దండలు మార్చుకున్న తర్వాత ఇష్టం లేదన్న వధువు

పెళ్లి ఇష్టం లేని ఓ యువతి.. సరిగ్గా తన మెడలో మూడుముళ్లు వేయడానికి సిద్ధంగా ఉన్న వరుడి చేతిలో మంగళసూత్రాన్ని లాగేసుకుంది. అనంతరం దానిని హుండీలో వేయడానికి ప్రయత్నించింది. బంధువులు వారించినా ఆమె వినిపించుకోలేదు. ఊహించని ఈ పరిణామానికి వరుడు సహా పెళ్లికి హాజరైనవారంతా షాకయ్యారు. విస్తుగొలిపే ఈ ఘటన తమిళనాడులోని రామనాథపూరంలో చోటుచేసుకుంది. వివరాల్లోకి వెళ్తే.. రామనాథపురం జిల్లా తిరువాడానై సమీపంలోని ఓ గ్రామానికి చెందిన యువకుడు (29) విదేశాల్లో ఉద్యోగం చేస్తున్నాడు.

కొద్ది నెలల కిందట స్వగ్రామానికి వచ్చిన అతడికి.. తన పొరుగూరుకి చెందిన 21 ఏళ్ల యువతితో వివాహం కుదిరింది. దీంతో ఆగస్టు 21న పెళ్లికి ముహూర్తం నిర్ణయించారు పెద్దలు. తిరువాడానైలోని ఓ ఆలయంలో కళ్యాణం జరిపించడానికి ఏర్పాట్లు చేశారు. ఈ క్రమంలో సోమవారం ఉదయం ఆలయానికి వధువు, వరుడు సహా వారి కుటుంబాలు, బంధువులు, స్నేహితులు చేరుకున్నారు. అనంతరం వారి సమక్షంలో వధూవరులు వివాహ రిజిస్టర్‌లో సంతకాలు చేసి.. పూలమాలలు మార్చుకున్నారు.

అయితే, మాంగళ్యధారణ సమయంలో వధువు షాకిచ్చింది. తనకు ఈ పెళ్లి ఇష్టం లేదని బాంబు పేల్చింది. వధువు మెడలో మూడుముళ్లు వేయడానికి వరుడు తన చేతితో తాళి పట్టుకుని ఉన్నాడు. ఆ సమయంలో వరుడి చేతిలో తాళిని లాక్కొని తనకి పెళ్లి ఇష్టంలేదని తెగేసి చెప్పింది. అనంతరం అక్కడున్న హుండీలో తాళిని వేయడానికి ప్రయత్నించింది. ఈ హఠాత్పరిణామంతో వరుడి సహా బంధువులు మైండ్ బ్లాంక్ అయ్యింది. తర్వాత తేరుకుని ఆమెకు సర్దిచెప్పే ప్రయత్నం చేసినా.. వధువు ససేమిరా అంది. తాను ఈ పెళ్లి చేసుకోనుగాక చేసుకోనని తెగేసి చెప్పింది.

చివరకు వరుడి కుటుంబం పోలీసులకు ఫిర్యాదు చేయడంతో వారు రంగంలోకి దిగారు. అక్కడకు చేరుకుని, పోలీసులు విచారణ చేపట్టారు. యువతితో ప్రత్యేకంగా మాట్లాడిన పోలీసులకు.. ఆమె తన తల్లిదండ్రుల బలవంతం కారణంగా పెళ్లికి అంగీకరించినట్లు తెలిపింది. తనకి ఈ పెళ్లి ఇష్టం లేదని చెప్పింది. వధువును బలవంతంగా పెళ్లికి ఒప్పించినట్టు తెలుసుకున్న వరుడి కుటుంబం నిరాశగా పెళ్లి మండపం నుంచి వెనుదిరిగింది. విదేశాల్లో మంచి వేతనంతో ఉద్యోగం చేస్తున్న యువకుడు.. పెళ్లిపై పెట్టుకున్న ఆశలు అడియాశలయ్యాయి. ఎంతో ఘనంగా పెళ్లికి ఏర్పాట్లు చేసుకున్నాడు. ఇదే సమయంలో వరుడి ఇంట్లో ఏర్పాటుచేసిన వివాహ విందులో పాల్గొన్న బంధువులు పెళ్లి ఆగిపోయిన విషయం తెలియక చదివింపులు, కానుకులు ఇచ్చి వెళ్లడం కొసమెరుపు.