింగ్‌లకు అలవాటుపడి రూ.లక్షల్లో అప్పులపాలయ్యాడు. ఆ తర్వాత ఉద్యోగానికి వెళ్లలేదు.. అప్పులు తీర్చేందుకు దొంగతనాల బాటపట్టాడు.. అందుకు అవసరమైన సామాగ్రి కొన్నాడు.

శ్రీనివాసరావు తాళాలు వేసి ఉన్న ఇళ్లే లక్ష్యంగా.. పగటి వేళ రెక్కీ నిర్వహించేవాడు. రాత్రి 9 గంటల సమయంలో బయలుదేరి.. 12 గంటలయ్యే లోపు దోచేసేవాడు. ఇప్పటి వరకు 12 చోట్ల ఇలా నేరాలకు పాల్పడ్డాడు.. ఉడాకాలనీ ఫేజ్‌-1, ఫేజ్‌-2, ఫేజ్‌-3, అలకానంద కాలనీ, రింగురోడ్డు, బాబామెట్ట తదితర ప్రాంతాల్లో బంగారం, వెండి అపహరించాడు. వరుస చోరీలు జరుగుతుండడంతో పోలీసులు అప్రమత్తం అయ్యారు. ఈనెల 14న ఉడాకాలనీ సమీపంలోని ఆర్టీసీ కాలనీలో బి.శ్యామ్‌కుమార్‌ అనే వ్యక్తి ఇంట్లో చోరీ జరిగింది. బాధితుడు ఇచ్చిన ఫిర్యాదుతో పోలీసులు దర్యాప్తు చేపట్టారు.

పోలీసులు ఆదివారం శాలిపేట దగ్గర వాహన తనిఖీలు చేస్తుండగా.. శ్రీనివాసరావు ఓ బ్యాగ్‌తో అనుమానాస్పదంగా కనిపించాడు. పోలీసులు వెంటనే ఆపి తనిఖీ చేయగా.. అందులో కొన్ని తాళాలు, స్క్రూడ్రైవర్‌ ఇతర పరికరాలున్నాయి. వాటిపై ఆరా తీయగా.. దొంగతనాలు చేసినట్లు అంగీకరించాడు. ఈ మేరకు కేసు నమోదు చేసి.. అతడి దగ్గర నుంచి 27 తులాల బంగారం, ఆరు కిలోల వెండి ఆభరణాలు స్వాధీనం చేసుకున్నారు. సీఆర్‌పీఎఫ్‌ కానిస్టేబుల్‌‌గా దేశానికి సేవ చేయాల్సిన శ్రీనివాసరావు.. బెట్టింగ్‌లతో అప్పులు పాలయ్యాడు. ఈజీ మనీ కోసం ఉద్యోగాన్ని కూడా పక్కన పెట్టి వరుసగా చోరీలు చేశాడు. ఇలా అతడు 12 చోట్ల చోరీలు చేసి పెద్దఎత్తున బంగారం, వెండి ఆభరణాలు కొట్టేశాడు. కానీ అనుకోకుండా పోలీసులకు చిక్కాడు.