ఏటీఎం కార్డు సైజులో వెరైటీ వెడ్డింగ్ కార్డు

ప్రతి ఒక్కరి జీవితంలో వివాహం మర్చిపోలేని ఓ అనుభూతి. అలా జీవితాంతం పెళ్లి వేడుకను ఓ తీపి గుర్తుగా మార్చుకునేందుకు కొందరు వినూత్నంగా ఆలోచిస్తుంటారు. పెళ్లికి ఆహ్వాన పత్రికల నుంచి విందులో వడ్డించే భోజనాల వరకు తమ ప్రత్యేకతను చాటుకోవడానికి ప్రయత్నిస్తారు. ఇదే తరహాలో పశ్చిమగోదావరి జిల్లాకు చెందిన ఓ యువకుడు తన పెళ్లి శుభలేఖ విషయంలో వినూత్నంగా ఆలోచించాడు. ఏటీఎం కార్డు సైజులో వెడ్డింగ్ కార్డుతో సరికొత్త ట్రెండ్‌ను సెట్ చేశాడు. చూడటానికి ఏటీఎం కార్డు సైజులో ఉండే ఈ ఆహ్వాన పత్రిక ఆకట్టుకుంటోంది. ఇప్పుడు ఈ కార్డు వైరల్ అవుతోంది.

పెనుమంట్ర మండలం మార్టేరుకు చెందిన చిర్ల కృష్ణారెడ్డి-శిరీష వివాహానికి సెప్టెంబరు 2న ముహూర్తం ఫిక్స్ అయ్యింది. కృష్ణారెడ్డి తన పెళ్లి కార్డు సరికొత్తగా ఉండాలని ప్లాన్ చేసుకున్నాడు. ఏటీఎం కార్డు సైజులో క్యూఆర్‌ కోడ్‌ ముద్రించాడు.. తమ పెళ్లికి ఆహ్వానం పలుకుతూ ఈ కార్డులను బంధువులు, స్నేహితులకు అందజేశారు. ఆ కార్డుపై వివరాలు తెలుసుకోవాలంటే మొబైల్ ఉండాల్సిందేనట. క్యూఆర్‌ కోడ్‌ స్కాన్‌ చేస్తే చాలు పెళ్లి ముహూర్తం, వివాహ వేదిక, విందు సమయం తదితర వివరాలు కనిపిస్తాయి. అలాగే వధూవరుల ప్రీ వెడ్డింగ్‌ ఫొటోలు కూడా చూడొచ్చు.

ఈ కార్డును ప్రత్యేకంగా బెంగళూరులో ఈ కార్డు ముద్రించారట.. దాదాపు 20 రోజుల వరకు సమయం పట్టిందని చెబుతున్నాడు. మొత్తానికి గోదారోళ్ల ప్రత్యేకతను చాటుకున్నాడు ఈ యువకుడు. ఇలా విభిన్నంగా తన పెళ్లి ఆహ్వాన పత్రికతో ఆకట్టుకున్నారు. ఇప్పుడీ పెళ్లి కార్డు ఆ చుట్టు పక్కల ప్రాంతాలతో పాటుగా సోషల్ మీడియాలోనూ వైరల్ అవుతోంది.